20.09.2026
德國足球甲組聯賽 第四週
FC Schalke 04 - SV Elversberg
Arena AufSchalke
賽果：0:0
入場人數：61554 (2300 名作客球迷)
門票：20,35€

又又又又去作客史浩克，由第一年諗住一生人一次到第二年去爭升班，到上年已經開始有啲 meh 既感覺，今年一齊升班再黎作客更加似例行公事咁。我地為咗要貪佢免費泊車，每次都係開波兩個半鐘前到球場，以往門口都係企咗好多人搶住做第一個入閘，今日就得返幾十人，好似個個都唔再緊張呢場波咁。

但我係絕對唔會介意例行公事係黎呢啲世界級球場，而唔係去啲牛屎地方出戰～賽前我地都驚驚地會唔會無人黎作客，星期日咁晏先開波比啲人有藉口留喺屋企；好在最後都有超過二千人到場，啲人只係唔再想一早入場得個企字。

我地今日就比平時更加早出門口，場波五點半先開波，我地就食完早餐後九點半左右就出發，第一個目的地係 Essen。 德甲既開波時間好難預，出發前食埋晏又太早，完場後又太夜食唔到飯。 今日有另一個解決方法就係去附近食 lunch. 平時我地都係去麥記解決，但 Essen 火車站附近有個 Foodcourt 咩都有得食，嗰度離 Gelsenkirchen 只係半個鐘車程，可以完美解決問題。食飽咗就喺嗰度買咗兩件蛋糕外賣，去到球場外先食甜品！

今朝一直都落住大雨，好好彩喺我地到埗後就出太陽，個球場上蓋都開咗，唔洗困住啲二三四手煙味喺場內！ 過去三年黎呢度，兩隊波都係德乙球隊；今日唔係既只係兩隊以德甲球隊身份再次碰面，場內咩都無變過。我又如常去主看台嗰邊搵位影相，今年我學精咗唔去媒體席，成功安樂咁留低。

今日係我第十次黎到呢個球場，每次都仍然有嗰種內心嘩一聲既感覺，德甲先僽屬於史浩克既地方。 北看台既凝聚力，同埋場內所有球迷既投入感可以令你感受到隊波對當地人有幾重要，同埋佢地點樣可以一齊走過高低潮。 兩年前喺賽後被鬧垃圾既球員喺翌季以冠軍升班，上到黎頭幾場戰績又唔錯，守和到拜仁又可以大炒柏林聯，今日佢地繼續以守為攻。

喺中立球迷角度黎睇，好似話場波雖然無入球但兩隊都踢得好好，我地攻得守得，對方就守得好好。 上季黎作客佢地都係一早入咗波之後死守完場，最憎呢啲波！！！ 但今日睇得出兩隊波都覺得拎到一分就夠。 又話迪基高係球王既，今日佢正選出戰，係我地第一次可以親眼睇佢踢波，但完全唔見影，我估佢都係做後備落場踢廿分鐘好過。

咁多個比數中，0:0 最無奈。 完場後都係好 hea 咁一齊叫咗幾次就完。 今季暫時四戰七分，排第七，絕對可以接受！！！ 黎緊兩個星期國際賽程，週末又可以好好留喺屋企！

Btw 呢個星期我地有一重大好消息，就係高普接領德國國家隊後第一個國際賽程，佢竟然睇中咗 Felix Keidel！！！？ 球隊歷史首次有現役球員（仲要係屬於我地既球員，唔僽借將）入選德國國家隊！！！ 早兩星期喺一個訪問入面問 Keidel 會想踢歐聯定入國家隊，佢㨂咗國家隊。然後被問到覺得邊樣有機會發生先？ 佢話照而家咁睇，應該歐聯會有機會啲。 點知一個星期後就實現咗佢諗住唔會發生既事。 睇黎呢度係真係實現夢想既福地～～