11.05.2024
德國足球乙組聯賽 第 33 週
1. FC Nürnberg - SV Elversberg
Max-Morlock-Stadion
賽果：3:0 (1:0)
入場人數： 34031 （約 600 名作客球迷）
門票：18€
更多相片

天朗氣清既五月天我地去到旅遊勝地紐倫堡，出戰今季最後一場作客賽事。

我地用 49€ 全國通用月票 Deutschland Ticket 搭慢車由屋企出發轉兩次車就到去到紐倫堡，點對點需時太約五個鐘，話長唔長話短唔短，但間唔中黎個火車之旅都係其中一個作客既浪漫！ 星期六一早我地仲早過平時返工出門口去搭 S Bahn 到火車站，由法蘭克福搭上頭班車搭兩個鐘去 Würzburg 然後轉車搭個半鐘去到終點。 呢兩班車都係每個鐘一班，好在我地通常都會預多一班車既時間以防萬一。。。

喺 Würzburg 開車之後本來個半鐘後就會到站，然後預大約十一點半到達球場。 點知架火車龜速行行下之後仲停埋！ 車長開咪話架車有啲問題，只可以低速行走，會盡佢可能帶我地去紐倫堡。車入面已經有唔少著住紅黑色波衫既球迷，個個都話慢行唔緊要，最緊要到達到目的地。。。 架車行下又急停左幾次，最後玩左半個鐘去到 Kitzingen 都係頂唔住要趕哂我地落車 T_T 下班車半個鐘後到但少一卡車，有啲人就索性搭回頭車然後返屋企揸車飛奔去球場，我地只可以衝去月台搵個頭位，勁擔心會上唔到車…. 如果錯過埋下一班車的話就可以同今日場波 say byebye. 好好彩車門停喺我地前面，再運用我曾經係北京學識既衝撞式上車方法成功上到車。

去到紐倫堡已經十二點鐘，仲有一個鐘就開波。本身我地係計劃跟大會指示搭 U-Bahn 去 Messe 再行去球場。 到站前我諗住睇下班次先發現搭 U Bahn 既話落車之後要行差唔多半個鐘先到球場。 另一個選擇係搭 S Bahn 去到 Frankenstadion 站，班次密好多同埋落車之後就算我地要兜大圈去作客區都可以十分鐘內到達。 我地去作客唔會著同印有同球隊有關既方物，所以我地可以混入主場球迷跟佢地一齊去球場。 最後成功係開波前廿分鐘入到場。。。

球迷大使好好人咁係門口接我，佢話呢度保安好輕鬆唔似 Elversberg 主場咁勁麻煩，佢帶我走入場邊行到去主場嗰邊既傳媒報名窗口比個龜背我，話有個龜背我就可以中意去邊都得，但建議我留返係作客區前就去，唔好去北看台。 雖然佢係大隻佬粗粗老老咁但真心 friendly～～ 但其實我好急尿忍左兩個鐘，但我要跑返百米返去作客區先可以用廁所！！！

由場邊入返作客區要經過兩道閘，呢兩道閘既保安又係好好人好有禮貌咁笑笑口開閘比我過！ 去完廁所啲球員都已經準備出場，好在仲趕得切睇北看台展開佢地準備左既 choreo 。 UN 今日號召球迷一齊由市中心巡遊到球場，然後要大家開波前廿分鐘就埋位參與 choreo 既展出用紅黑白海報係看台上層砌出：Glubb Familie （紐倫堡既外號德文係 Der Club，方言係 Glubb）然後係下層帶出今次既主題係守衛北看台既七大價值觀同原則： Treue 忠誠、Zusammenhalt 團結、Widerstandsfähigkeit 抵抗能力 、Vereinsidentität 球隊身份認同、Traditionsbewusstsein 對傳統價值觀既認知、Kreativität 創意、Freiheit 自由。 每隻大字下面都有金句簡潔有力咁解釋每隻次對北看台既意思紐倫堡係其中一隊追求平等既球隊，係球迷圈內有一個好重要既地位。 好多由球迷發起既議題同抗爭運動好多時都有紐倫堡既球迷去帶頭，而佢地既球迷同球隊又有好緊密既關係，一齊守護大家認同既文化同價值觀。

