01.07.2023 挪威足球超級聯賽 第 12 週 Vålerenga IF - Viking FK Vålerenga Stadium 賽果：1:2 (0:1) 入場人數： 8977 （約 800 名作客球迷） 門票： 249 NOK 更多相片
係歐洲想避暑既同時又可以有波睇就只可以向北，但其實又只得一個國家係德國波抖暑既時候踢緊聯賽，就係挪威！ 好好彩比我地搵到三隊位於 Oslo 奧斯陸既球隊係同一個比賽週都係主場出賽，即係我地可以去挪威一次過睇三場波！
我地係五月訂左機票決定六月最後一個星期飛去挪威玩六日，然後先再慢慢睇酒店同計劃行程。搵酒店既時候發現原來當地物價好貴，酒店最平都要二百歐？！ 最後㨂左平一半既 Airbnb～ 奧斯陸近年瘋狂起緊新樓，我地入住嗰間屋都係新起好幾年，對面街亦都有埋緊尾既新樓地盤。屋主好好肯安排比我地早兩個鐘 check in，因為我地班機朝早九點就到達… 要等到三點先入得屋的話會好難捱！！
由法蘭克福到奧斯陸既過程一切都好順利～ 挪威同瑞士一樣唔係歐盟成員國，但佢地屬於神根地區，所以由德國去挪威可以連護照都唔洗帶，就連登機都唔會同你對身份， 自己嘟機票入閘上機就得。 到埗後，我地就先用當地既交通 App Ruter 買 7-Day Zone 1 Pass，盛惠 335 NOK～ 用 App 既好處係可以額外加 Zone 落原有買左既日票！ 機場位於 Zone 4N，如果買單程由 4N 去市中心既話都要成 118 NOK，入到市中心又要再另外買票，但如果用 App 加 Zone 既話，由機場去市中心就只需 78 NOK。以我地既行程黎講用 App 係最抵玩同最方便！
到達市中心後，我地就先係附近行一陣同埋食啲野～ 朝早六點食完早餐黎到十點又再餓過，然後去超市買定啲野就已經差唔多可以 check in~ 我地間屋離市中心只需搭三個站地鐵再行幾分鐘就到，附近有幾間超市仲有間好多人推薦既 Cafe～ 入屋後我地就休息左陣先，同埋開左枝啤酒黎慶祝旅行既開始～～
係火車站附近行街時見到有間店叫 Vinmonopolet，個名好容易用英文理解， Wine Monopoly！ 呢啲通常咁大間賣紅酒既地方通常都會有一細區賣手工啤酒， 入到去果然有唔少啤酒既選擇，睇中左三枝來自挪威既 IPA 同 Stout，就諗住買黎入屋飲～ 後來行超市時又想睇下佢地會賣啲咩酒，點知得嘉士伯之流。 原來挪威對酒精既銷售又好多奇怪既規例， 例如星期六下午六點後同星期日係唔可以係餐廳同酒吧以外地方賣酒。 又原來超市得低酒精飲品係因為佢地唔可以賣酒精濃度高過4,7% 既飲品，要買就只可以去國企 Vinmonopolet，又終於解釋到個名既來源！
我諗返起細個第一次去旅行時住 Hostel 有兩個挪威人係我食緊早餐既時候問我要唔要飲返杯 Vodka？ 佢地唔好講笑咁問，而係自己已經係度隊緊酒 ._. 挪威政府係用高價賣酒黎壓低民眾既飲酒慾， 我估啲挪威人出國見到啲酒咁平一定瘋狂飲酒…. 而呢兩個人就係我一直對挪威人有既印象，個個都係醉酒佬！！ 但其實挪威人（最起碼奧斯陸人） 個個都好正常，仲勁 Friendly~
到埗後既頭兩日我地都係市中心度做遊客，係海邊散步同上山睇下風景咁。 星期六撞上 Pride Parade，成個市中心都色彩繽紛，好多都係一家大細，甚至連老一輩既都有出黎玩，完全可以感受到挪威係一個好開放既國家，對唔同文化唔同背景既人同事既接受能力十分之高！ 係市中心玩左一日之後就出發去睇第一場挪威波！
我地對挪威既球迷無咩特別期望，聽人講都話佢地無咩特別，場內氣氛似英國咁。 去到球場外見到有唔少球迷係球場酒吧聚集，有網友都推薦我地去飲返杯球隊自釀既啤酒，但係我地到場時已經得返大約半個鐘就開波，買完紀念品就直接入場。 門口有好簡單既安檢，佢地求奇望下我個袋入面既野就入得場。 入到去先經過小食亭，佢地只有兩款小食，一款係烚腸配薄餅皮(?) 另一樣就係pizza，我地每樣叫左一款。 條腸佢係個鐵兜度夾起左之後就連埋塊圓形既皮比我，個賣相勁頹囉！ 個Pizza 仲衰，佢地係 Dominos 外賣 pizza 盒度拎一塊比我地 ._.
