09.04.2023 比利時甲組聯賽A 第 32 週 Royal Antwerp FC - Cercle Brugge KSV Bosuilstadion 賽果： 2:1 (0:1) 入場人數： 16634 （約 200 名作客球迷） 門票： 35€ 更多相片
前一日我地係 Leuven 睇完波後就繼續出發到 Antwerp 落腳，呢個城市比較出名既應該係佢既港口。係我地計劃行程時發現原來係總車站對出有條唐人街，係同倫敦一樣有塊牌坊既唐人街，只係規模比較細，真係得一條街。
係歐洲好多城市都有唔同既環保措施，其中一個係限制高排放量既私家車入城。 如果想揸車入城，架車要符合佢地既要求，如果唔係就要比錢（好似倫敦既 ULEZ 咁）。 我地架車就符合要求既，只係事前要上網登記又要上載汽車證記證書，最後我地決定泊架車係市外既 P+R 。 反正只係兩歐一日，公眾日期免費；停車場外就有 tram 可以入城，每 60 分鐘先 2,5€。
而係市內搭車亦都好方便，只需要一張信用卡就得，唔洗事前買飛 （又係好似倫敦咁）。 原先諗住買 10 程車票 17€，但車站部售票機壞左買唔到飛，想用 App 買又要開戶先，搞搞下架車已經黎到就上左車先算。 見到佢地每個門口都有兩部機，一部係當地既八達通用，一部就係信用卡，我地試下用信用卡成功左～ 最後我地總共只係搭多三次車，買 10 程車票反而蝕錢！ 仲有部嘟卡機有兩次係壞既，試左車入面幾部都唔 work… 變左只係比左兩次車錢 ._.
最煩係市內泊車！係德國如果有個 P 字路牌係代表可以免費泊車，除非個 P 字下面有另一行字寫住要入標或者時間限制。 係安市都有乜都無既 P 字路牌，但唔代表你可以免費泊車。 佢地其實有個地圖係市外分左唔同區有唔同既價錢同時間限制。 例如市中心既係朝九晚十 3€ 一個鐘（唔算貴）但最多只可以泊三個鐘。 想長泊就要入室內停車場，預大約 18€ 一日。 計過條數之後，泊架車係 P+R 再轉 tram 係最化算既～
就算泊得架車後已經差唔多八點，再轉 tram 去唐人街食左飯先！ 條街有幾間麵店但我想食燒味，事前睇左有兩間酒樓，第一間叫中國星，聽到個名都唔太開胃，門口啲餐牌又用殘體字… 行多幾步有另一間叫鴻基，就㨂左呢間～ 佢地個餐廳係用正體中文～～ 本身我諗住叫菜心同叉燒，後來又覺得叉燒好似自己都整到，最後㨂左椒鹽骨。 落單時有啲擔心佢地唔識講英文，我地又唔識講荷法文同普通話，然後就問佢用廣東話得唔得？ 個待應哥哥話用廣東話仲好添啦！！！ 哈哈
間餐廳入面好多外國人，有一枱係兩個上左年紀既外國夫婦竟然叫左一條蒸魚，超香！！！ 就係呢條魚令我決定聽日要再黎食魚。 真係好驚訝佢地對食物咁開放… 我地嗰兩碟菜超好食 T_T 個價錢仲平過英國好多… 兩個餸加三杯可樂連埋 tips 先 45€ 走之前我問佢聽日係咪都會開門，我要返德國之前食多餐 xD
第二日我地食完早餐就先去超市買手信，去西部一定要去 Albert Heijn 買蛋糕同啤酒～～ 然後去市中心觀光，係河邊散下步然後再去舊城行個圈。 午餐就求奇搵間餐廳坐低食啲垃雜野同飲幾杯啤酒， 八掛下條街上其他既遊客咁～ 我地特登食少得留肚今晚去食蒸魚！係市中心搭 15 分鐘地鐵就去到球場， 主隊最近成績唔錯所以吸引到好多球迷入面支持。
Royal Antwerp 係比利時既第一隊足球隊，而佢地個球場係 1923 年建成。 球場現時只開放三邊看台，其中一個看台仍然係原始球場既部份，上面布滿密密麻麻既長木櫈，現場睇覺得好震撼！！好好彩我地趕得切係佢地拆卸前可以見到個看台一面～ 另外 Antwerp 既球迷都出名係瘋狂，好期待可以睇佢地既表演。
但我地入場後，第一時間吸引我地眼光既係班作客球迷。 未開波就已經係度唱歌，最後仲唱到完場。 等到球場進場時，看台亦都愈黎愈滿，一心期待班主場球迷會有咩招式洗出！ 不過首先要為一個剛過身既球員默哀，然後唱 YNWA 。 去到開波後一直都淨係聽到係我地左邊班作客球迷既聲音， 我地係坐得近作客區，但都未至於完全聽唔到主場球迷掛？ 個感覺有啲似英國咁，通常都係作客球迷興奮好多…
完半場前客隊仲要入波開齋，佢地既打氣聲就更加強更。 相反主場球迷好似一啲聲氣都無… 我地一直都以為佢地只係被作客聲蓋過左，但換邊後，對方龍門係正主場球迷前面， 佢地好似英國咁開龍門球時會由龍門助跑到超腳時叫： Ohhhhh you fucking bastard! AHHHHH 勁 on9，咁樣佢地又叫得超大聲喎？？ 即係佢地根本無咩點唱歌，或者得幾條友9唱？ 老實講真係好失望！！！
有一樣野想提一提，就係係比利時睇左兩場波入面有幾下因為個波省中球證而要吹停重開。 就算其中一隊係嗰陣有明顯既控球權都會吹返比另一隊。 不過我唔明既係，係德國同其他地方睇左咁多場波我都無印象個波省中過球證， 好神奇係比利時兩日可以見到幾次？ 係球證問題定球員問題？
72 分鐘主隊追返一球，主場整體氣氛好左少少，去到近完場前球證要 VAR 去判十二碼比主隊。 呢個時候我決定拎起相機瞄準主球迷看台去捕捉佢地慶祝一刻，等我地起碼有張好睇啲既相…. 完場後我地搭返地鐵去市中心鴻基食飯～ 只可惜佢地今日無蒸魚！！！！ 佢話有返左條唔知咩靚魚，不過貴少少要 68€ T_T 我食唔起….. 我話我要另外㨂啲屋企食唔到既餸，佢推薦左香妃雞，即叫即浸汁半個鐘。 另外最左個火腩煲同一籠叉燒包long 下個胃先 ^^ 我同佢地講以後一定會再返黎食港餐!! （反正Antwerp 附近仲有幾個球場我地要去～～）
食飽後就行大約一個鐘返去酒店，順便再去市中心行個圈散個步～ 去到復活節星期一就要返德國睇德丙。