係歐洲球迷文化內除左有宿敵之外仲有盟友，係德國其中一個最出名既友誼就係史浩克同紐倫堡。如果你係其中一隊既球迷，好自然就會支持埋另一隊。 我去過史浩克多次都有見過少數會著紐倫堡有關既衣物去睇波，有一次我戴左條有深紅色既頸巾但同紐倫堡無關既都有史浩克球迷勁興奮咁走黎多謝我紐倫堡球迷黎入場支持 😀 而我上次亦係唯一一次去紐倫堡睇德甲係冬天，個個包到密哂都無留意到有咩特別，但今日係球場同市內周街都見到著藍白衣物甚至係史浩克波衫，個場面好和諧～～ 我估好地地唔會有外來人會住係 Gelsenkirchen，而紐倫堡呢個大城市就有好多來自各地既年輕人，當中包括唔少史浩克球迷就好自然會有多啲人當呢度係自屋企咁打橫行～ 史浩克今日同時有比賽所以無黎到助陣，但有來自來維也納既 Rapid！

係四枝射燈下等到球證吹雞就開波～ 趕頭趕命左大半個鐘終於可以喺開波後放慢返少少。。。紐倫堡主場以名宿 Max Morlock 命名，係一個可容納五萬人既八角形世界盃球場！ 場內有跑道所以看台同草皮相距有一段距離， 係看台上會唔知自己睇緊啲咩， 但條跑道反而好岩影相。 今日我地有超過六百人著住白衫到場，睇落氣勢唔錯！！！ 唔知點解北看台睇落氣勢好強，個個舉哂手咁但就算認真想聽佢地唱咩都係聽唔到。。。。

今場波唯一攻勢好似只係得個越位詐糊，對方連輸左幾場之後，今日要贏波拎多三分先可以確定護級成功，估唔到我地又再一次比啲狀態低迷既球隊大炒。 今次無論係場邊定看台上，除左個十二碼之外我都唔知球波係點入既，所以完全無損大家打氣既心情。 佢有佢贏，我有我輸，我地有我地繼續唱歌。 去到尾段我見反正都輸左三球追唔返，我都係走返落場影多幾張相留念好過。

我地隊波有位球員係來自紐倫堡青訓，係 2018 年由紐倫堡二隊加盟既 Manuel Feil。 上季季尾作客 Ingolstadt 佢有班鄉下朋友租架巴士一齊黎睇波支持佢， 佢話今場波對佢有好深既意義，會有打氣團入場，但唔知佢地係有 VIP 飛定點，唔見佢地係作客看台幫手充下人數！！？ 睇返資料佢地隊波第三年資最深既球員，加盟最耐既係後備門將 Lehmann， 2017 年加盟。 本來以為第二係 Feil，點知碌到有個由地區聯賽傷到上到德乙都仲傷緊既 Dragon，呢個名我永遠要讀幾次先讀得岩，次次會用英文讀左先，然後會叫佢德文既 Dragon 即係 Drache 但其實佢真係叫 Dragon。

完場後班球員好快就走過黎企喺作客看台前面，對住班仲係好興奮既球迷無奈拍手致謝。 呢幾年睇 SVE 應該係真係第一次輸波完全無感覺，只係隊波又點解可以無啦啦踢到成盤散沙咁？ 向好既方面諗： 可能有啲球探見我地隊波咁海鮮會放棄想收購我地既球員。

離場之後覺得過去嗰兩個鐘好似一陣風咁，無得好好咁感受下置身係 Max-Morlock-Stadion 既時間。 本來諗住係下層看台同屋頂影張相留個念都唔記得左！！！ 其中一條最先睇過同德國球迷有關既片就係法蘭克福作客紐倫堡，上層看台啲人跳到個看台搖下搖下，好似話自始之後就封左上層看台唔比作客球迷用 xD 好在我地下季會再黎作客，到時再影過！！！

回程前我地去左市中心食杯雪糕降下溫先再搭車返去，點知又再次遇上火車出事。剛去到法蘭克福之前架火車突然停電只可以慢慢碌去下一個站再搵人黎整 ._. 整完又要先比高鐵爬頭我地先可以再繼續，好在最後都仲趕得切返到屋企見證基爾升班上德甲，下季唔洗山長水遠去作客！～～