03.09.2023
西班牙皇家足協乙組聯賽（第三組） 第 1 週
Hércules Alicante CF - RCD Espanyol B
Estadio José Rico Pérez
賽果：1:0 (1:0)
入場人數：4.958
門票：15€
更多相片

星期六晚由 Elche 返到去已經凌晨一點，第二朝我地食完早餐大約十二點又再出發南下去 Alicante，準備夜晚睇 Hercules，靴高斯～

我地係球場外既停車場泊低架車之後就行大約半個鐘去到市中心。第一個目的地係行上去城堡睇風景，今日完全令我回想起香港又熱又焗既天氣，心情又變到好煩燥。上到山去到另一面見到個海之後個焗熱感無左，迎來既係一陣陣強風。

係城堡沿路落山進入舊城，然後行到去沙灘岸邊，啲沙刮起啲沙打落個身度勁痛！ 但有風好過無風，我地就坐係海邊睇人玩浪，同時睇 SVE 既比數直播直到完場，迎接我地係德乙取得第一勝！！！ 即刻搵個地方食 tapas 慶祝，呢幾日好想食燒魷魚腳或者八爪魚仔，以為周圍都有得食點知原來唔係間間都有…. 最後餓得濟求奇㨂左間就入去食，野食ok但賣相唔得，完全無風味！ 叫左兩碟野食就繼續去行下街算。

途中我地經過一間茶餐廳樣既 tapas bar 幾次都無入到去，行左一陣我地搵左個地方坐低想飲杯野，點知餐牌黎到之後佢話要額外收每人 3€ 服務費，我地即刻走人。 心煩之際醒起間 up dup tapas bar，就行去搵返間野入到搵個位坐。

間餐廳入面勁混亂，枱又無人執地下有好多食物碎，乾淨佢就一定唔係，但入到去個感覺話我知我地唔會後侮～ 侍應哥哥叫我地自己㨂位坐，我地換左兩坐枱最後㨂左坐係門口旁邊，同時亦都係間餐廳既正中心。 叫左兩杯啤酒後，心諗餐牌係邊我好肚餓… 呢個時候個哥哥係廚房捧住兩大盤野出黎逐枱逐枱停低，原來呢度係人肉迴轉壽司咁既運作！！ 佢地會捧唔同款色既 tapas 出黎然後每枱停低比你㨂想食咩，有分大中細點（0,80€ ~ 1,50€ 一碟），好好玩！！ 佢仲會好公平咁一次由左邊開始，一次由右邊開始，一次由中間開始（即係我地有得㨂先）～ 係呢度食齊哂我想食既野，有炸辣椒、炸魷魚、燒雞翼、炸咸魚仔等等～

食飽之後我地就要行去球場去睇波～ 三十度行街真心唔好講笑，唔知幾耐無試過。。。 去到門口排隊排左三個字先買到飛，入到場後個球場景係唔錯，但係…. 超！大！風！ 唔係陣風，而係永無止境既強風吹到我差啲連眼都開唔到，有幾次吹沙入眼又或者比啲垃圾打中。 一開始我地㨂左山頂最高嗰行，但真係吹到頭暈，最後行左落下層… 但其實都無咩分別。 成場波就嬲到爆咁睇波，真心後悔走黎睇呢場波，好似自己攞苦黎辛咁。

對手又要係我唔知點解成日都見到既愛斯賓奴B隊， 上次係巴塞隆拿佢地無啦啦將場波推遲一個鐘破壞行程，今次呢啲爛天氣一定係佢地帶黎！！！主隊有一班小型核心球迷，佢地開波後半個鐘先出現，大約廿人左右，無咩特別點帶動氣氛，反而係主看台有啲細路帶得起大家一齊叫下球隊名咁。

等到球證吹雞完場，我地即刻衝走離場。 個球場好靚，但真心唔想留多一秒係度…. 返到去又係已經十二點～ 餘下落黎既一星期都係去沙灘玩下水咁，值得一提既係去左一個叫 Benidorm 既地，驟眼睇以為自己返左香港 ._. 嗰度係英國人既廉價渡假勝地，幾百蚊可以買到包機票住宿早晚餐既 package 咁，所以城市全部都係啲大炒大鬧既英國人….. 無咩必要真係唔洗再去。