27.04.2024
德國足球乙組聯賽 第 31 週
SC Paderborn - SV Elversberg
Paderborn Stadion
賽果：3:1 (0:0)
入場人數： 12004 （200 名作客球迷）
門票：15,50€
更多相片

話就話拎到 40 分就可以護到級，但又有另一句話係未完場都唔好慶祝住… 計埋今場今季剩返四場波，我地既希望係護級成功之外仲希望可以提早確定護級然後安心睇波。 今日去作客只係比我地多三分既對手，以我地過去幾場既表現同埋上半季既戰果黎睇，我地係要坐和望贏的。。。。

星期六一早我地可以坐由莎蘭上黎既順風車北上，佢地預計本來八點鐘就黎到法蘭克福然後出發，但由法蘭克福去 Paderborn 只需要三個鐘既車程，即刻預十一點就去到球場。。。。 後來我地提議先去麥當勞食早餐，因為時隔三年佢地終於出返豬柳蛋漢堡！！！！！過去幾年佢地早餐得兩款包，煙肉蛋同炸雞，一見返有豬柳蛋就即刻好想去食。 要先去食早餐就代表要提早出發時間，最後七點去食早餐，七點半左右就上路，最後未到十一點就到左球場。

球外都有其他由莎蘭出發既球迷一早黎到企係門口食西北風… 今日天氣雖然話回暖到有 15 度，但仍然天陰大風，好在我地無比個預計溫度呃左都仲著夠衫～ 企左差唔多一個鐘等到球場終於開波就先入場。。。一年後我地又返來了～

上年黎係德丙對 Verl，同樣都係三四月左右既事，當時我地靠最後一分鐘十二碼追和… 今日重回唔知點解硬係覺得我地都係唔會有咩好運。 同上次黎既時候相比，球場內加建左上層看台，多左三行既座位 ._. 多左呢三行個球場即刻睇落無咁醜。 另外就係今日既對手係球場原本既使用者，曾經踢過德甲既 Paderborn，入場人數即刻正常返少少，最後有超過萬二人入場。 我地今日都只帶左二百人左右，對住一隊唔太吸引又遠既球隊，二百個作客球迷的確係少，但如果個個可以好似作客 Fürth 咁一齊投入既話都可以接受既～～

主場球迷係賽前忙住準備 Choreo，見到左右兩邊係綠色，然後上下係藍色咁，等到球員入場佢地終於揭曉 choreo 既主題～ 就係球迷既「日常」，四條友一齊揸車去睇波。 原來佢地今日慶祝球迷組織成立二十週年，唔知點解今季我地遇上咁多週年紀念？

上半場我地仲仍有一股興致出盡力打氣，附近既小朋友主場球迷間唔中都被吸引住要望下作客看台。 而對面主隊既看台就算係我地靜落黎既時候都唔係聽到佢地既聲音。 我地當然無咩資格話人地人少無聲，但單純將佢地同其他中小型球隊相比， SCP 既氣勢真係麻麻地咋喎。 同樣踢過一兩季既 Fürth 無論視覺同聲勢都好過佢地好多！下半場我地先搏到個十二碼射入領先，但好快又送左個十二碼比對方追和。

比人追和之後班球員個個漏哂氣咁好似變左第二隊波，主隊反而食住個勢連入多兩球反勝。 最後嗰十分鐘我地要互相提醒大家贏輸我地都要繼續打氣，唱到球員又再次一面尷尬咁走過黎拍下手多謝大家花五個鐘車程黎睇佢地踢屎波。 有時真係唔明同一班球員既表現可以相差咁遠，對住聖保利踢到識飛，今日上半場都好地地，下半場踢到完全唔夠班咁？？ 對住同一隊波我地主場炒佢地四比一，幾個月後輸返轉頭又係咩原因？？

而家得返三場咋，話難唔難話易唔易，可唔可以盡早拎多三分等大家可以輕鬆完季？？