10.11.2023 德國足球乙組聯賽 第 13 週 FC Schalke 04 - SV Elversberg Arena AufSchalke 賽果：1:2 (1:2) 入場人數： 61,110 （1500 名作客球迷） 門票： 16,50€ 更多相片
Schalke and Elversberg? 正常黎講呢兩隊波係無人會放埋一齊黎講，正常黎講應該只會係盃賽先有機會碰面，就算碰面都係要人地身長水遠黎鄉下地方，我地唔會有機會出城。由上季季尾講到而家，我地終於正式以作客球迷身份 auf Schalke!!!!!!!!!!!!!!
兩年前武肺期間，史浩克都降過班落乙組，當時反正無得入球場，其他人既恥笑力度都低啲。 當年我地跟朋友 Sandhausen 去過作客，個球迷雖然都坐得幾滿下，但因為要實名登記入場所以北看台同成個球場都變成圖書館。 嗰陣我地都只係諗住湊下熱鬧幫朋友撐下場，但心入面其實係以史浩克球迷既心情入場係作客看台入面暗地慶祝。
而今場波… 我以一個真作客球迷身份入場，同史浩克既情意結要暫時放埋一邊。 反正一季有咁多場波，輸兩場都無咩所謂，仲有另外兩隊升班馬你可以去劏佢地～～ 呢幾個月係星期六晚睇免費電視正播德乙有時會突然醒覺我地係踢同一個聯賽，見到漢堡、柏林、史克浩等等既大球場都會講： You know what? 我地今季會去呢度作客！ 講左咁耐，我地終於黎到要出發去 Gelsenkirchen 既週末。
出發前一晚唔知點解緊張到訓唔著，然後發夢淨係夢到場波…. 講真，大家都話和波都會收貨，但就係莫名咁好驚會輸波。雖然對方係 mighty 史浩克，場內既球迷一人噴幾啖煙就可以焗死我地，但事實上，睇返聯賽榜既排名同兩隊波既近況，我地對住史浩克係唔應該輸波。 內心好掙扎咁到底應該大口氣啲定以平常心去期待呢個週末。
星期五一早要返去公司開會，一開始同大家講明我準時十二點要走，最後大家好有效率咁十一點九就搞掂。 我即刻奔返屋企放低電腦去個廁所，換返對鞋十二點半左右就向西出發。 正常黎講由法蘭克福去 Rhurpott 地區只需大約三個鐘，但因為各種工程連繁忙時間我地預左四個鐘，想趕及可以係兩個鐘前去到球場可以免費泊車。 最後塞車總共塞左大約九個鐘，好在仍然趕到四點三左右就去到球場。係莎蘭總期有十一架巴士出發，球迷組織既巴士十一點就出發，其他球迷巴士就十二點半出發。 佢地最後僅僅趕及開波前入場！！！
每次去北威州既記憶都係永無止境既修路工程同塞車，呢度每個城市同小鎮都住滿哂人，人多車多，開 google maps 睇啲路全部唔同顏色… 最後成功去到 Gelsenkirchen 真心係車入面拍手掌慶祝。 呢個城市同史浩克已經去過好多次所以都無咩好講，唯一想提下既係早幾日睇新聞講德國人既購買力，購買力最高既地區係巴伐利亞南部一個鎮仔，而最低係… Gelsenkirchen！ 好快連德乙排名最低都係佢地。。。。
由法蘭克福出發嗰陣雖然多雲，但間唔中都仲有藍天可以曬下太陽。一入到北威州個天就灰哂，去到魯爾區仲落超大雨！ 由於球場係開波前兩個鐘先開門，我地係架車入面坐多十分鐘先行去作客區既入口，穿過作客球迷專用既隧道就去到 Block V 同 Block W. 好多人都係今年先開始有跟過 SVE 去作客，今日有成 1500 個球迷隨隊，好多都係慕史浩克之名而來。 上季作客 Mannheim 已經有好多人一入場就嘩一聲，今日同樣好多人一踏入看台第一時間拎部電話出黎影相記低呢個歷史時刻！
