27.08.2023 西班牙足球甲組聯賽 第 3 週 華倫西亞 對 奧沙辛拿 Estadio de Mestalla 賽果： 1:2 (0:1) 入場人數：42474 （約 150 名作客球迷） 門票：25€ 更多相片
當我地等到德乙賽程出左之後，就即刻睇西甲幾時出賽程。 我地會有兩個週末係西班牙，而我地既目的地離華倫西亞市只需大約一個鐘車程，應該點都可以撞到佢地主場出賽既～ 只係最怕佢地會係我地到埗既嗰個星期六踢主場，咁我地就可能趕唔切…. 好在最後佢地確定係星期日黃昏開波～
我地星期五係南法過夜後，第二朝繼續行程落西班牙。西班牙大部份既高速公路同法國一樣都係要收費既，但近幾年政府決定當啲公路私人管理公司合約完結後，政府會收返管理權，同時會廢除收費。 西班牙好中意起兩條差唔多路線既路，「舊路」就免費，「新路」就收費，導致好多人寧願揸慢啲都唔願意比錢上公路。 由西法邊境去到 Alicante 呢段旅客熱門路線被政府收歸管有既路段，突然我地慳左近百歐！！
星期六大約四點鐘終於到達渡假屋，即刻衝去泳池邊望下好耐無見過既海景…. 然後慢慢安頓好之後就去超市買返啲必需品同夜晚 bbq 既食材，好輕鬆咁係西班牙過左第一晚。 第二朝起身個天灰灰地，天氣預報話會有雷暴，我地望住舊雲由山後飄出黎狂風暴雨咁，只好係室內享用我地係西班牙既第一份早餐～
本來我地希望場波踢星期一先踢，咁我地就可以到埗第二日休息下先，但而家見到天氣咁差即刻覺得好在我地下午就會出發去華倫西亞，離開呢場暴雨。 大約十二點我地就出發，開車唔夠三個字個天即刻變左藍色一舊雲都無！！！ 係市外既 P+R 泊低架車時差啲唔記得今朝落左場大雨！
係市外南站旁邊可以免費泊車，行幾步就到地鐵站，係站外用 5€ 買張日票就可以入城，由南站到市中心三個字都唔洗，勁方便～ 我地到達時已經差唔多兩邊，呢個時候啲西班牙人訓緊晏教，條街無咩人岩哂怕人多既我地～ 可以靜靜咁行下街。 去到 Valencia 就當然要食 Paella!!! 中文通常譯做西班牙海鮮炒飯？ Paella 係來自 Valencia 既食物， 黎到原產地一定要食返一份～ 我地求奇係路邊搵到間 up dup 茶餐廳 feel 既地方就坐低野食～ 佢地既 Paella 係即叫即整，要等差唔多半個鐘先上菜，所以我地叫左凍湯 Gazpacho 黎做前菜，好好味～～～ 原來最正宗既華倫西亞炒飯係無海鮮，而係雞肉炒飯！食飽之後就去食雪糕降溫，然後就周圍行下，差唔多時間就慢慢由市中心行去球場。
穿過一兩個公園後，過橋再經過一條巷仔，慢慢就係樓同樓之間見到 Mestalla 既影子。 轉多兩個彎就開始見到警察封路同球場外既人群，向上望係一座比旁邊啲樓更高既 Mestalla 球場。 呢個球場位於住宅區，同英國啲球場相比呢個睇落更加震撼，因為個球迷係「開放式」得一邊看台係有上蓋又無野包圍，由場外可以望到山頂看台…. 心諗：我地個位係最頂嗰行…… 唔知要行幾耐先上到去！！？
我地係開波前一個鐘就入左場，想可以睇住個球場慢慢坐滿，可以望到看台上面隻蝙蝠！！！ 我地個入口一入就係只可以向上行既樓梯，無得借啲意走入下層度由低向上咁影返張相。 入場後即刻嘩左聲，個感覺好似去左魁地奇球場咁，望落好密集又好四通八達咁，但其實一切都係假象，我地只能夠向上行。。。。行左勁多層之後終於見到一道門，一出去就有一陣強風吹過黎！ 呢度雖然好好天，但今朝落完雨應該仲有啲餘風…. 不過都多得強風令到我地係大太陽底下都唔覺得熱！（入黑後仲覺得凍）
