香港超級聯賽 第一週 夢想 FC 對 和富大埔 青衣運動場 賽果： 1:1 (0:1) 入場人數： 973 德國賽季陸續開始既同時，我就返到香港要等兩個星期左右先有波睇，我今季既第一場就㨂左去青衣睇夢想 FC 對大埔，原因好簡單：近！再加上當日掛緊一號風球，去青衣運動場睇波一定勁大風唔會出汗！ 原本諗住入會，因為夢想入會連季票只需 100 蚊，即係如果睇超過兩場波就已經賺返。我賽前大約半個鐘左右到球場，見到已經有超過二十人排隊，心諗，我都係最多睇到兩場波，唔爭在果廿蚊啦！咁就直接去買飛入場算。最後好在我無排隊入會，我見到有人為左入會排到半場先入到場… 入場後聽到啲旗出風吹到逢逢聲，有幾下啲風吹落塊面度係痛架囉！！！！坐低左之後見到牛丸都黎左，好多人都叫佢同佢打招呼。大埔既球迷聚係看台望球場既最左邊，隔幾個區就係夢想既打氣團，我就坐最右，所以完全聽唔到兩方既任何打氣聲（連有無打氣其實我都唔係好知）。只係見到遠處有一堆人著綠衫，開波前有 fing 下枝旗，仲有幾枝 bom bom 捧。 夢想係拎港菁既會籍空降港超，一開波佢地都好似唔係好知做緊乜咁，比大埔禁住黎攻。我好好奇入場既球迷係為左某一隊波入場，定係難得青衣又有聯賽睇所以走黎食花生既青衣友。大埔上半場入波後有零星既歡呼聲，我以為場內應該大部份都係花生友。 下半場開波前突然落左幾分鐘雨，坐頭幾行既人全部走哂上黎坐。後來雖然大家坐得比較集中，但真係可以完全安靜咁睇波！點知去到大埔有球員食紅牌被罰離場時，場人大部份既人拍哂手咁讚手，之後佢地就開始出下聲叫啲球員去呀，射呀，攻呀等等，我先知原來咁多人係黎睇夢想！去到尾段夢想追和，好多人開心到跳起身慶祝，最後兩隊各得一分～ 雖然話睇波就應該專心望球場，但青衣場既背景真係好持別。望住貨櫃碼頭、墳場、山上既屏風樓，其中兩條連接青衣既橋、天氣好既時會仲會見到 ICC 同 IFC，幾乎最重要既香港特色都可以見到 😀 仲有如果場波係尾場波的話仲可以用天光睇到天黑。 無諗過青衣場都可以有近千個人入場睇波，我地即管睇下下場波係咪都有咁多人入場～黎緊我地每星期都會去睇幾場港超，到時我會翻譯 P 寫既後記，始終覺得由佢既角度去睇港超會唔同啲。Continue reading

暑假返香港前突然決定去倫敦一趟，原本見到利物浦會作客屈福特，但佢地只向會員賣飛，所以我地完全無機會可以買到飛；我地去係倫敦果幾日當中都有唔少波可以去睇，得米禾爾係最有氣氛同最有機會買到飛。

各大聯賽開波前，最令我地期待既就係歐霸外圍賽！歐洲足協抽籤簽宣布第一圈既賽程，我地見到盧森堡既其中一隊波會對格拉斯哥流浪呀！！！德國附近國家既聯賽既級別都比較高，即使佢地要踢外圍賽，講緊既都只係最尾果兩圈，盧森堡既聯賽水平較低，但總共有四隊可以參戰歐聯或歐霸外圍賽，對手都係其他國家既冠軍或亞軍！

抖暑話咁快就過左一個月，歐州賽事既外圍賽係六月尾抽籤後，我地最期待知道四枝盧森堡球隊既隊手，最後除左會有格拉斯哥流浪會訪盧之後，老實講，其他都無咩興趣。但始終餓波餓左成個月，有波睇無理由唔睇，最後㨂左去呢場 Fola Esch 對來自遠東歐既 Milsami Orhei。