25.02.2024 德國足球乙組聯賽 第 23 週 Hamburger SV - SV Elversberg Volksparkstadion 賽果：1:0 (0:0) 入場人數： 54190（550 名作客球迷） 門票：19€ 更多相片
大約四個月前我地係主場奇蹟擊敗當時開季全勝既漢堡，黎到二月終於輪到我地去作客。賽前漢堡已經兩場不勝然後領隊被炒，我地就近三場不敗令到漢堡球迷好驚又要對住鄉下隊輸波比人恥笑。 我地就同一眾來自莎蘭既球迷一樣對呢場波無咩期望，有三分就最好，但和波輸波都唔太重要，重要既係我可以黎到漢堡既 Volksparkstadion 作客！
上年我地已經去過史浩克同柏林作客時係有種同樣既奇妙感覺。 但我地自己就因為唔同原因去過睇波而無左一樣開箱感，今次終於可以同大家一齊第一次去一個球場度作客，一齊係心入面嘩嘩聲，個感覺真係完全唔同！！十三年前我曾經去過漢堡一次，但當時因為比人偷左電話而喊住咁走，自始對呢個地方無好感同埋已經將所有記憶抹走左唔想諗起啲傷心事，今次重回舊地對呢個地方完全無印象，當自己第一次黎就算。 今季因為作客 Kiel 同 Rostock 已經經過漢堡兩次，兩次回桯既時候都覺得時間好難捱，四個鐘左右既車程好似搭左六個鐘咁，睇下機票見到每人只係貴三十歐左右最後決定比多少少買返時間返黎。星期五晚八點左右係漢堡落機，星期六朝早做左陣遊客同睇左場地區波，夜晚班男人去左 Reeperbahn 玩，我就約左朋友去 Hafencity 打邊爐，星期日比賽日，個個玩到凌晨先返去懵下懵下咁完全無精神～
我地跟 HSV 提供既作客指南搭 S1 去到 Othmarschen 站轉搭穿梭巴士去球場， 落車後我地係附近等其他人黎到就一齊入閘。 今日同作客 Düsseldorf 一樣主隊唔會比 pass 我去影相，但如果有需要就可以聯絡佢地既球迷大使，會特別安排帶我係開波頭十分鐘入場邊影相。 呢度個球迷區位於角球旗後既角落頭，我地通常唔會將大旗掛係圍欄外，由底影上去既角度同效果都麻麻地，所以我唔係好想要同人地溝通然後入內場… 最大問題係出入內場要行大約五花鐘，我既經歷係每次我睇唔到場波既時間都係會失波….. 總之就十萬個唔想。
好在比我發現左個 bug. 就係由於我地係賣左 550 張作客飛，又只係無咩殺傷力既作客球迷 （我地帶住啲物資入場做安檢之後，啲保安都半認真講笑話：好～收工！） 個作客看台係要有作客門票先可以入場，看台內係有廁所，但如果要買野飲既話係要離開作客看台。 係圍欄外係可以自由咁係球場繞場一週。 逃離左作客看台之後我就向住主看台方向行，搵一個可以望到作客看台既靚位。 聰明如我拎左部電話出黎睇下佢地個網仲有邊度有位，比我搵到主看台上層既山頂有幾行仲係吉既！！ 咁我就走左上上層 4C 區域最後嗰行～ 後來係我附近都有好多聰明人走左過黎坐，雖然係要行山，但個景觀真心 perfect。 個景仲正過史浩克山頂無嗰幾條鐵通會擋住其他看台（望草皮個景都係靚既，但我要睇球迷嘛。）上半場我就坐係山頂以遊客身份好好咁享受場波，同埋以作客球迷既身份係內心尖叫，我終於黎到啦！！！ 係電視睇左咁多場漢堡主場波講左好多次「我地黎緊會去呢度作客」，講左幾個月終於如願。 係漢堡既北看台既打氣聲下間唔中聽到由作客看台既微弱聲線個感覺好唔真實。
北看台今日準備左個 choreo 反警察，簡單有力！ 佢地唔係無啦啦特登準備呢個 choreo，而係上星期作客時比警察留難，警方動員 400 人去查超過 800 個漢堡球迷，話懷疑佢地係同上年係火車站球迷衝突有關，而當中絕大多數都係無辜既。 警察果然係球迷永遠既敵人！
