23.09.2023
德國足球乙組聯賽 第 7 週
SV Wehen Wiesbaden - SV Elversberg
Arena Wiesbaden
賽果：0:2 (0:1)
入場人數： 7526 （約 600 名作客球迷）
門票：14€ 
更多相片

上星期係主場擊敗榜首漢堡之後，我地終於係德乙打響名堂比人見識下德丙冠軍既實力！ 點知漢堡係今個比賽週再次作客輸比升班馬，搞到我地突然唔知到底係我地踢得好定漢堡廢？又或者同上季利華古遜一樣比我地擊潰信心然後慘敗連連？今日我地作客另一隊升班馬，佢地係升降班附加賽大勝而成功升班，今季開季成績亦都唔錯，但我地點都要贏呢一場去保住面子。

球隊係賽前話今場波最多只能安排到四架球迷巴士（今年一月我地總共有六架巴士由莎蘭出發），所以球迷組織就呼籲大家一齊搭火車北上，比多啲懶人可以搭巴士直達球場。搭火車的話大家可以分五人一組買州票 (Rheinland-Pfalz-ticket)，莎蘭本來就已經包括係 RP-ticket 之內，而 Wiesbaden 係 RP 地區多條路線既終點站岩岩踩界，所以買呢張飛就可以橫跨三州好抵玩，如果夾到五個人買一張飛的話，除返開每人就只需比 10€，同搭球迷巴士一樣價錢～

最後四架球迷巴士滿座出發，另加超過一百人一齊搭火車，今次係有史以來第一次大家咁樣搭火車去作客聽大家講個感覺好似去學校旅行咁，個個都好開心仲想有機會再黎多次。 大家到達 Wiesbaden 火車站後，有警察護送佢地行大約 20 分鐘到球場，個 service 都唔錯！

我地就揸車出到去今場「主場」賽事，車程只需 20 分鐘～ 好好彩係球場外搵到位泊低架車就入場。 今日我叫左兩個同事黎一齊睇波，佢地對德乙都無咩認識，我超希望今場可以有好波令佢地有個好印象！ 去到開波前所有球迷都入哂場，我地再次企滿被劃分既作客區，個氣勢睇落唔錯。 主隊今日個主題係家庭日，好多一家大細入場，最後佢地宣布入場人數係 7526 人…. 我想講呢個數字同上季係一模一樣，真心唔知佢地係好似中共咁係指定數字定點，定真係咁岩？？

場波我地一開始踢得麻麻地，去到 20 分鐘我地係對面搏到個十二碼射入領先後，班球員就開始黎料多返好多組織同攻勢。 下半場我上去同同事一直企，佢地話場波好好睇，仲指名話 8 號好好彩。我要問返佢地 8 號係邊個 ._. 原來係指 Semih Sahin～ 佢走位傳波嗰啲全部都做得好到位！ 佢地仲話氣氛好好完全聽唔到主場球迷既聲音，我成日同佢地講我地係鄉下隊，對方又唔係咩大隊所以唔好預有咩特別氣氛。好在我地領先緊又踢得唔錯，作客看台內個個都好出力打氣 xD

賽前其實我地有少少不安，因為我地未係呢個球場贏過…. 就算而家領先一球都唔係好敢放心住。 下半場一開波又係先比人㩒住黎攻左一陣先開始醒覺，有幾次有威脅既埋門都把握唔到。 後來後備上陣既Faghir 再一次為我地入波拉開比數 2:0，將作客區既氣氛係最後十分鐘推高～ 轉個頭我地又搏到十二碼，不過比 VAR 推翻。 補時七分鐘最後又係補到十分鐘先完場，再一次拎到三分，連贏三場，成為升班馬之中既最佳球隊，突然間我地同榜首只相差三分～～

賽後同班球員慶祝左一陣之後就慢慢離場，搭火車黎既有警察封路護送返去火車站。 好癲，班鄉下仔從來都未試過有人為佢地而封路然後可以係大街馬路大搖大擺咁行！！ 去到火車站仲有大約 20 分鐘先開車，大家各散去唔同地方買野食醫肚先，我地陪左佢地一陣就去超市買壽司返屋企慶祝，仲趕得切睇 Sportschau 精華。

大家今季既唯一心願就係護級成功，希望隊波可以繼續保持水準踢落去～ 根據數據要最少 40 分先可以護到級，我地而家踢左七場有十分，仲差三十分！！！