10.03.2024 德國足球乙組聯賽 第 25 週 SpVgg Fürth - SV Elversberg Sportpark Ronhof 賽果：1:4 (0:1) 入場人數：11651 （200 名作客球迷） 門票： 14,5€ 入場人數
上星期係主場慘敗之後唔敢對呢個星期有啲咩期望。 對方既近況一般，但排名高過我地又岩岩先係主場贏左打比戰士氣大增；相反我地又開始進入懷疑自己既狀態，其他要爭分護級既球隊又同時失分，唔敢希望自己可以係呢個比賽週得益！
但又因為今個星期因為工事而心情麻麻地，同時又好想快啲到星期日可以搭火車遠行睇波忘記下煩心事～ 無論贏輸起碼可以有九十分鐘做啲自己中意既事～～ 星期日一早就由法蘭克福搭地區火車出發，中間要係 Würzburg 轉一次車，計埋由屋企出發嗰程就總共要五個鐘轉兩次車先到達目的地。 踏入三月既日照時間開始變長，心情都無再好似冬天嗰陣咁 emo ，呢五個鐘過得好舒服～ 係最後嗰程車有三個中年男人坐係我地前面，一開始聽佢地講足球話題就估緊佢地係咪主隊球迷去睇波，點知其中一個人開始話： 上年佢地最後嗰場主場我有去睇見證佢地升班呀，自己就開始有留意佢地，仲成立左個法蘭克福地區非官方球迷會～ 你地有興趣都可以加入架～ 隊波呢來自一條叫 Elversberg 既村～ 人口得七千人左右架咋～ 正式名叫 Spiesen-Elversberg，連埋 Spiesen 條村都係得萬三人左右，呢隊鄉下隊既足球水準唔錯架～ ～～我地就一路八卦一路沾沾自喜咁聽個阿叔點樣遊說佢兩個朋友一齊多啲去睇波， 程車過得好快！
落車後本來我地諗住跟啲綠衫人搭巴士去球場，但見天氣唔錯就改變主意行大約半個鐘去球場。 呢個球場我地幾年前黎過，我記得個球場位於住宅區，但係我腦海既印象只係浮現出弗賴堡球場附近既住宅區，對 Fürth 完全無哂印象。 場內我又記得好清楚喎，當時我地坐係場邊第一行就係為左可以睇作客球迷。 今日竟然係我地黎到作客。。。。 雖然只係 Fürth 但都仍然令我有嗰種「我地踢緊德乙！！！」既突然醒覺。
武肺之後好多球隊都唔再即場售票，今日難得可以係門口買飛入場終於可以有張飛留念。 Scheiss print@home! 球迷大使亦都幫我申請左工作證可以係球場內自由走動，係開波我就去左上次黎睇波附近既位置搵個吉位坐低～
今日有大約二百人黎到一齊作客，我地盡量集中大家企係大旗既後面，視覺上好睇啲之餘又可以令聲量集中啲，又可以借助呢個鐵皮球場既迴音令我地既聲量再升幾個呢！ 我身邊既主場球迷有幾下都比作客區既打氣聲吸引到要望下！！～ 主場球迷係球員入場時展現一個簡單既綠白色 choreo，佢地應該仲沉醉緊係上場主場擊敗紐倫堡既滋味。 開波大約半個鐘我地就射入上半場唯一一個入球領先，之後我就淨係聽到作客區既打氣聲。 今日大家都出奇地有動力一齊打氣，雖然有唔少人分散咁企係看台唔同地方，但絕大部分都有一齊拍下打下節奏咁，班核心成員又無啦啦好落力唱一首勁簡單既歌連 mosh pit 咁，仲以為我地已經贏左波？？
下半場對方有球員兩黃一紅踢少個～ 諗住我地可以食住個勢入多幾球。點知去到六十分鐘出現左我一直最怕既場景。 有時我都唔明自己啲球員哪來的信心，成日係後場差波差到落底線（自己條底線），我淨係覺得佢地係度玩命。 每次見到人地後防或者門將既失誤我都會講句：總有一日會出現係我地身上。 今日終於出現了。 一個係小禁區角落開龍門球傳比龍門 Kristof， Kristof 兩下假腳之後想回傳，點知送左個波落對方黎逼既前鋒腳下反彈入網。 主場球迷個個好開心咁慶祝，我地一頭問號完全唔敢相信自己對眼！！！！ 無話可說到只可以用眼神同人溝通： 我既預言應驗了。
Kristof 係對面龍門抱頭，有幾個球員走去安慰佢。 我地都無咩好做，唯有繼續打氣。 對方突然越踢越有勁多攻勢，同時我地有幾個機會都把握唔到，我開始遊說自己要做最懷既打算…. 十分鐘後有一個埋門機會， Stock 睇定黎食比人護空門擋出，另一個補射又被救，最後 Stock 再補多腳勁射破網，再次領先！！再過多十分鐘佢戴帽射入第三球！！完場前今季新加盟既 Martinovic 埋齋，贏 1：4！ 最好笑係唔知點解最後嗰兩球佢地入完波班球員無人慶祝，以為吹左詐糊定唔知點，看台上個個呆左幾秒先敢真係慶祝。
好多主場球迷係未完場就已經走人，等到球證吹雞成個球場得返我地既慶祝聲音咁。等到班球員過黎，我地唱左幾句之後就一齊大叫 Nicolas Kristof – 本來佢係度發緊夢，啲隊友就推佢出黎獨自面對我地，佢笑住咁做手勢除帽同抹額頭既汗曬冧～ 我既惡夢雖然應驗左但好在最後有個美好既結局，大家可以拎呢球 Kacktor 黎笑，而唔係成為眾矢之的既失誤。
最後大家都可以笑住咁離場，今場雖然得二百人左右黎作客，但個個都有參與打氣。同早兩星期對漢堡相比，大部份都係遊客球迷黎食花生，今日真係好玩好多同埋難忘好多！！拎左呢三分之後我地有 35 分，同排第三升班附加賽席位只係相差六分，同尾三降班附加賽席位相差十分。 升班之路好似近過降班之路？ xD 黎緊淨返十場賽事，每一分都對護級好重要，目標係要拎到關鍵四十分！
球會拍得左賽後大家慶祝既場面，有興趣可以睇下感受下～～