德國盃第一圈 MSV Duisburg - FC Union Berlin Wedaustadion 賽果: 1:2 (1:1) 入場人數: 14,209
身為史浩克既球迷，一開始都唔想好想比 €25 去睇 Duisburg (德丙) ，不過今次我去睇既係 Union Berlin （德乙）！幾年前自己一個係柏林既時候，見到一堆著住波衫既人聚集，當時仲未知柏林有 Union 呢隊波，但又好好奇佢地波衫上既 logo 邊隊波，所以就係佢地後面跟佢地行。搭左幾個站電車，去到一個遠處見到有球場射燈既地方，行到入去一個小森林入面就聽到球場傳出黎既球迷歡呼聲。當時咁岩 Union 開始播會歌 Eisern Union，首歌一開始好 metal，第一次聽到咁熱血既會歌。但當我想去買飛既時候，發現已經全部售罄，只好打回頭路。到而家我都仲未有機會去多次柏林，而家我等緊一個時機係柏林幾大球會係同一星期都有主場賽時，等我可以去一星期就睇哂咁多隊波。
今次我地搭火車北上，一早整定午餐 (Cold pasta) 買定甜品係火車食。以為自己食到好飽，點知去到球場見到薯條只係 €2，就忍唔住買左一兜黎食。。。主場球迷整左一塊好大既 Choreo 覆蓋哂成個看台。 Union 既球迷就帶左好多紅色氣球黎 Fing, 好靚！！！ 
上半場我地坐係最出果兩個位，唔知做乜啲人好中意出出入入，讓位都讓到煩。同埋啲人好高，個頭又大，遮左我睇作客球迷既視線。下半場去左最近作客球迷果個 Block。主場球迷打氣打成點無咩興趣 >_> 開波前作客球迷舉起幾塊 Banner ，以為佢地想燃點 pyro，我地即刻準備相機！！！點知，原來佢地係玩野。佢地想玩啲警察，連我地都中埋計。
係德國球場入點然點任何煙火係違法既，但眾多球迷相信點 pyro 可以帶起氣氛，所以大家一路都仲見到唔少球賽有 pyro 既出現。所以係一啲大賽入面，安檢會特別嚴謹，入場前會搜哂你全身，連隨身物品都會比佢地睇。我試入要打開哂手袋入面既暗格，連化妝袋等等都要開比佢地睇。不過球迷總有佢地既辦法帶到佢地想帶既野入場既！球場入面其實有唔少高清閉路電視，高清到可以連對面看台食緊邊個牌子既煙都睇到（呢樣係其他球迷話我知，我無特別考究過），所以你見到 d ultras 著既衫褲幾乎都係黑衫牛仔褲，咁就無咁易比人認到。到看台上，如果啲組織係有打算點 pyro 既話，佢地會打開一塊大型 Banner，係 Banner 下面既球迷就會點起 pyro ，咁警察就睇唔到邊個打邊個啦～ （其實仲有好多 tricks 去騙過警察，不過以後有機會再講！）
所以我地一見到佢地打開 Banner，就以為會有 pyro ，點知只係一場空。下半場 Duisburg 追和要打加時，正呀，有多30分鐘睇！ Union 加時入多一球，最後 1:2 完場。Bye bye Duisburg! 睇埋作客球迷同啲球員慶祝就要去趕火車啦，如果唔係第二朝先返到去。