上到呢個位我地仲未到頂，去個廁所買埋野飲就向球場草皮方向入去看台，我同自己講要望地下，行到最高嗰行搵到自己個位先望場內境。 但係一入到看台就已經唔小心望到左邊看台隻大蝙蝠！！！ 然後右邊既有蓋看台同佢背後既住宅，好震撼！！ 呢個球場雖然只容納四萬幾人，但如果你連埋場外因素，我真心覺得 Mestalla 仲震撼過 Camp Nou，魯營震撼既地方在於可容納過八萬人，但我地去嗰陣個場坐唔滿，身邊個個都係遊客，只有一般既震撼。另外呢個球場同樣係無上蓋，個看台日日太陽曝曬同風吹雨打咁，但保養做得好過魯營好多。
我地上到山頂之後，背後仲有一級可以踩上去望到球場外既情況，我企左上去唔夠幾秒又有另一陣強風吹黎，真心差啲吹郁我！！ 我地頭頂有西甲每枝球隊既會旗，佢地應該係跟賽聯排名… 啲旗係長旗比風吹到直哂 ._.
當呢一週既賽期定左之後，我地日日就捕到華倫個官網搶飛。 等到某一日發現佢地岩岩開始賣飛，當時就已經只係淨返幾百張飛！！！ 網上資料話華倫上季賣左新四萬張季票，即係幾乎全個球場都係自己人！！ 我地咁都搶到飛真係好好彩，可以係佢地新球場完工前趕得切黎望下呢個 Masterpiece. 仲要只係 25€ 就可以入場睇西甲！
近幾年我都無咩特別留意西甲，一直都仲覺得華倫係其中一隊強隊，原來上季佢地差啲要降班，又原來佢地唔只係上季差啲降班，而係呢幾年都係中下游掙扎緊。 原因？ 原因又係多得亞洲人金主。 係主看台後面既住宅有一個露台掛左兩枝橫旗，上面寫住 “Lim go home”，初時我地都無咩留意，後來見到附近有人拎住同一枝旗綁起身上，又見到原來好多人都有呢枝旗。 華倫西亞係 2014 年比來自新加坡既林榮福收購，一開始佢注資幫手還債，隊波又做到啲成績，後來因為炒領隊賣球員又兌現唔到承諾，球迷就開始越黎越憎佢。 其中一個最重要既導火線係林生個女曾經公開話過隊波係屬於佢地家族既，要買要賣邊個都由佢地決定，班球迷無權出聲。 試問係歐洲有邊個球迷可以接受到？？所以華倫西亞既球迷係過去幾年開始有各種既抗議要林生落台。 好多人反 50+1，但如果你真正明白咩叫球隊屬於球迷，而唔只係向錢望同埋只睇短期成績的話，你會理解 50+1 對球迷黎講有幾重要。
今日最可惜既係主隊既核心球迷未能夠入場，對面龍門後既看台底吉左一大區出黎… 班球迷因為上季季尾歧視出禍，被罰五場無得入場睇波。 奧沙桑拿就帶左大約 150 個球迷到場，佢地好合群咁個個著紅衫企係頂層間唔中一齊叫下口號咁。
呢場波節奏好快好好睇，球員既質素都好好，比波超靚，果然係頂級聯賽！！！ 客隊係上半場憑住一個 VAR 12 碼領先～ 去到下半場最後十分鐘華倫追和，我地同班主隊球迷一齊歡呼～～ 點知去到補時最後比客隊角球開出絕殺，呢個時候係場內聽到哂嗰 150 個球迷係度慶祝，等到球證吹雞完場就極速離場。 我地就留低等人潮散去後再係射燈下望下隻蝙蝠先再離場。
離場後行大約五分鐘就到地鐵七號線，成功迫上岩岩到站既列車，可以直到南站。 估唔到幾乎成車既人同我地一齊落車去停車場拎車～ 然後我地就揸一個鐘車回程。