入到看台見到左邊龍門後既主場球迷區， 前面有十幾個人著哂黑衫係度準備打氣物品。 右邊龍門後面就係作客球迷，睇落人數唔算多，但以挪威黎講我估應該都唔錯？ 坐低之後就食野…. 本來覺得條腸雖然賣相唔得，但 35 NOK 算平，食落口之後先知點解咁平…. 佢地應該當球迷係狗？ 勁難食囉！！！！ 塊 Pizza 就雖然係凍既但都 ok. 真心，黎左挪威兩日半，真心覺得無啖好食 （有錢先有好野食）。
去到接近開波時間，個球場都慢慢越黎越滿！！ 兩邊球迷既看台都慢慢企都滿哂！ 球場播起勁有活力既會歌（應該係），然後係球員通隊有一堆小朋友帶住球隊既旗衝出黎，全場既球迷個個勁 high 咁瘋狂拍手。 班小朋友9衝完之後就有一個人單獨帶枝大巨球會旗出黎向中圈狂奔，個個又係咁咁拍手。 佢係中圈揮左兩下之後就走返去後備席，然後拎起彩虹旗再奔向中圈，大家比之前更加興奮咁係度歡呼。成個場面好好笑，唔知點解大家無啦啦好激動！
終於到班球員入場，反而大家正常返啲，個個舉起頸巾高唱會歌。 雖然球證係等到首歌播完先會吹雞開波，或者球證吹雞後球場就會關喇叭。 但呢度係開波後繼續播歌，球迷亦都繼續企哂係度照唱。 首歌播完之後，主球迷看台就繼續自己有自己唱。 由班小朋友9 衝出黎到開波後呢幾分鐘既氣氛完全係出乎意料之外！
挪威既球場同英國一樣係看台上禁煙， 係其他室內地方當然同樣禁煙～ 我身旁坐左一個男仔，成場波我見佢拎住個啡色盒，間唔中拎一粒野出黎放入個口度，然後又係個口拎返出黎放返入個盒。 我以為佢食香口膠，但佢每次開口都有陣異味傳出黎，令到我都忍唔住留意下佢到底食緊乜！ 原來係口含煙！ 後來上網睇返先知口含煙係歐盟禁用，唯一可以合法售賣既地方係來源地瑞典。 個盒入面有好多一粒粒指甲大小既物體，個男人會拎一粒出黎攝係上唇後面，咁上下時間佢會拎返出黎放入個盒既另一邊。 Ok 雖然佢個口好臭（無刷牙嗰種臭），但起碼佢「食煙」時我唔洗吸佢啲二手煙，又唔怪之得成個 trip 都好似無咩聞到煙味， 我估係因為啲人多數㨂室內外都食得既口含煙？
好啦，講返場波， 客隊拎自挪威西部 Stavanger，以維京為名～ 佢地今季暫時踢得唔錯暫時排係第二位。 而主場就表現異常係下游掙扎緊。 去季睇左大半季進攻足球，黎到今場波就算係挪威既頂級聯賽唔知點解都係覺得爭咁啲。 兩隊波比波成日都唔到位，送到個波入禁區唔知點解會㨂回傳，隊友又唔會走位幫手… 得罪講句踢得仲衰過德國國家隊。
位於兩邊龍門既球迷各自各為自己隊波打氣， 今季表演較佳既客隊係上半場先入一球，令到班作客球迷更加投入。 只不過佢地雖然有八百人到場，我地都好少聽到佢地既打氣聲。 客隊領先之後，佢地開始大聲啲，間唔中聽到佢地唱 Allez Allez Allez – 仲會全部（！）球迷一齊踎低跳起唱歌！
主隊雖然踢得麻麻，但班球迷仍然無間斷咁打氣，間唔中仲帶動到我地呢邊看台既球迷一齊企起身對唱。 去到下半場尾段，主隊球員突然醒覺狂攻。 去到完場前五分鐘佢地有個角球，個球證已經表到明會昅實班球員既動作。 角球開出後，球證即刻吹雞判十二碼比主隊。 呢個時候我地都唔太知道到底罰啲咩… 好在係挪威球場入面既大電視除左會直播場波，仲會有重播，無論有無爭議性既時刻都會重播。 係重播其實以係係龍門前有啲輕微既推撞… anyway, 主隊靠十二碼追和，龍門後面隨即放紅藍煙慶祝～～ 場波得返幾分鐘，佢地可能可以乘勝追擊反勝？？
補時六分鐘，去到真.尾段主隊既球迷為左攔截對方既單刀機會奮身而出… 最後食紅牌離場。 客隊憑最後既罰球機會黎個反高潮直射破網， 1:2 完場～～ 個個即刻好極速咁離場， 我地睇完客隊慶祝都慢慢行去地鐵站搭車去市中心食飯～
睇完人生中第一場挪威波，球員水平一般但場內氣氛絕對係一個驚喜～ 即刻好期望第二日去睇另一場波 ^^