17.12.2023 德國足球乙組聯賽 第 17 週 Karlsruher SC - SV Elversberg Wildparkstadion 賽果：3:2 (2:1) 入場人數：23,654 （約 1300 名作客球迷） 門票：17,5€ 更多相片
上星期踢完今年最後一場主場賽事，今個星期就係今年最後一場作客同最後一場波，然後乙組就會進入歇冬期。 連輸左兩場之後大家都好希望可以拎三分做個總結，開開心心咁去過聖誕同新年，可惜…
本週作客距離最近既就係我地呢場波，由 Elversberg 拉條直線去 Karlsruhe 既話只有 110 公里左右！ 咁近距離既比賽通常都好容易吸引到好多人一齊去睇波；賽前預售嗰陣就已經賣左超過一千張飛！球迷組織見上次去 Wiesbaden 既火車秋季旅行搞得咁成功，今次又再呼籲大家一齊搭火車南下，最後有近 150 名球迷一齊搭車！ 不過 KA 既火車站同球場相隔兩公里，當地又無意安排穿梭巴士去球場，最後大家到站後要行大約半個鐘去球場，沿途經過城堡同城堡花園走馬看花一下。
我地本來都諗住搭火車南下，不過去到最後睇班次嗰陣發現由屋企出發要差唔多三個鐘，揸車的話只需一半時間，我地又知球場附近邊度有得免費泊車（作客停車場要成 10€！），最後都係㨂左揸車落去算，可以十點鐘先出發，然後十一點半左右就係大學泊低架車，路程唔洗十分鐘就到達作客看台入口。
KSC 既主場 Wildparkstadion 今季季前先完成改建工程，第一場波仲請黎利物浦做開幕戰！ 球場本來係一個典型既運動場，兩邊龍門後既看台都係彎型看台，主場球迷集中係主看台對面既角落頭，作客看台位於龍門旁邊。改建後班主場球迷終於可以擁有整個位於龍門後面既看台，又因為移除左條跑道拉近球迷同草皮之間既距離。 作客區仍然係角球旗後面，只係由西變東 。最可惜既個球場由原本算係有特色變成而家只係一個普普通通既四方盒。
今日有七架巴士由莎蘭出發，另加勁多架私家車！ 球場未開門之前已經泊滿左作客區外既停車場，遲黎既就要去遠少少既地方泊車 ._. 搭火車黎既就係開波前一個鐘左右到達，一部份人要帶住打氣物資經過特別安檢。 今日我地帶左兩碌大字報入場，班保安一開始話可以燒著好危險唔可以入場，勁on9，雙方討論左一陣終於肯放人入場。 係屋企出發嗰陣勁大霧，但越近 KA 個天就越清，係藍天大太陽咁曬落黎！ 入場後就見到個太陽正正曬住成個作客區可以吸收下維他命D! 望去對面南看台見到佢地準備一個超大型既 choreo 。
話說今個星期初德足聯宣布投資者計劃取得 2/3 贊成票通過，當中仍然有啲爭議，例如漢諾威既會員內部投票係決定左取不贊成，點知係唔同消息來源數返邊隊投左不贊成之後發現漢諾威犯眾憎死唔斷氣既主席無視會員投票決定暗地裡投左贊成票。 而 SVE 同 KSC 都係投左贊成既，球會睇到收入大增可以幫補擴建球場用左既錢又可以買好啲既球員。 ok, 理解亦都唔理解。 各大球迷組織號召大家一齊今個比賽週一齊係開波後頭 12 分鐘唔打氣，製造一個圖書館氣氛，向呢個投資者計劃以第十二人之名去抗議。
賽前幾日有 KA 既球迷組織成員聯絡我地會係下半場先開始抗議， 原來佢地一早就準備左係呢度慶祝其中一個組織既廿週年紀念。 我地亦都配合佢地下半場先高舉大字報同沉默抗議，因為呢個行動要場內兩方球迷一齊進行先可以做到圖書館效果！
開波前大約十分鐘我就走落看台底叫保安開閘比我入去，以為自己已經預早左，點知落到去發現南看台已經拉起左覆蓋整個看台既巨型海報，我即刻狂奔去搵個可以影到兩邊既靚位。 佢地以希臘神話奧德條斯（Odysseus）借喻佢地既球迷組織 Armata Fidelis 係過去廿年點樣帶領大家走過高低潮。等到球員入場後，佢地就收起塊海報然後每人各自舉起藍白紙，係看台中間拉出球隊同球迷組織既 logo！ 唯一美中不足係佢地竟然無放煙！
係我仲未影夠相既時候，主隊就已經入左一球。。。 我就趁可以擰轉頭既機會走返入看台，上到去看台頂度睇上半場，唔夠十分鐘對方又入多一粒，嗚 到底隊波咩事？ 班後防完全失哂位又成日走甩人，完全係輸自己！ 失左呢兩球之後班球員好似反而醒神左少少，開始有返啲組織同多左起腳，最後成功係上半場追返一粒～
下半場一開波對面就掛起今次抗議既口號，而我地就無跟大隊，寫左我地自己一啲心聲，大意係指細球會根本就無選擇， 只有贊成或者財困兩條路。呢個計劃可以有錢賺，但最後只會損害足球。 係呢十二分鐘之間，有啲唔知咩事既人係度帶頭叫球會名，有少部份人和應，然後又有人叫佢地收聲咁炒鬧左一陣。 呢個時候主隊射入第三球，慶祝完又繼續一齊靜默。
呢十二分鐘完結後，大家一齊大叫 SCHEISS DFL！主場球迷仲有另一塊大字報去抗議球隊投贊成票： 我地既球隊應以「家」為本，而唔係走去搵海外市場！ 然後各自各繼續為球隊打氣。十分鐘後我地又再追返一球，燃點返我地既少少既希望。 有一球中柱我明明見到個波入左網，到而家都唔知點解會口變左中柱 cryyyy
好可惜大家又未能帶住三分離場，但今日既氣氛可以話係我睇咁多場作客波最好既一場，唔知點解個個勁出力咁唱歌打氣，我企係看台頂既時候真係聽到有部份時間個個都一齊唱歌，有大聲有細聲，見到咁多人一齊為自己鄉下出力真係好正！！球證一吹完場雞班球員隨即走到看台前多謝到場支持既球迷。 好在大家仍然十分正面，大佬我地係三隊升班馬中表現最好，第一次踢德乙可以有 24 分黎到季中排第九，邊個會諗到係下遊掙扎緊既竟然唔係我地？
完場後我地行去聖誕市集食啲野就返屋企，有啲開心今年既賽事終於告一段落，週末終於可以毒係屋企清下啲千年 to do list 同埋煮啲要花時間既野食或者焗下餅咁！！ 2023 年 SVE 成為德丙同地區盃賽雙冠王，可以同隊波一齊係德乙遊走德國見識下世面，一個好忙碌好攰好玩好充實既一年！一個月後我地再重新出發，希望來年會更好～！