德國西南地區聯賽 第二十一週 SV Stuttgarter Kickers - SV Elversberg Waldau-Stadion 賽果：0:1 (0:0) 入場人數: 2.420 (作客球迷：40)
星期六 Elversberg 要作客到史特加對 Stuttgarter Kickers，有部份球迷應該都有聽過呢隊波，佢地今季由丙組降班到地區聯賽。今季三隊來自史特加既大球會都降班，但佢地既票價不減反增囉。
Stuttgarter Kickers 上季去到最尾兩週原本領先降班區六分，點知最尾果兩場都輸波，最後因為得失球差而要降班。呢隊波係德國球壇都算出名，奇連士文都係呢隊波青訓出身，仲為球會效力過幾年入過唔少波。有唔少球迷都覺得佢地個球場係其中一個必到之地，因為 Kickers 自 1905 年開始就沿用呢個球場直至而家。好多球隊都戰後因為球場被破壞所以要用新球場，但 Kickers 就用左呢個球場超過一百年！
Waldaustadion 位於 Stuttgart 市電視塔旁，主場球迷看台個景觀除左有球場草地外，仲要望到球場後面既電視塔，我真係完場後先留意到座塔。球場唔係特別大，除左主看台係有座位，其餘三個看台都係企位。近年球場正進行翻新工程，作客球迷區原本係位於主看台對面既有蓋看台，不過因為工程要搬到龍門後面。球迷主要打氣區原本其實有上蓋，但因為工程關係要暫時拆走。
球迷巴士朝早十點由 Elversberg 出發，今次終於無塞車，開波前一個鐘就到球場！因為上次作客史特加二隊完場後有球迷生事，所以今次場外有幾名警察幫我地睇路。入場後仲有幾位便衣想混入我地，但真係明眼人一睇就知佢地唔係球迷。球場好大風又好凍，唔知係咪因為天氣關係，班作客球迷無咩興致打氣咁。今場黎到 Stuttgart 既作客球迷只有大約 40 人，比上次作客 Nöttingen 只係多幾位。隊波又唔係踢得差，到底因咩原因球迷唔再跟球隊一齊作客支持球隊呢？就連來自球迷組織都得大約十人，但只有兩三位想落力打氣，鼓手連鼓都唔想打。佢地仲差啲鬧交咁濟（德國人平時講野既語氣都好勞氣），問點解大家唔想打氣。上半場中段開始終於有返啲氣氛。
主場球迷方面，佢地企滿左另一面龍門後面既看台，而出力打氣既大約有五十人，所以都幾大聲。但聽得出佢地係係有蓋看台睇開波，而家無左上蓋就唔識出聲打氣。一班球迷如果係一個有蓋既看台下打氣既話，大家唔洗好咆哮咁叫就已經可以靠回音成功做到一個好震撼既聲浪。相反，係無蓋看台打氣既球迷就要叫爆喉龍先可以有效果。Kickers 球迷雖然人多但聲浪唔大，對佢地黎講就係差咁個上蓋。下半場開始前佢地拉開三條大橫額，上面寫住：「16／17 賽季期間，總共有一場星期一賽事；六場星期二賽事；一場星期三賽事；一場星期四賽事；五場星期五賽事，離歐洲賽距離比漢堡更遠，但週中賽事比拜仁多」，投訴密密麻麻既賽程安排，佢地唔係有歐洲賽踢既球隊，但比有歐洲賽賽程既球隊仲多波踢！
成場波主隊其實踢得幾好，有好多埋門機會，客隊班球員係度發夢，前面又唔夠人跑。下半場換邊後主隊轉攻對面龍門，有起碼三球我地都以為入左，氣都嘆埋先知原來唔入！！！經過幾次大難不死後，班作客球迷終於肯開返聲打氣，而 Elv 就成功靠一個機會完場前幾分鐘係我地前面入波！！！唔係好識踢作客波既 Elv 最後靠一球險勝 Kickers… 同時 Saarbrücken 輸波失分，所以 Elv 係榜首又帶開多三分！！！完場後球員行去作客區向球迷致謝同逐一握手，大家開開心心返屋企！