10.12.2023
德國足球乙組聯賽 第 16 週
SV Elversberg - 1.FC Nürnberg
Waldstadion an der Kaiserlinde
賽果: 0:1 (0:0)
入場人數: 8.150 (2.100 名作客球迷)
門票: 季票
更多相片

眨下眼就已經黎到今年最後一場主場賽事，黎作客既係升降德甲乙最多次既紐倫堡 （點解唔係我地去作客可以順便去聖誕市集！！！）

今個星期又係被安排係星期日作賽，大家就係賽前一晚搞左個派對仔預早慶祝聖誕。 個個玩到凌晨盡興先返屋企，第二朝十一點半又要係球場外集合，一個二個懵下懵下咁出現，完全唔似陣間可以有力打氣！

經歷完上星期冰天雪地之後，呢個週末氣溫開始回暖到差唔多十度！ 即刻唔洗著咁厚，只需要著件擋到風既大褸就搞掂～ 加上球迷組織今日開始發售新款衛衣，我對灰色衫無咩興趣，但要手 keep 住件衫就著左上身，個感覺好似去左睇冰球咁裝波衫著係外面勁大舊！

紐倫堡既球迷組織 UN 係開波前一個鐘多啲就已經入左場，印象中好似係第一隊波咁準時入場？ 佢地準備左一個簡單既紅黑旗海 choreo, 要預先係兩個看台上面派旗。 同時又要係作客看台前既黑牆掛起一塊超巨型橫旗，又係好簡單紅黑白既球隊全名 1. FUSSBALLCLUB NÜRNBERG。

季初臨時搭建既 Block B 已經係早兩星期拆左，準備歇冬期一開始擴建工程。 主看台對面突然光禿禿咁，淨係見到球場後面既樹海。 無左 Block B 代表容納人數少左二千人左右，令到啲波飛好快就售罄！

上半場雙方互有攻守咁，兩邊都差少少運先入到波！ 上星期兩隊波都被對手入五球場，但紐倫堡已經連輸幾場，我地好應該要趁佢地病攞佢命。下半場有幾下有威脅既攻勢幫 Block C 帶起左氣氛，可借最後比對面個日本球員一箭收我地皮。

完場後班球員同上年一樣拉住「多謝你地既支持」 繞場一圈，而大家有啲似上次輸比聖保利咁完場後繼續唱歌鼓勵班球員，下場作客贏返返黎！

另外一提既係近期熱話：投資者。 大部份既球迷組織一早公開表明佢地反對引入投資者。 第一輪投票因為未有2/3 贊成票所以未能通過，然後足總修改下份建議書又再推出黎要球隊投票。 班作客球迷今日都有高舉大字報反引入投資者計劃，同時向球場擲廁線短暫騷擾場波，然後大叫 Fussballmafia DFB！ 我個人就當然同樣反對，呢道門一開左就返唔到轉頭。引入投資者只係為左錢，完全無由球迷角度出發 。又或者有既，但只係見到所謂同隊波無咩關係既海外球迷，但每個星期花錢花時間入場既球迷只係少數人唔洗理架。

SVE 同我地講會投贊成票，原因就當然係錢。 今季花左好多錢去擴建球場，如果投資者計劃通過既話，球隊收入會由原本既八十萬變成七百萬。 如果唔通過既話，足總只係係球隊身上搵錢去發展佢地既海外宣傳計劃，我明啲商人諗乜，但隊波有錢又關我地咩事？ 好可惜寫呢篇後記既時候已經通過左投票… 下星期唔知會有咩事發生呢？