因為連日大雨，AufSchalke Arena 為左保護草皮而關閉看台上蓋， 但問題係啲二手煙焗哂係球場入面，離場後我連手指甲都係煙味超嘔心！！！ 史浩克係賽前有兩首歌一定會播，首先會播礦工之歌 Steigerlied，今日呢場夜晚波佢地可以熄燈去營造礦場既氣氛，而呢首歌對來自莎蘭既球迷有同樣重要既意義，個個小學雞都要學唱呢首礦工之歌。首歌歌起播既時候，場內無分主客，六萬人一齊大合唱！
到球員入場之後，場內就播起史浩克既會歌。 呢個時候我已經走左去主看台上層度搵靚位影相，比自己有兩分鐘時間一齊跟住唱下做下主場球迷～ 等到球證吹雞我就集中返係 SVE 同班作客球迷身上！ 八分鐘左右我地有第一個埋門機會，當時我唔知邊個黎，但我見佢勁順暢咁推個波直線入禁區起腳就知個波會入網，果然，我地勁快領先！！！！ 我雙手插袋握拳慶祝，連微笑都唔敢，然後拎起相機影低呢個重要時刻。 入球球員係 Paul Stock，今季由地區聯賽加盟，早多兩年佢只係踢緊業餘聯賽，今日對住史浩克入波！！！過多幾分鐘，我地又有個機會， Rochelt 係左邊唔知佢真係想射定只係想傳波，總之個波就笠過左龍再中遠柱入網，二比零！！！！！！有幾秒既時間，成個球場充滿住作客球迷既歡呼聲。 但北看台見慣世面，好快重拾心情要啲球迷集中為隊波打氣，然後我就再無點聽到作客區既打氣聲。
我地隊中有三個球員曾經效力過史浩克既青年軍，仲係 2015 年贏過 U19 冠軍！左閘 Neubauer 直情係來自魯爾地區，全家都係史浩克球迷。 有幾次作客見到佢爸媽架車上面有史浩克既貼紙，咁多年後倒戈返到自己母會，佢地既心情應該仲複雜過我 xD 另外就係季初加盟既 Boyamba 今日都有後備上同勁耐無聽過佢個名既玻璃腳 Dragon。
主場其實都有啲攻勢，但班球員自身既技術硬係差咁啲，傳波唔到位、走位唔岩位、射波又唔中龍。 最後靠個角球開出近柱頂入追返一球，唔知點解有個感覺場波既結局會係頭場對漢諾威咁和波收場，特別係史浩克入波之後好似醒神左少少開始多啲攻勢… 不過賽場最後係雙方拉鋸情況下完全，我地係補時八分鐘後等到球證吹雞，慶祝係六萬人既見證下擊倒史浩克04！！！！！！！！！
近完場時我地唱緊 Allez Allez Allez，唱到完場後啲球員黎到再唱左兩三 round 先再一齊慶祝。到而家呢一刻都仲未好敢相信，我地唔係淨係去 Schalke 到止一遊，我地仲入左兩球波帶走三分？！六萬人入場，班球員同球迷應該從來未試過係咁多人面前出賽。。。。 仲有一千五百個球迷一齊係史浩克慶祝！！！？
球隊係賽前分享左一件事，巧合地我地係開波前都係講緊類似既野。 兩年前既十一月，我地係唔夠二百人面前作客史特加二隊，兩年後既今日，我地係六萬人面前作客史浩克。 而兩年前隊中有八名球員今日仍然為球隊效力，由史特加二隊到史浩克，有邊個會諗過呢場夢真係會係現實發生？！
Elversberg 又再成為全國既熱話，當中包括史浩克球迷狂鬧我地拉布浪費時間搞到佢地贏唔到波、又有唔中意史浩克既球迷多謝我地收佢地皮、有好多人又開始討論我地係咪又要直升上德甲、或者話我地踢得幾好都唔屬於職業聯賽等等，好多花生食。
好癲，我地作客史浩克贏波！！！！