31.01.2026
德國足球乙組聯賽 第 20 週
1. FC Kaiserslautern - SV Elversberg
Fritz-Walter-Stadion
賽果：1:3 (1:1)
入場人數：49,179 (4600 名作客球迷)
門票：35,20€
又黎到自 2024 年起一季一度既上山之旅，每次行條長命斜都喊住話下季唔想再黎，求下隊波一係升班一係降班，可唔可以唔洗再黎作客。但今日喊住上山，最後笑住落山… 可以考慮下行多一季。。。
德乙既開波時間係一早定好哂（其他國內聯賽都係），好簡單：星期五兩場 18:30，星期六三場 13:00 同一場 20:30 精選賽事，星期日三場 13:30。星期六場夜波就會喺免費電視台直播，所以每個星期六晚我地都好固定有免費娛樂。升上德乙第一年我地表現唔算特別，無望過有機會上電視，另外自知主場太醜無吸引力，只有去作客大球隊先會有機會。上季去到季尾算係踢得幾好可以見下大場面但又繼續被無視。黎到 2026 年我地終於成為被選中既細路，地區大戰作客凱莎羅頓被安排喺星期六晚上演，又有新野可以寫入球隊大事記！之後我就喺公司周圍同人講，呢個星期六唔出街就 20:30 開電視 boost 下收視率，睇下我地呢隊鄉下隊～
對我地黎講又係一個新體驗，星期五開波試過提早收工或者早一日出發喺第二個城市 WFH，星期六日正常開波時間好彩就可以喺屋企食埋早餐先出發，唔係就去食麥當勞。 星期六夜波？ 我地瞓飽之後可以喺屋企食個 full breakfast， 午餐食件早一日焗好既蛋糕先再出門口。 Kaiserslautern 附近係美軍基地，所以當地有好多美式餐廳，今日我地訂咗位去食埋飯先上山。 餐廳內唔只我地兩個球迷，我估九成食客陣間都係會上山睇波，個個既話題都係圍繞足球～～
喺山腳泊低架車後就行上山，沿途已經見到好多燈柱被貼上黑白色既貼紙。過去兩場波都無期既感覺，今日終於會期待場波，甚至有種唔錯既預感。 我既理論係今季好多宿命都被打破，贏到未贏過既球隊，輸比未輸過既球隊；過去兩季上山都未贏過，第一次輸波，第二次和波，今日係時候刷新一個新紀錄！
球迷組織今日準備咗一個簡單既 choreo，喺看台前後拉起大字報： Elversberg steht für Heimat, Herz und Leidenschaft，意指 Elversberg 代表家鄉、心同熱誠。 今日無上次既巨型大海報，但混咗十幾支煙入場。 喺呢個球場放煙唔係大問題，但如果我入場內影相既話，只要作客區內一放煙就會比人捉走同迫我 del 相。 本來都諗住搏一搏起碼試下影幾張放煙前既相，但我地有相熟既主場球迷話今季啲場內保安會沒收張 SD Card，建議我地唔好搏。最後我地決定留喺看台，然後拜托對方既球隊攝記幫我地影靚相。 （上季都係多得佢幫我地影相，感謝佢既無私幫助～～～）
等到球員入場時，作客看台內點起咗近 20 枝煙，幫球隊起咗一個好靚既開頭！！！ 主隊就喺南看台同西看台每人派咗枝煙花，過萬枝煙花同時點起個場面都超靚！今日我地班球員嘗試用「旁門左道」黎幫自己贏波：㨂場唔㨂波，㨂向住作客看台攻先 （好似真係有用）。
上季我地第一次有超過四千人到場，今日再次賣出超過 4500 張作客看門，全村總動員黎到打氣。個個好希望球隊可以入隊或者領先幫手帶起看台內既氣氛。一開始看台內既組織完全 coordinate 唔到，分布喺前中後既三個鼓完全唔啱 beat，變到有二重奏既出現。 大約十分鐘後將啲鼓全部綁返去前面就好返好多，起碼啲打氣聲整齊返啲先！
場上面我地成功控制住場波既節奏，有必入球被 Kristof 守住，我地前線都仲係差少少，個個拎到波都轉唔到身起腳浪費唔少機會。 去到近完上半場前我地有個攻勢，睇住中堅 Rohr 喺龍門前企唔穩兩米飛機錯失機會。 呢個時候，被視為德國最公證最有說服力既球證 Deniz Aytekin 吹停場波話要等 VAR，最後去埋睇電視改判十二碼比我地！ 佢話對方喺禁區明顯拉衫侵犯 Rohr，比十二碼之餘仲直紅送走犯規既 Robinson！由 Petkov 操刀射入為我地領先，開心咗兩分鐘後 Rohr 入烏龍球幫對方追和。。。
凱莎羅頓主場既威力絕對唔可以輕視，佢地踢少一個反而會踢得勁落力可以扭轉局勢。不過佢地對住既係 SV Elversberg，下半場我地繼續控制住場波～半場時我話季中加盟既 Mokwa 真係麻麻地，轉頭佢就入波叫我收聲～～～ Schmahl 喺中線一個靚長存比喺左路 Petkov 再傳比 Mokwa 射入，一個簡單又流暢既組織，我就係想睇呢啲！！！！
完場前五分鐘，球迷最愛既 Schnellbacher 錦上添花射入第三球，當時我地唔知係邊個入波，但見到佢一入波就向住作客看台跑過黎就估到應該係佢。呢個時候主隊已經放棄打氣，佢地應該最唔想輸比我地。賽後同班球員慶祝一輪就慢慢離場，好多主場球迷投訴 Aytekin 係今場波既第十二人，但上半場佢地成隊齊齊整整既時候都唔見有咩埋門機會，最後全場無中過目標，入嗰球波仲要係我地自己入既。
啱啱史浩克作客波琴輸波，我地拎到呢三分就喺聯賽榜拉近距離只差一分。新一年黎到第三場終於贏到波，離 40 分既目標愈黎愈近，睇黎好快可以開啟新既目標。。。。
