20.05.2022 德乙附加賽 首回合 1. FC Kaiserslautern - SG Dynamo Dresden Fritz-Walter-Stadion 賽果：0:0 入場人數： 46,179 （4,284 名作客球迷） 門票：21,5€ 更多相片
一個月後我地又再上山，為既只係想睇 Dresden 作客！ 當德乙丙既附加賽位置確定後，我地即刻睇下賽程，發現德丙球隊會先係主場出戰，咁岩我地呢個星期都要去睇莎蘭盃決賽，所以就係咁捕住 FCK 幾時開始賣飛。
但佢地宣布話最先只會開放比會員買飛，有飛剩就會開放比今季有係主場睇過兩場波既買飛。 我地只係上個月睇左場打比戰…. 但無理照每日 f5 官網，突然發現我地個戶口有得㨂位，唔諗太多就㨂左同上次差唔多既位仲比錢成功！ 一日之後球隊就宣布門票售罄～
首回合係星期五上演，我地四點準時收工就由屋企出發，先去麥當勞食飯然後再去到市郊既 Park and Ride 停車場。 我地著上可以代表主客隊既棗紅色淨色衫，遇到邊方面既球迷都可以做牆頭草甩身。 到達果陣仲有兩個鐘先開波，但個停車場已經滿哂！！ 一來另一個 P+R 停車場比嘉年華霸左，二來我地個 P+R 被分左一半比作客球迷！！！ 到達時眼見個停車場已經滿哂咁濟，入到去去到最後先發現原來仲有幾行剩，我諗如果遲多半個鐘黎應該就會滿哂。
泊低架車就行去搭穿梭巴士上山，今日間歇性打風， 睇天氣預告話今晚 7－8 點會有一大舊黑雲… 我地落車果陣都 feel 到越黎越大風所以想盡快入球場。 架巴士上到山之後我地唔可以沿平時條路行去球場，因為啲警察封左路用黎分開主客球迷，我地要兜勁大個圈去到西看台先可以再行返去龍門另一邊入場。 好在入場超級順利， 大約七點我地就上到自己個位！無耐舊雲就到左落超大雨！！！ 真係好彩呢個係德甲/世界盃球場，完全唔洗擔心要 dup 雨～～
當時離開波仲有差唔多個半鐘，但西看台已經差唔多滿哂，我地呢邊既看台都已經好多人。 未開波大家就已經係咁唱歌比客隊黎個下馬威。對比起上場既 Saar-pfalz 打比，今場波既氣氛勁幾倍！！！ 上場波見到西看台得一少部份人會出力打氣，主場球迷組織把聲完全被客隊蓋過哂。 但今場係全個西看台都一齊出力！！ FCK 既西看台德國第二大企位看台，今晚見到全個看台既人都一齊舉手拍手，呢個氣氛係德甲某啲球隊都未必造得出！
一路都諗唔明點解氣氛會同我地上次睇果場差咁遠，可能今場係啲有入過場既人先買到飛？又或者升班緊要過支持自己隊波贏n年無見既死敵？ 去到接近開波，西看台就拉緊準備左既 choreo，一塊半透明既大橫額寫住 BETZENBERG，其他看台就舉起紅白紙將球場變成紅白紙。 等到球員入場時，西看台既球迷組織就開始放煙， 不過好似唔係好夠煙做唔出早兩星期紐倫堡果個效果！
作客球迷就係開波前大約十五分鐘先入到場，佢地好趕急咁係看台前掛旗就拿拿聲開始唱歌。 好可惜主場球迷今場氣氛太勁， 要好專心先聽到作客球迷既聲音。。。老實講㨂呢場波係想睇 SGD，聽唔到佢地既打氣聲係有啲失望，但有主場球迷既聲音搭救！開波後，除左西看台之外，幾乎所有主場球迷都舉起雙手指住作客球迷黎鬧，好正。
德丙既 FCK 可以話係禁住德乙既 SGD 黎打。 客隊係過去 17 場波只贏過一場，而 FCK 就臨尾香，贏左 Saarbrücken 之後就無再贏過，本來有得爭直接升班，最後要踢附加賽，明明個領隊由隊波由地區聯賽水準執到有份爭升班，點知管理層無啦啦話要炒左個領隊， 然後主席話頂唔順管理層太 on9 所以決定辭職。 就係幾日之外 FCK 隊波搞到散哂，所以呢兩場附加賽可以話係廢鬥廢。
雙方球迷全場波不斷咁放煙，看台上面太多野睇，完全唔記得左睇波。不過都無錯過啲咩，兩邊都無咩接近致命既埋門… 好快場波就完左。
上場我地大讚 FCK 既交通安排好好， 今次一完場就已經有好多人走左。 當我地行返去巴士站果陣見到有幾架滿座既巴士岩岩駛走左，而巴士站就有好多人等緊車。 睇人數我地都應該仲迫到下一班車既… 但首先架車要黎囉！！ 係山頂有幾架巴士駛左落黎，但佢地係駛落去接作客球迷。 等左十五分鐘終於有車！！ 咁岩其中一道車門停係我地面前，點知道門壞左唔開既！！！ 即刻奔去另一道門，好在我係北京地鐵學過幾招成功最後一個攝到上車。 好快巴士就開車… 原來我地真係超好彩，因為另一條路起碼有幾百人塞左係度等巴士！！！
我地架巴士越駛越慢… 經過左一堆作客球迷。 車內既人就開始唱歌鬧車外既黃衫人。 呢個時間架巴士係正班作客球迷面前停低左，老實講我唔係好怕呢啲場面， 我企係巴士道門後面一直望住外面啲人，等緊同佢地有眼神接觸睇下佢地下一步會點。 點知完全無人望過我囉， 其中一個人係咁追住架巴士大叫「夠膽就落車」 「落車隻抽呀！！」 又再老實講，雖然我望住佢大叫我係想笑既，但我知東德人… 特別係 Dresden 人真心講得出做得到。 係我笑出黎既時候就已經有幾個防暴衝左過黎推佢走，同時架巴士終於可以正式出發返去停車場。 出奇地勁快就可以離開停車場， 本來諗住要係停車場塞半個鐘，而家好在個個仲係山頂等緊車，變左我地最後仲早過預期去到莎蘭。
今晚我地係莎蘭過夜，因為第二日我地要出戰莎蘭盃決賽！