01.10.2023
德國足球乙組聯賽 第 8 週
SV Elversberg - SpVgg Greuther Fürth
Waldstadion an der Kaiserlinde
賽果：1:1 (0:0)
入場人數：8042 （約 400 名作客球迷）
門票：季票
更多相片

過去幾場每場都好似重頭戲咁，對住一齊升班既球隊要為面子唔輸得，對住當時既榜首漢堡又令人大跌眼鏡。連贏三場之後，今個星期日返到主場迎戰變相無咩吸引力既 Fürth。

今個星期初同同事去左慕尼黑啤酒節，然後星期三晚就開始病病地，燒左兩日去到週末好左少少，但個人都仲係呆呆地同埋對耳塞左 ._. 去到星期日我係張床攤到十二點先出門口行去球場，球隊係朝早宣布主場門票全部售罄，真心驚訝對住 Fürth 都可以賣得哂，以為呢場波既戲碼無人會想睇..

雖然話係售罄，唔知點解條街同上場對漢堡相比少人少車好多。 我係開波前一個鐘先去到球場門口完全唔洗排隊？ 今日又唔知咩事好多人都用唔到張季票嘟入場，要去詢問處嗰度即時搞張新既季票。 嘩，原來張季票係可以即時印一張新既出黎？！ 咁點解開季前要等兩個月先收到張季票！！ 但今場波開始我都唔洗再用張季票，因為球隊正式整左張工作證比我可以自由出入球場大部份區域，比著十年前既我一定會善用張證去追星。。。。

今日我本來諗住遠離 Block C 既，因為唔知啲打氣聲同鼓聲對塞左既耳仔會唔會有影響…. 開波前我去左主看台企，睇下作客球迷到場影下相咁。過去幾隊黎作客既球隊就坐唔滿個作客區都起碼企得滿，今日 Fürth 只有大約 400 人到場，座位區只得小貓幾隻（當中真係有 SVE 球迷魚目混珠～），但佢地既球迷絕大部份都有參與打氣，就算聲勢唔強睇落都唔錯。 坐係主看台既時候個感覺係兩邊既打氣聲都只係麻麻，作客區動作多多，舉哂手又跳又分兩邊咁，但我都聽唔太清佢地唱咩。 Block C 係我右邊，正正就係耳仔塞左嗰邊就更加聽唔清…

開波後唔夠十分鐘我地就靠 Feil 入波領先，呢個時候我地睇落有機會可以連贏四場，但一切都開心得太早… 幾分鐘後人地就入波追和。 然後我地越踢越差，勁多誤傳同醫院波斷䌫，真心好在人地既射手停賽，其他人把握力又麻麻我地先唔洗輸波囉。 去到半場我頂唔順旁邊個阿伯係咁同我講野（最大問題係我聽唔清），我返左去 Block C 算！！ 下半場隊波係向我地呢邊攻，但場波大部份時間都係對面，唔知點解係咪個個都病左定點？ 班球員唔上力，球迷又無咩動力打氣咁，啲人話唔係我隻耳有問題，係看台上真係出奇地細聲。

後來返去睇精華都係得兩三分鐘，證明場波真心無咩特別，最值得一提係我地有一下禁區犯手球，VAR 睇完之後無叫球證去睇電視就判左係波打手，但好多人都話呢球其實係要比十二碼。 經過早一日熱利場波之後，真心想問到底 VAR 係想點，到底點解成日都要浪費大家時間！！

呢一分大家都肯收貨，變成四場不敗係德乙黎講都已經係一個好好既成績。 現時我地排第十，力壓多隊大隊，特別係降班落黎嗰兩隊～～