08.11.2022
德國足球丙組聯賽 第 16 週
SpVgg Bayreuth - SV Elversberg
Hans-Walter-Wild-Stadion
賽果： 0:1 (0:1)
入場人數： 3864 （ 40 名作客球迷）
門票：14€
更多相片

今年最後一場作客波去到巴戈利亞北部既 Bayreuth，遇上週中賽事要去睇呢場波就一定要請定假，由法蘭克福出發要大約三個半鐘，由莎蘭出發就要再加多兩個鐘。 雖然球迷巴士未能成團，但加加埋埋總共有大約五十人自駕去作客！比著以前就算係週末出戰都未必會有咁多人…

剛過去既週末 SVE 主場迎戰多蒙特 U23 輕易贏波，我地無返去莎蘭係因為今日會去 Bayreuth 同埋黎緊星期六會睇埋今年最後既主場波，連續兩個星期揸兩個鐘車返去莎蘭睇兩場 U23 波好似有點浪費（油費最近每公升要 2€!） 所以星期六我地留返係法蘭克福做下家務同睇場本地低組別聯賽就算。

自上次我地作客 Aue 失分都成為大贏家後，我地暫時既主要對手 1860 對住 FCS 輸波，令我地係榜首拉開左有六分既優勢，同附加賽席位更加有八分之差。 好多德乙既球迷已經好驚下年要對我地呢隊無球迷鄉下隊…. 更加驚既係德甲榜尾嗰幾隊，唔通下年我地會去作客史浩克？？？

為左跟去作客 Bayreuth，我地一早請左星期二下午同星期三朝早既假。 星期二準時中午收工食埋飯就出發，希望可以係繁忙時間開始之前到埗唔洗塞車；好好彩一路順利未到五點就已經泊低左架車。 離開波時間仲有兩個鐘，我地就去市中心行個圈先。 Bayreuth 球迷自稱 Altstadt （或者當地鄉下話叫 Oldschdod），即係舊城咁解。 我地到達時天色已黑未能清楚睇下佢地既舊城，但事前係 Google 睇過下啲相，發現 Bayreuth 有好多好靚既地方，特別係佢地既歌劇院！

今場波係 Bayreuth 有史以來第一場夜波，原因係個球場一直都無射燈！個球場係一個典型既體育場，一邊有個有蓋既大看台，龍門後有大約五至十級既彎型看台。 主場球迷區位於我地既正對面，而呢個看台都係近年先重建改為一個小型有蓋看台。今場波因為係史上第一場夜波，對面看台既波飛一早就已經賣哂，今日亦都好早就企滿哂人。SVE 咁岩就跟住一齊走入佢地既歷史其中一頁。 由於今場波我地無球迷巴士，人地就連作客區都廢事開。 我地要同主場球迷一齊係主看台買飛同入場，然後分隔左一個小型企位看台黎比我地。

Bayreuth 曾經都風光過所有先有一個咁靚既球場，可惜過去多年都係低組別徘徊，黎到今季先升班上黎丙組，不過成績就麻麻睇落應該都係做升降班。 季初我地同自己講一定要係啲升班馬度搶到分，黎到而家我地竟然以榜首黎到作客，但我地既內心仍然好緊張。 早兩星期對方先係主場爆冷贏 1860，而我地通常同樣會係呢啲時候表現異常比人大炒….

不過，我地對隊波都仲好心信心既！ 只係有少少比佢地縱壞左，頭十五分鐘入唔到波就會好不安。 今場去到差唔多二十分鐘先入球波！ 我地既右閘 Fellhauer 由右路帶波上去地波傳中比來自雲達不萊梅既借將 Woltemade 入波，令佢終於射到佢地職業生涯既第一個入球！ 我地都好鄧佢開心～～～ 佢黎到而家一直都係後備上陣，雖然無入過波但一定幫球隊造左好多機會。

唔知點解，個個都好投入場波完全無心唱歌打氣。 上半場唱左幾首歌之後就靜左落黎，下半場亦如是。 主場球迷就無間斷唱足九十分鐘，只係佢地啲歌詞超悶，黎黎去去都係得幾隻字咁。 總括黎講我地既形勢比較好，不過就係送唔到個波入網，對方係中場搶截都 ok，帶到個波去到前鋒好容易就比我地既後防收皮，就連射門機會都無。

SVE 靠住呢一個入球係歇冬前確保左榜首位置，仲成功保持有今年作客不敗既紀錄，同埋成為（有三分制）有史以來得分最高（以去到第 16 週黎計）既升班馬！ 完場後我地以 38 分領先，同第二位相差八分，同踢少一場既第三位相差九分。 下星期會返主場迎戰弗賴堡 U23，然後就放假…. 世界盃我地就唔會睇啦，但應該都仲可以睇多一兩場地區聯賽先真正歇冬！