29.10.2023 德國足球乙組聯賽 第 11 週 1. FC Magdeburg - SV Elversberg Heinz-Krügel-Stadion 賽果：1:2 (0:2) 入場人數：22166 （約 100 名作客球迷） 門票： 19.5€ 更多相片
今個星期我地終於再次作客東德球隊，Magdeburg 係其中一隊有機會我一定會㨂去睇既球隊，因為佢地既球迷實在太太太太正～～ 對上一次（亦都係唯一一次）去睇佢地主場已經係七年半前既事，今次我地以作客球迷身分重回舊地，好興奮！
呢場波被安排係星期日上演，同上次作客 Kiel 一樣，我地早一日出發去當地過夜。 今次我地自己揸車，星期六朝早七點就出發，第一個目的地係萊比錫附近既一條村去睇東北地區聯賽 Eilenburg 對 Berliner AK，總共 120 人入場…. 場內有唔少阿叔著住紅牛衫勁嘔心囉。 睇完波就揸多一個鐘車去到 Magdeburg 既酒店。
黎到十月天氣開始變得陰沉，本來日照時間已經短左，而家日日都多雲落雨咁勁無 Mood。 拎左房之後我地休息左一個鐘左右等出面無咁大雨先再出門口。 七年前我地黎到只係睇左場波就走，完全無踏入過市中心半步，今日終於可以去參觀下 Hundertwasserhaus! 如果你有去過維也納應該知當地有一座奇形怪狀既彩色住宅大廈， 原來同一位建築師係歐洲各地都有類似既建築物，其中一個就係係 Magdeburg! 同維也納唔同既係，呢度無咁多遊客，仲可以入去內園參觀，入面有幾間餐廳同小店仲有間酒店！ 可惜當時仲落緊雨，我地只可以走馬看花咁影幾張相就走人，但我地都幾肯定下年應該又要再黎過，希望到時天氣好啲可以花多少少時間欣賞下～～
食完飯買左兩枝啤酒之後我地就返酒店休息同睇星期六晚既德乙波～ 每逢星期六晚都會有一場德乙有免費電視直播，不得不說佢地㨂得好好，上星期 Düsseldorf 落後三球然後反勝凱莎羅頓，今個星期凱莎羅頓主場對漢堡又有六個入球。 真心覺得德乙好睇過德甲好多！！！ 呢晚會轉冬令，我地可以訓多一個鐘，但我地不嬲都早醒，第二朝七點左右就醒左，呢個時候由莎蘭出發既球迷巴士在路上！
我地大約十一點半離開酒店，跟住官網提供既作客球迷需知去搵作客停車場。 去到球場附近我地就開始跟路牌行，沿路見到啲角落有警車就知無行錯。 轉左某個彎之後我地入左住宅區，我地離個球場越黎越遠覺得唔對路就調頭。行到一步突然有車爬頭要我地停車，原來係便衣警察話我地行錯路，佢地話再向前就會去左主場球迷區然後問我地係咪無睇作客球迷需知。 佢叫我地跟住車尾帶我地去，沿路我地再開多次官網黎睇，發現原來佢地改左啲資料囉，正常既作客停車場跟本就無開，我地要兜大個圈去到 VIP 停車區會有個區劃左比我地！ 都好，有警察同我地開路好暢通無阻咁去到作客區門口，幾分鐘後球迷巴士就到達， 大家一齊同時入場～
我地幫手拎啲旗入場時要比啲保安檢查，佢打開第一枝旗嗰陣除左睇下有無寫禁語之外仲睇碌棍入面有無收埋啲咩，佢個同事無啦啦加把口話：Elversberg 黎咋，睇佢地都唔會帶得啲咩入場啦。 條友即刻話：咁又係～ 然後就乜都唔再 check 全部塞返哂比我地放入場 >_> 頂哂佢地！！！！！
七年前既 Block U 係一個全座位看台，但個個都將佢當係企位看台咁用又唱又跳。 有一日市政府突然發現個看台開始變危樓，因為個看台原本起出黎無預到會企咁多人同啲人會係度跳。 市政府就警告啲球迷只要再有人跳就會即刻關閉個看台，叫佢地比時間搵方法解決。 啲球迷又好乖咁忍住唔跳一段時間，後來 Block U 成功轉形成為一個可以任跳既企位看台～
唔知點解， 係 Magdeburg 既球場明明有作客企位區，但佢地成日都淨係開座位區比作客球迷。 我地㨂左係看台中心落腳，起碼落去個球場既視線靚啲！ 主場既 Block U 忙住準備今日既 Choreo 去紀念七年前逝世既球迷，呢位球迷當時係火車上遇一大班死敵 Halle 既球迷，根據消息當時雙方有一輪爭執，後來呢位球迷因為頭部重創死亡，去到呢一刻都仲未有結論到底車上面發生咩事，到底點解佢好地地去搭火車最後會無命返屋企。 今日佢地係看台前掛起大字寫住： 你永遠都同我地一齊，永遠都係 FCM 球迷。 等到球員入場後，Block U 發號師令叫大家舉起頸巾（好癲，每個人都有頸巾），係看台底有一個人放煙，大家同時默哀一分鐘。
不過…. 我地係來自鄉下既球迷，無留意開球迷圈消息既未必會知呢件事。 賽前有一兩個人黎問知唔知對面 choreo 有咩背景，但我地無意會到應該要叫大家等到對面開始打氣我地先好出聲，當時又走左去看台頂影相叫唔切大家唔好打氣住。 等到球證吹雞開波之後，大家都好急不及待咁唱歌打氣。 主場球迷就開始起哄，好在大家即刻意會到有啲唔妥，即刻收聲！ 球場內立刻靜左落黎，球員突然間係圖書館踢左一分鐘波…. 枝紀念煙燒完之後，看台底隨即冒出藍色煙，打氣聲亦都開始….
