23.10.2021 黑山足球甲組賽組 第 12 週 FK Budućnost Podgorica - FK Iskra Danilovgrad Stadion Pod Goricom 賽果： 4:1 (1:1) 入場人數： 1.200 門票： 2€ （坐位） 更多相片
有一日睇左幾篇講關於黑山既報導，然後就一路心掛掛想去一次。 睇下機票，睇下酒店，睇下租車，雖然無直航機，但就算連轉機都只係四個鐘內就可以到達，酒店唔貴，租車平到好似免費咁。 然後就卜左五日四夜既行程！
期待左一個月多啲，星期四朝早早起搭火車去機場。 法蘭克福無直航機，最抵玩係先搭一個鐘飛機去維也納，然後再搭一個鐘飛機去到黑山首都 Podgorica。 出發前一晚打風，好在我地出門時咁岩無雨，但差唔多起飛時又再起風，跑道關閉左半個鐘，我地班機一同 delay 半個鐘。 去到維也納要先過海關，因為我地要離開神根地區！！ 對上一次應該係 19 年去保加利亞… 差啲唔記得自己原來有 passport! 過關後就去另一個閘口等上機，再一次要經歷打風下既升降…. 過多一個鐘我地就到達黑山啦！
黑山機場好迷你，過海關連口罩都唔洗除就有新印入境。 拎行李前有人會 (hea) check 武肺疫苗證明。 一出到去就去 counter 拎車。 見到架車果陣笑左，無一邊係完整無缺！ 前後左右連車頂都有被撞過或者括過既痕跡，但其實咁樣仲好，唔會比人一眼睇出呢架係租車同我地係遊客。 Check 完車就出發去黑山南部沿海城市 Budva!
㨂 Budva 落腳係因為想冬天來臨之前可以落多一次水， 出發前日日睇天氣報告當地都有成 20 度，點知就係我地到步果幾日先黎陰天落雨。最後我地都係諗住睇天氣黎㨂去邊個球場睇波，本身已經要驚佢地啲賽期可以話改就改，而家又要擔心埋天氣，唔可以㨂啲無上蓋既球場。 本來星期五有場波可以睇，就係臨出發前先發現佢改左去星期六。 但星期六已經篤定要去首都睇波，最後由三場波變到只有一場波。
就咁睇地圖會見到 Podgorica 同 Budva 直線只有大約三十公里既距離，但呢個國家叫黑山係有原因的，就係周圍都係山！ 呢三十公里最後要沿住山路揸一個鐘車先可以完成。 有啲返左香港既感覺，見到盲彎諗住開慢啲既時候，後面有兩三架車即刻落速爬頭！ Budva 對我黎講有少少失望，最主要落唔到水同埋暑假季尾成個城市都好冷清。 但係去到郊外見到啲風景就即刻比大自然既美景震懾住。
星期六我地食完早餐就出發去 Podgorica 做下遊客先，同 Budva 相比係有返啲生氣，見到好多餐廳都坐滿哂人。 黑山雖然唔屬於歐盟又唔係神根地區，但當地用既係歐元。唔洗兌錢係幾方便既，但如果我地用卡比錢都係當外幣咁要比手續費。 當地生活水平唔算高，去餐廳同飯平德國大約兩成，但份量係德國既兩倍！ 如果中意食肉既一定要多啲去巴爾幹地區，求奇點個巴爾幹拼盤可以食足兩日！ 但要小心既係奶類製品，唔知點解越東既國家就越中意食羊奶製品。 我自己唔係好頂到陣羊酥味，有次點左一份牛肉配意粉既菜式，menu 無寫到會配芝士… 佢地竟然係碟意粉上面加左勁多芝士碎…. 有三隻色…. 我估係羊同山羊芝士 mix… 啲牛肉好好食，但一路食就有陣羊酥味攻入鼻… 心入面喊住咁食。。。
係市中心行行下開始有啲毛毛雨，見仲有兩三個鐘先開始，我地就早啲去一間手工啤酒餐廳食下午茶同試下當地既手工啤酒。 坐到咁上下就行去球場，我地決定必睇既呢場波係首都球隊 Buducnost Podgorica 對 Iskra Danilovgrad。 睇呢場頂級聯賽既比賽，入場費只需兩歐！ 個球場淨係睇外圍都已經有陣共產味，唔知點解佢地好中意用球員外面做舖頭同埋好似唔會幫外牆做維修保養咁..
入場時比完波飛佢，佢對住我地 up 左幾句野，原來要睇 check 我地係咪打左針或者有 negative test. 我地 show 德國個 App 比佢睇就放左我地入場。 場入面無小食亭，無熱食，只有一個阿婆賣花生同樽裝水。 本來我好擔心得返一張紙巾會唔夠抹啲座位，點知啲位全部都勁乾淨，連比人踩過既鞋印都無！！ 我地坐係主看台，球迷組織看台係我地既左邊。
今場波係第二同第三既對戰，但兩隊波無咩恩怨所以唔係好多人入場。 巴爾幹地區既球迷好奇怪，普通比賽可能得千幾二千人入場，但一去到重要賽事唔只可以全場爆滿，仲會全個球場既球迷都會一齊唱歌打氣。 雖然今場得千幾人，但總算可以見識下黑山球迷文化，聽下佢地既打氣歌都已經好滿足！
係德國，啲球迷通常大約係開波一個鐘前左右入場。 係日本見識過啲球迷係開波前一個鐘已經集合打氣到完場； 然後東歐係開波先入場掛旗同埋準備 choreo。 Buducnost 既球迷以前以看台上層為地盤，但近年入場人數不如理想所以佢地移落下層，等個氣勢唔會因為少左人而減弱左。
開波無耐，睇住龍門後既球迷看台越黎越多人，最後應該有百幾個球迷。 睇住佢地分派藍白膠袋，應該黎緊會舉起做 choreo。 佢地一路唱歌打氣一路準備呢個迷你 choreo，大家一齊舉起藍白膠袋同時放白煙。 佢地好似中意放到一半就將枝煙花 dum 落地等佢自己燒。 有啲保安諗住開閘入看台，但啲球迷即刻衝去鐵閘度擋住啲保安。 好快就連防暴警察都黎埋， 但十個防暴警察對過百名有備而來既球迷，你覺得邊個會贏？
返到球場上面，主隊開波十五分鐘就先領先一球。 客隊好快追返一球以為有場好波睇。 除左睇波同睇球迷，今場仲有雷電 show 睇。 話說我地擔心左幾日既暴雨，終於係我地坐係有上蓋既球場睇波時出現。 開左波一陣就見到個天係咁閃，好在我地係東歐… 佢地好似唔在意球員既生死安全，行雷閃電比賽都會繼續。 今次閃電閃到連球場既射燈都斷左電兩秒… 配上勁響既雷聲… 好擔心夜晚揸車行山路時會有危險….
最後係主隊射入第四球波時，場雨慢慢開始停… 我地留到最後離開球場。 沿住泥路去返架車再揸大約個半鐘車返酒店。就係咁，我地成功係黑山打卡！ 雖然最後只可以睇到一場波，但後來覺得多左時間去睇風景仲好。 下次如果有機會希望可以去黑山北部，好似話係北部行行一定要有有牌既導遊帶槍去帶路…