14.10.2023
英格蘭足總盃外圍賽
Eastleigh FC - Dover Athletic
Silverlake Stadium
賽果：1:0 (0:0)
入場人數：1401 （101 名作客球迷）
門票：10£
更多相片

係英國既球迷好興做 Do the 92，甚至係 116。 呢個數字係指要去哂英格蘭頭四個聯賽既 92 個球場，有啲就計埋第五級聯賽 National League 就有 116 個球場，我地只係有單位數字，92 係一個遙遠既夢想…

本來我地睇中左呢個週末英乙同英丙都有賽程編排左，一開始諗住去睇雷丁就一直捕住佢幾時開始賣飛同時又做下資料搜集咁。 有一日我地發現原來係國際賽程期間，英乙有好多賽事都因為有球員被國家隊徵召而要延期，我地搵到雷丁既球迷就投訴點解球隊明知自己隊波有球員要去踢國家隊都仲如期賣飛，最可惡係買左飛係無得退錢，只會比你用同一張飛去延左期既賽事。 雖然佢地一直都無正式宣布延期，但因為各種不穩定因素我地就改變主意㨂去睇英丙既 Swindon，順道見下個世界聞名既迴旋處。

後來我媽話想我地黎嗰陣一齊去 Isle of Wight 一日遊，如果我地照去 Swindon 既話即係呢個長週末完全無得好好訓一覺，最後決定連 Swindon 都唔去，星期六留返啲時間陪下屋企人。 但我地又唔死心咁睇下會唔會附近有波睇，最後發現出左足總盃外圍賽賽程，近近地既 Eastleigh 會係主場出賽迎戰比佢地低一級既 Dover，就咁決定！

星期五晚係溫布萊外面塞左差唔多成個鐘車之後返到南部都已經差唔多一點，第二朝訓飽之後大約十二點鐘出門口去金漢宮飲茶，成個茶樓都坐滿哂香港人，突然唔記得左自己係英國！ 叫左碟乾炒牛河同幾籠點心，好好食～ 食完就去魚市場買海鮮，然後有家長接送我地去 Silverlake 度睇波～

Eastleigh 只係一隊地區小隊，多年來都只係係低組別聯賽打滾，但我對呢個名十分之熟悉。原因係…. 佢地以前年年都黎香港參加港會七人足球賽！！！！ 真心，到而家我都唔知到底點解呢個賽事有五六隊大球隊既青年軍黎參單，又有啲元老隊黎，然後會無啦啦夾雜左隊 Eastleigh?? 無論點都好， Eastleigh 係我童年回憶既一部份，有一大堆得當時圈子內既朋友先會明既笑話，無諗過有朝一日會去到黎佢地主場睇波！

計劃行程啲我無咩特別留意隊波既資料，去到球場外見到 Eastleigh 既會徽係一個印有二次世界大戰既戰機 Spitfire 既圓形 logo. 原來當時既戰機第一次起飛就係由 Eastleigh 機場起飛(現時既Southampton Airport)，所以班球員投票㨂左用 Spitfire 黎做球隊會徽。 一開始我都打哂問號，我完全唔記得有見過飛機 logo， 仲懷疑黎香港嗰隊會唔會唔係同一隊 Eastleigh?? 好在好快就見到有人著住印有成個校徽咁既舊 logo 既波衫我先可以肯定係同一隊波._.

入場後我地搵左個可以曬太陽既角落企，左邊龍門後面有個大約十行既企位看台，右邊龍門角落係作客看台，分隔線旁邊企左大約五十個主場球迷。 係喎，呢度係英國，啲主場球迷最中意企近啲作客球迷… 我地離遠見到有咁多人聚埋間唔中唱下歌咁覺得都唔錯，但後來影相 zoom 近啲發現嗰五十個人全部都係細路仔黎，真心睇落全部都係初中生咁既樣，又或者就黎小學畢業！！！ Welcome to England.

上半場既攻勢大部份都係來自主隊，個波長期係球場既另一邊，擰到個條頸好攰。下半場我地走左入企位看台可以直望球場唔洗再兩頭擰，唔夠十分鐘右邊開始有一大舊黑雲飄過黎，好在我地一早搵到靚位唔洗淋雨！！！ 我地身旁有個典型光頭大肚腩既球迷間唔中就同幾個人一齊唱歌，Let’s go Eastleigh boys! 果然又係下半場出現全場唯一一個入球，Welcome to England! 我地睇咁多場英國波以來好似未開過大，到底係我地問題定英國波問題。。。。

去到近完場，主隊唔知做乜好積極咁造左好多埋門機會，可能佢地唔想和波要去老遠作客？ Dover 係來自東南部，係揸車搭船去法國既港口，今日都有好多人到場支持，可惜佢地要失望而回了～～ 完場後我地等家長黎接我地返屋企～ 如願可以食一餐海鮮餐加幾年無食過既粽 xD

星期日我地揸車搭船南下去 Isle of Wight，50£ 四個人連架車來回就可以去一日遊！當日天氣超靚～～～ 有個大太陽曬住就算氣溫得幾度都覺得好舒服。 我地一落船就去西岸睇 The Needles，然後去 Garlic Farm 食晏，再去東岸既沙灘影下相，時間過得好快！ 夜晚我地去左九龍冰室食飯，野食就一般般啦，但總算可以飲返一杯凍檸茶同凍鴛鴦！