今個比賽週暫時都唔會再有掟網球之類對 DFL 既抗議，因為投資者計劃早幾日正式宣布失敗已收皮～ 剛過去既星期一有德國電視台係黃金時段既政論節目度去討論投資者計劃，嘉賓有犯眾憎既漢諾威主席 Martin Kind，仲有退休球員、球迷組織既發言人、足球雜誌記者等等去探討呢個計劃既利弊。 當中最令人注目既當然係 Kind，佢當然話呢個計劃好好，可以帶黎資金之類，到佢被多次問到到底有無依球迷意願去投票問左幾次都唔肯答，球迷嗰方就好單刀直接咁指出 Kind 就係活生生既例子證明投資者對德國足球會帶來咩傷害，簡單黎講：黑箱作業。 無論最後呢個計劃通過定失敗都好，大家都可以有佢地自己既原因去支持同反對，但首先係要知道成個因果。
我地將個節目放左入球迷谷度同大家分享自己既睇法，因為呢兩年好多都係因球隊既佳績先開始睇波既新球迷，好多可能只係係電視見到「啲球迷又向球場掟網波搞到場波要 delay 半個鐘」，「啲球迷又搞事啦」，但佢地唔知大家一直以來係為咩而爭持，唔知大家係為左保護德國足球既價值，唔想足球成為商業化下既犧牲品。有人以為引左投資者會令球隊得益，但佢地唔知既係得益者只係德足聯而唔係我地呢啲小球隊，而最後反而失去本來我地擁有既話事權。我地希望大家可以首先對呢方面既題目了解多啲先，而呢個節目正正有哂正反雙方堅持既地方… 有唔少球迷有一齊參與討論，有人直情話本來係支持呢個計劃，睇完個節目之後再睇多啲相關資訊而轉呔，好感動！點知唔夠兩日德足聯走出黎話計劃失敗，super~ 大家唔洗再拗～ 搞到我地失去左一個教育下新球迷既機會 xD
今季我地好好彩一場週中比賽都無，德乙果然係德國最好既聯賽～～ 上個星期既總入場球迷人數仲多過德甲，係德甲成立以來既第一次。 啲人話咁最大嗰幾隊咁岩作客姐… 咁唔通五十年來第一次係咁咩？ 明明就係呢幾年德乙吸引好多，唔似德甲得返啲膠隊。 我地鄉下隊靜靜地係旁邊痴下光～
今日漢堡有新領隊上任，係科隆前領隊 Baumgart，個個既目光都係哂佢身上睇佢會點樣應付升班馬？ 上半場我係上帝角度睇場波真心覺得我地踢得好好多，有幾次有威脅既攻勢但就差埋門一腳；係中場同身型輸蝕左啲，但如果好好把握到對方後防發夢甩碌既話我地應該可以領先… 下半場我入返去作客看台享受下德乙作客球迷既角度，開波幾分鐘就被對手窄角近柱射入，而呢個就係全場唯一入球。 打後時間主隊進取左好多，我地只失一球算係好彩。作客看台內既氣氛只係一般，班核心成員尋晚玩到天光再加區內好多遊客球迷。人地通常係作客好玩過主場，但我地就正正相反！
主場球迷亦都不太滿意自己既表意，我坐係山頂時候覺得佢地有幾下係好震撼，但同史浩克相比既話就差咁啲。開波前佢地有人黎我地看台前派球迷自制既場刊，入面都有講及北看台內既各種問題，但佢地既問題太高級，講緊係要點可以改善管理幾百甚至係幾千人，但我地連一百人都未有就已經搞唔掂。 點都好，多謝佢地黎派場刊等我地可以學下野。 完場後等球員黎交流左一陣就各自散水～ 領隊 Steffen 都走左黎看台閘前黎同班球迷傾左一陣計，個個都仲係好正面咁叫佢加油，下場再黎過！
離場後我地同其他人將啲物資送到去安全地方，沿路有騎警係我地後面護住我地。今日主隊贏波都唔會有咩事發生～ 然後我地就行返去穿梭巴士站度搭車走，係車入面有個後生仔送左幾張貼紙比個小朋友，個小朋友超開心咁係咁講多謝，然後同阿爺分享話佢地貼紙落爸爸架車度 xD 去酒店拎埋行李就去機場。 係機場內見到幾個 SVE 球迷覺得好奇妙，有兩家一齊黎漢堡玩一個星期順便睇波，要多謝球隊比原因同動力佢地出城 xD