26.11.2022
德國西部地區聯賽 第 18 週
SG Wattenscheid - SC Preußen Münster
Lohrheidestadion
賽果： 4:5 (1:4)
入場人數：2709 （約 1600 名作客球迷）
門票： 15€
更多相片

呢幾年計劃過幾次要去 Wattenscheid 一直都有唔同原因而去唔成，黎到今日終於可以剔走一個 to do！ 隊波係 2019 年傳出財困隨時收皮，好彩佢地有金主肯出手打救～ 去到而家佢地竟然成功爭取到由市政府出錢去翻新球場！ 個工程出年就會動工所以我地要把握機會去見呢個球場一面。

Wattenscheid 屬於 Bochum 市， 波琴而家講左好多年想翻新球場但市政府一直無反應。 而家竟然係低組別既 Wattenscheid 有得重建球場，激死波琴球迷！！ Wattenscheid 既主場 Lohrheidestadion 係一個多用途運動場，而呢個球場係德國田徑隊既重要場地。 如果 upgrade 到個球場的話就會申請舉辦世界大學運動會！長遠黎睇個市政府應該覺得呢個球場會有用過波琴個球場…

星期六一早我地由法蘭克福出法揸大約三個鐘車去北威州～ 係球場附近搵到免費泊車位後就拿拿聲入場… 我地㨂左去主看台，點知入左場先知球隊搬左作客區去主場台… 本來由主看台係可以正面見到哂兩個球迷看台！！ 本來㨂主看台既都係為左唔洗食風又可以見到兩班球迷，黎到冬天我會寧願㨂一個舒服啲既地方放棄 best view.

客隊 Münster 現時領先係西部聯賽既榜首，對住尾二既主隊應該要贏波唔係一件難事。 由於客隊成績大好，今季成功召集到好多球迷一齊去作客，今日場內有過半數都係作客球迷！ 好可惜主隊既球迷組織選擇左杯葛今場波…. 原因係佢地不滿球隊同警察既安排，而球隊仲走去罰自己既球迷。 賽前班作客球迷都有舉起大字布支持主隊球迷既行動。

距離開波時間仲有二十分鐘左右，我地見到場波等入場條隊仲係打哂蛇餅。 球隊宣布場波會延遲十五分鐘先開波，等啲球迷可以有足夠時間入場。 以為真係好多人入場，但最後原來三千人都唔夠？ 淨係客隊都因為有成千五人，即係呢個球迷有一千人左右想入場就已經 handle 唔到？

呢場波既 focus 要去返球場上…. 唔計 SVE，真係好耐無睇過咁好睇既比賽！！ 企係榜首既客隊十分鐘左右就開齋，唔夠三分鐘又入多一球完場係㩒住 SGW 黎砌。 去到完半場前搏到個十二碼領先三球。 兩分鐘後主隊又搏到十二碼追返一球，以為上半場咁就完？ 最後既半場比數係 1:4。

半場就有五個入球的確幾興奮，唔知客隊仲入唔入到多幾球呢？下半場一開波主場又搏到多一個十二碼追多一球。 場波開始有少少膠著既時候，主隊有球員食兩黃一紅要出場。我地附近有啲球迷都心淡提早離場。 場波反而愈黎愈好睇，主場唔知點解變到勁主動完全係有前無後咁，八十分鐘追多一球，然後去到補時階段仲成功追和，呢兩球波睇到大叫同彈起身拍手！！！心諗：提早離場啲人一定勁 dum 心。

正當我地又以為場波就完既時候，客隊搶到最後一個攻勢返黎，第一次機會失左但仲有個角球。 開出後比佢地係龍門前面死纏爛打咁踢到個波入網， 4:5!!! 班作客球迷激動到衝左落場，而球證亦都隨即吹雞完場。 雖然唔係兩隊球迷但我地都睇到爭啲要食救心。

完場後我地塞左差唔多半個鐘先離開到呢個城市…. 然後好productive 咁去睇傢私先再食飯，最後十點先返到屋企食外賣韓式炸雞～～～ 好開心有好波睇同有好野食！

十二月應該仲有兩場波可以睇，一場係罕有既友賽，另一場亦都係罕有既歐洲 boxing day 賽程 ！