Block U 以佢地好簡單又出名既口號黎開始：班球迷跟住鼓聲拍手，然後一齊大叫 FUSSBALLCLUB MAGDEBURG, FUSSBALLCLUB MAGDEBURG! 呢一刻我見到作客看台上既鄉下球迷個個都瞪大對眼被主場球迷既氣勢嚇親，因為真係好L 大聲好震撼！！！！！！！！ 我就超開心可以再次現場聽佢地咆哮！另一樣野令大家覺得好震撼既係東德球迷既服從性，成個球場係開波前同完場後都唔會有人9叫或者亂咁帶起叫口號同唱歌，大家只會等 Block U 發出指令先會一齊出聲。 同我地相比係個個都係自由既靈魂，你想做咩就做咩，勁大對比！ 😀
賽前我地對呢場波無咩特別感覺，只係覺得唔會易打。 點知上半場我地完全㩒住主場黎踢，開波後 12 分鐘就已經由 Rochelt 開齋領先！ 好耐無試過咁早入波啦！！！ 去到30 分鐘，主隊見唔對路已經作出兩個換人調動，唔夠兩分鐘我地入多一球拉開成 0:2!!! 入球球員係來自史浩克青訓既 Neubauer，呢個入球係佢既職業生涯第一個入球！！！ 佢係禁區頂用左腳拉遠柱死角入網，靚波～～～ 下半場客隊開始醒覺，場波大部份時間都係係對面半場…. 間唔中有一兩個攻擊黎我地呢面，其中一個係七十分鐘左右既十二碼， 後來 VAR 改為誤判。 然後對方成功追返一球，最後嗰十分鐘食左幾次救心，由本來形勢大好既上半場覺得呢三分食硬，去到後來覺得有一分都收貨，唔好反輸就得。 補時階段對方搏到個十二碼……… 心諗唔係又要上演 Rostock 場波既慘劇呀嘛？？？？ 好在 VAR 睇返原來對方插水！！！！！ 呢條友叫伊藤達哉插左兩次水，一次球證無理佢，今次先食左張黃牌，要開名數下呢條友認住佢。
補時補左接近十分鐘後球證終於吹完場，我地又贏多三分保住第七位，同榜首只相差五分，同榜尾相比有十三分之差！！ 如果…. 如果……..我地頭兩場醒定啲既話…. 不過而家就算我地只係企係聯賽榜中遊，大家已經開始對我地既表現表示驚訝！！ 我地既陣容仍然無咩點樣大變，呢兩年幾由地區聯賽到而家仍然發揮到本來既水準，望下柏林聯都係同一班球員，但佢地已經連敗九場….
賽後我地等班球員黎到看台前一齊慶祝，然後一齊叫下領隊既名。原來佢已經執教左五年！！！ 佢五年前加盟之前我地仲受緊 Roland Seitz 之苦係地區聯賽中下遊位置徘徊緊，好感激佢黎到同我地執返好隊波，過左武肺之後一齊升班創歷史～ 我估班球員係度都應該幾開心，對住我地呢班鄉下仔贏波大家當然開心，但就算輸波大家都唔會有咩怪責…. 有啲球隊輸幾場波就比啲球迷叫去看台前除衫叫佢地反省下自己憑咩～ 呢啲當然各有各睇，我地就妳在無咩歷史包袱，只要肯為我地付出既話就可以一齊寫下歷史！
離場後我地又有警察放我地開路，有警車一前一後夾住球迷巴士連同幾架私家車一定離開。 去呢啲癲佬地區作客都幾正，人少少啲警察好保護我地等我地唔好被攻擊 xD 都係嗰句：希望黎緊繼續保持水準，末來兩場隨時會再次成為全國熱話～～