24.01.2026
法國足球乙組聯賽 第 20 週
Stade de Reims - AS Saint Etienne
Stade Auguste-Delaune
賽果：1:0 （0:0）
入場人數： 16,186 （約 1500 名作客球迷）
門票：30€

上季季尾去唔成既行程，喺新一年終於可以成行。今個星期德乙場波被安排喺星期日上演，可以星期六先去法國一日遊。

平時由法蘭克福出發去 Saarland 需時大約個半鐘，由 Saarland 出發到 Reims 只需兩個鐘多啲，絕對唔遠，但又唔知點解一直都好少諗起去法國睇波。 一個鐘之內既行程都已經去得 7788。 唯一諗到去原因係法國高速公路係要比錢，呢兩個鐘既車程我地一程已經要 20€！

出發時沿路都係多雲大霧天陰，差唔多到目的地時藍天同太陽慢慢出現，氣溫仲上升到 11 度！！！ 我地先去市外既巨型超市買手信，Reims 位於著名既 Champagne 地區，即係香檳既出產地！！ 我自己唔太好香檳，但都買咗一枝返屋企，另加一堆麵包同零食。

法國有好多城市都唔比所有汽車自由出入，有啲可以比錢入城，有啲就只限市內居民等等。Reims 就係其一，我地架車唔可以入城之餘就連市外既公路都唔可以行。 好在剛好喺條河對面有一個新起既住宅區，入面有間開張幾個月既 Holiday Inn Express，可以免費低架車同埋離市中心只係十分鐘內既腳程。 更重要既係離球場好近，同樣都係十分鐘內就可以到達。

我地下午兩點左右 checkin 之後就入城曬住太陽去觀光，然後喺市中心搵間餐廳食飯。成日以為法國淨係得芝士同 Flammkuchen 食，入到餐廳先發現其實佢地有好多好野食！！！ 芝士焗洋蔥湯做前菜，然後有燒雞同燴牛肉。喺 Reims 完全顛覆我地對法國人既核板印象，個個都好友善同識講英文！佢地依然開口就一堆法文，但見到我地滿頭問號就即刻轉 channel 變英文。食到好飽先返酒店放低啲戰利品，再出發去球場。

好多人同我地一樣由城市方向行去球場，跟住啲紅衫就好易搵到路。 喺場外先經過安檢，經過作客看台同主看台後去到我地既閘口嘟飛入閘。 喺場內有好多用酒桶整既餐枱，上面印有 Reims 既舊 logo： 香檳加足球，靚過而家既簡單會章好多。個球場本身都無咩特別，四四方方咁同保留咗四枝幼長既舊射燈。喺市內過河時可以遠距離見到球場既位置。

入到看台時，啲球員仲熱緊身，好多作客球迷企咗喺我地個企度想親近自己既球員。客隊係法國聯賽冠軍紀錄保持者，今日有過千五人北上黎支持球隊。主隊都借住呢個機會搞咗個活動去吸引球迷入場，以售票情況去達成唔同活動，例如賣到五千張就比球員投票㨂球場射燈既顏色，賣夠唔知幾多張飛就搵兩隊既吉祥物去玩障礙賽、會安排放煙花、搵人黎喺球場頂行鋼線、賣哂就全場球迷可以獲得下場免費波飛。

開波前兩隻吉祥物喺球場中心玩完障礙賽之後，就推咗幾部機出黎喺宣讀陣容時放煙花，最後仲噴咗一陣紅煙黎開場。唔知係咪因為呢啲無聊活動令到主場球隊要倒掛橫額去抗議。一開始我仲以為主隊無球迷組織，原來佢地只係遲到同埋頭廿分鐘靜默抗議。 開波時客隊球迷搶盡鋒頭，其中一邊既球迷組織 Green Angels 放煙。法國球迷好得意，會好明顯咁分成幾派，有啲就各自打氣，有啲就會一齊打氣但各做各事。例如今日 Magic Fans 同 Green Angels 係會一齊唱歌，但放煙時就可以明顯見到係分開安排。

兩隊波都有機會爭升班，場上唔見邊隊有明顯優勢，只係覺得法國波真係唔好睇。兩邊都好似無策略咁9攻，個個球員都獨食唔會睇住隊友黎傳，又唔會走位，傳到波只係好彩。 半場時就有賣到萬五張飛既活動，球場頂行鋼線。 雖然呢件事同足球無關，但個特技人員真心超勁，由對面看台行到過黎，仲喺中間跳黎跳去。

下半場主隊食咗張紅牌踢少一個，以我地既食花生經驗黎睇，主隊會贏波。果然廿分鐘後佢地射入全場唯一入球！！！ 班作客球迷喺失球時完全無停過打氣直至完場，等到球員黎到時先開口大罵。有幾個核心成員去到看台前鬧班球員表示不滿，呢啲場面真係喺歐洲先會見到。 班球員唔想聽可以直接入更衣室避開球迷 （但後果可能仲衰），但佢地仍然會走到球迷面前接受指罵。當然有時啲球員會頂唔順鬧返轉頭，但更多時候班球員自己都覺得抵鬧，甚至會喺賽後訪問直指理解球迷既失落。

回程時啲紅色球迷個個開心地返屋企，路上超多警車同防暴戒備。法國對球迷既警力安排真心另一個 level。無諗過今程既一切都好正面，如果法國大部份地方啲人都係咁友善既話可以考慮黎多啲～