15.04.2023 德國足球丙組聯賽 第 32 週 VfL Osnabrück - SV Elversberg Stadion an der Bremer Brücke 賽果：1:0 (0:0) 入場人數： 13728（約 120 名作客球迷） 門票：16€ 更多相片
德丙升班席位撇除 SVE 既話其實好緊湊，SVE 踢少一場以 66 分排第一，第二位係 62 分既 Wiesbaden，去到第三位係要同德乙尾三踢附加賽，而係係弗賴堡二隊，但二隊唔可以升班變左要睇第四位，Saarbrücken 以較佳得失球差以 56 分壓過 Dresden 排第四。 之後仲有 Osnabrück 同 Mannheim 仲有差會可以爭下。
雖然我地有同附加賽位置有成十分既距離，好多人已經恭喜我地來季升班，雖然我都對德乙愈黎愈多幻想，但一日未完季仍然唔可以慶祝字…. 但係望下附加賽席位之爭，見到樓下嗰幾隊波成日都自爆失分，其實某程度上我地根本唔洗做啲咩佢地都唔會無啦啦可以搶到十分爬頭… 仲係護級區域係季尾突如其來既超強求生欲要瘋狂搶分，真係多得我地上半季儲落黎既成果令到大家已經有一份額外既安心。
我地今日既對手來自德國西部平原，SVE 對上一次升班時亦曾經黎過出賽，當時以一球定勝負搶下其中一場寶貴既作客三分返莎蘭。 而我就只係去過球場門口，雖然有幾個 Osnabrück 球迷帶我去睇波，其中一場就係跟佢地搭七個鐘作客球迷巴士南下作客。無記錯我已經講過幾次，就係呢一程車改變左我～ 以前會覺得要入到小西灣睇波好浪費時間，但點解跟人地搭七個鐘車又會覺得好玩呢？ 我就只係搭一次，人地係每兩個星期要搭幾個鐘車都無嫌過啲乜～ 當然唔同既係人地每個星期都同朋友一齊去玩，而我係香港就大部份時間都係自己一個…
後來跟 SVE 都搭過唔少巴士出征，只係當時仲係地區聯賽遠極都只係三四個鐘車程已經唔算遠。 上到黎丙組我地已經搬左去算係德國中心既法蘭克福，唔會特登返去莎蘭再搭巴士出發。 莎蘭位於德國西南邊境，係丙組有一半既球部都係西南部，車程都仲算 ok，但去到東部，巴伐利亞或者西部呢啲就最少要六七個鐘，來回成千公里… 不過可以同朋友一齊塞係架車度幾個鐘真係好好玩～～
今日我地八點半出發，大約十二點半到達。 明明尋日都仲藍天無雲勁舒服，今日係路程一半好似入左結界咁變到橫風橫雨！ 好在泊低架車行幾步就到作客區入口，一入到場就見到四周圍都係岩岩作客完 Dynamo Dresden 既貼紙，上到看台就係一片屬於主隊紫白色看台。
我一直都幾中意呢個球場，容納入數只有 16000 人，兩邊龍門後既看台好矮好迫，個上蓋好低，但個感覺好 cozy， 打氣聲仲可以食得好應。 Osnabrück 呢隊波無咩朋友， 佢地其中一個口號係 「Osna 以外既一切都係屎！」 之前同 Osna 球迷去睇其他波既時候我問佢會 prefer 邊隊贏，佢既回應係：下，我唔會想 Osna 以外任何一隊贏波架喎。 Okok, 咁深愛自己隊波都係好事黎既…
SVE 帶左大約一百人入場支持隊波～ 外加十幾廿個黎食花生既球迷。 上次黎作客只有 30 人到場，同今日相比已經有好大進化！！ 球員入場後，主隊球迷係看台前用門旗砌出球隊名同放紫白煙，可惜啲煙太弱雞完全唔靚。 個感覺似係佢地剩左啲物資想係今場用埋佢而準備呢個 choreo 咁。 人地有過萬名球迷在場，我地區區幾十分完全敵唔過佢地既聲勢，但以圍內黎講我地今日氣氛好好，借助個矮看台仲食到多啲聲～
野食方面，未到場前有啲擔心，因為德國北部好多球場既野食都好難食… 入場後見到呢度有燒腸都放心啲，仲有咖哩腸同薯條！ 今日我就唔同薯條啦，因為回程打算去食麥當勞用佢係 1,50€ 大薯條優惠～ 個咖哩汁唔錯仲有少少辣味～～ 但佢地個包會否有點迷你？ 平時個配包係有手掌咁大，但呢度既包係好似飛機餐嗰個 size….
成場波都係五五波咁， 好多地方都做得唔夠好， 有幾次失誤好好彩可以大步欖過。 只可惜大難不地無後福…. 近完場前後防失誤走漏左個對方球員，就係咁比人食正個機會破網搶到三分保持佢地升班既希望。 入波條友係前 SVE 球員，但完全無人記得佢個名？？ 睇返資料，佢係武肺期間黎左半季，後備上陣過幾場，然後就走左，唔怪之得無人記得佢。 入波後主場氣氛極好，幾乎全場球迷都企哂起身唱歌到完場，大聲到我地差啲連自己唱乜都聽唔到。 輸波雖然唔憤氣，但由於 Dresden 尋日輸波所以我地保持到本來升班優勢，當係一個安慰。
原先計埋今場我地贏到四場波就篤定升班，如果真係連贏幾場既話我地可能係週中補賽作客時升班…. 而呢場波預計唔會咁多人到場。 今日失分，下場繼續，留返係五月初主場出戰時先同大家一齊慶祝。另外其加仲要既一點係，黎緊三場波我地都去唔到…. 所以最好可以等到我地返黎先!!!