22.07.2023
季前友誼賽
SV Waldhof Mannheim - SV Elversberg
Ludwig-Wolker-Sportplatz
賽果：0:2 (0:1)
入場人數：1400 
門票： 8€/5€
更多相片

呢兩三年睇完啲低組別比賽或者友誼賽我都無咩興趣講返場波，今次主要想借季前最後一場友誼賽分享下大家對德乙既準備程度同埋期待～

第一係關於球場擴建既情況！當隊波確認升班上德丙之後，管理層隨刻安排為 C1 看台加建上蓋，點知遇上物流延誤，本來話開季搞得掂，最後等到歇冬時先可以動工。 成個冬天好多人日日走去場外「監工」同係啲群組度分享工程既進度，最後我地今年終於係主場有鐵頂遮頭！ 而今季我地雖然最後有陣臨尾季既味道，但點都要為唔小心升班作好準備。 因為升到上德乙就有唔同既規定，例如球場要能夠容納最少 15000 人。

球隊本來就有計劃去翻新看台，後備席後面既看台今季已經封左準備一步一步咁翻新。而家升班上德乙，球隊係季中就已經研究將球場翻新成一個符合德乙規定既球場。 去到季尾亦都同球迷公布左擴建計劃，中間會有一個過度期。 係五月主場大家係草皮上慶祝完之後既第二日，球場隨即成為地盤，一班班工人入場拆去作客看台同原先既 VIP 看台，要趕係七月尾開季前完工， 等我地可以如期係主場出賽。

過度期既計劃係會先搭建兩個臨時看台，主要要先擴大個作客看台黎應對啲癲佬～ 長期計劃係會將本來位於龍門後既作客看台搬去邊線後面 （好似達斯泰達既作客區咁）！ 成個暑假同樣日日有人走去球場監工，同埋請啲工人飲啤酒多謝佢地為球場工程出一分力。 大家一直都未知到底足總收唔收課，去到七月頭，球隊終於宣布，我地第一場主場賽事會移師到 Saarbrücken 出賽迎接北德大癲佬 Hansa Rostock!

Rostock 既球迷真係出哂名不受控制，我地都真心寧願佢地走去破壞 Saarbrücken 個球場，好過黎到我地岩岩新起好既看台比佢地一秒收皮 😀 一星期後既德國盃首圈賽前就會係 Kaiserlinde 迎戰早兩年先對戰完既緬恩斯。 我地都仲未有機會見到球場既新一面～ 要到八月中先有機會望下！！

第二就係講下賽程～ 我地德乙既處女戰將會到漢諾威作客（上到德乙好多名可以直接用譯名～～），首場主場就如上講過對 Hansa Rostock。 第二場作客就已經會到最受莎蘭人歡迎既球隊：凱莎羅頓！！！ 呢場波隨時係今季最多人一齊去作客既賽事～～ 另外比較多人期待既係十一月中作客史浩克，十二月頭作客柏林 (!!! 已經訂左火車同酒店)。 出年要去兩次漢堡，分別係二月同四月～ 好期待好期待！

第三講下波飛，我地今季終於成為季票持有人！ 鄉下仔由細個到而家就算場場去睇都無買過季票，因為佢中意儲波飛。 今季要買季票最主要係怕買唔到飛 （對啲大球隊一定掛紅旗）… 最後我地以會員價 145€ 買左季票，包哂今季 17 場主場賽事，圍返起只需 8,5€ 一場！ 而單場門票正價今季會由 10€ 加價到 15€， 如果計埋會員貴落去，我地每場波都會平 3€ 左右，又唔洗再搵人幫手衝去 fanshop 買飛，拎住張卡就可以入場。

最後都係講一講今日場波，我地無預到會有咁多人到場，佢地可能係想黎睇下到底我地憑咩升到班？ 我地附近企左啲當地既小朋友，有一兩個話自己支持 SVE，其他朋友就話佢唔識貨之類，成場波就兩班小朋友係度互叫鬥咀好好笑。 我地好輕鬆咁係上下半場各入一球，場波好睇就一定唔係，睇得出佢地係度試緊陣，我地就係場邊傾下計，同樣好輕鬆咁睇呢場波。

下星期就終於要見真章，雖然唔知結局如何，今季可以係有生以來唯一一季德乙… 無論點都好，我地都要好好享受每一刻～！