07.05.2022 德國西南地區聯賽 第 37 週 FSV Frankfurt - SV Elversberg Stadion am Bornheimer Hang 賽果： 1:1 (1:1) 入場人數： 1899 （約 450 名作客球迷） 門票： €12 更多相片
明明今季開季開得麻麻地，完全唔知隊波點樣突然有得爭冠軍？仲記得兩個月前作客緬恩斯贏波時先叫做過左第一關，雖然我地講左好多最理想既情況，人地點點點我地咁咁咁就有機會升班，但當時只係得個講字，無咩感覺真係會升到班。緬恩斯本來係榜首但比我地痛擊之後就收左皮，仲有本來同我地差唔多分既球隊既表現都突然失準，去到呢排就得返 SVE 同 Ulm 爭分。
上次主場睇 SVE 時講過只要贏得四場就可以升班，今年係近年第一次唔係要被動睇對手賽果先可以有機會升班。 去到上星期我地都仲係同 Ulm 同分，但以得失球差壓過對手企係榜首。 總之自己唔犯錯就唔會出事，淨返落黎既仲要係對榜尾球隊。 不過你知啲球員最中意就係係啲以為食硬既比賽中發神經… 所以我地都唔敢有太大近望住，踢完一場先再諗下一場。
點知就係上個星期，我地作客 VFB 上半場落後反勝既同時，Ulm 竟然和波失分！！！即係我地領先兩分，淨返兩場就係今日要係我地身上搶分護級既 FSV Frankfurt 同埋最後一場對同州死敵 Homburg. 以 SVE 近期既表現黎講應該無咩問題。
當 SVE 宣布作客球迷巴士既安排後，大批球迷即刻衝既訂飛，好快就已經有兩架巴士滿左，最後要加到第五架巴士先夠位，同埋一早已經賣出左 270 張作客區門票。去到比賽當日好浩蕩咁由 Kaiserlinde 一齊出發！ 而我地就由屋企搭半個鐘車就可以去到球場門口… 今日氣溫大約 22 度，但藍天無雲一大個太陽係正頭頂，體感似 30 度多啲…
我地大約一點到達球場門口， 當時連門口都未入得，有幾個球迷已經係度排緊隊。 五分鐘後佢地就開口放人入去，我地第一時間衝去買野飲同野食， 天氣熱到我地即時隊左兩杯蘋果酒 ._. 大約十分鐘後巴士大隊終於到場， 佢地慢慢 setup 所以打氣物資，等到開波就大家一齊出力為球隊打氣！
對上一次有份爭升班已經係 2017 年既事，當時我地雖然贏得聯賽冠軍，但係去到附加賽 SVE 不敵巴伐利亞區既 Unterhaching 升班失敗。果排因為呢個垃圾附加賽制搞到西南地區連續五年無球隊能夠升班，辛苦左一整季最後竟然係由兩場比賽決定升班定留班！ 去到 2018 年賽會終於改制，雖然有兩個地區未能受惠，但起碼西南地區既冠軍可以獲得直接升班既資格！ 改制後 Mannheim 同 Saarbrücken 都立刻先後升上比較屬於佢地既丙組，上年我地日夜祈求 Freiburg 失分未能成功，黎到今年…. 終於到我地？
開波時我去左另一個看台諗住影幾張相， 相都未影完 SVE 就已經入左波！！！當時獨自一個尖叫拍手慶祝， 拿拿聲影夠相就衝返去大隊度圍爐一齊打氣。 由於天氣好+ 我地領先，區內個個好落力唱歌， 平時每首歌可能 loop 幾次大家就唔相再唱落去，今日每首歌可以唱到超過五分鐘！我地要一路提住大家，我地升班人地降班，唔可以唱得比對方差！ 然後…. 向我地方向攻既主隊有一個攻擊，望住個波碌緊去龍門外… 已經鬆左一口氣。 點知… 原來我前面枝旗擋住左既視線前面有個白衫企左係度…. 佢伸左隻腳出黎篤左個波入網… 1:1。
主隊球迷好開心咁慶祝，因為佢地今場只要有一分就九成九護級成功！ FSV 一直都活係 Eintracht 既陰影之下，但球隊成功一直都唔錯係德乙徘徊，有幾個球迷組織為球隊打氣。 後來因為管理不善搞到隊波越踢越差，最後直線落左黎地區聯賽仲差啲要再降落去… 去到而家我地望到對面個看台得返小貓幾隻。 但雖然佢地唔多人，但佢地既佈置做得好好，令到一個小小看台區域睇落唔似咁細。
ok. 而家先開左波半個鐘，上場波我地先落後都追得返，要升班就要有可以扭轉局面既能力！ 就算和波我地都會繼續企係榜首，所以就算失左波都無損大家既心情繼續一齊打氣，同時手拎住電話睇 livescore 要知道 Ulm 作客另一隊降班球隊 (Großaspach) 踢成點。 半場佢地仍然 0:0 。
下半場開波，SVE 開始搶返多啲控球權慢慢搵入波機會。 十分鐘後…. 有人大叫 Großaspach 1:0!!! 作客球迷就好似自己隊波入左波咁 YEAAHHHH，緊接落黎既就係唱歌越黎越大聲。 如果 Ulm 輸波就會落後我地三分，即係下場波只會係例行公事… 只會得返數據上佢地有可能反超前我地。
由呢一刻開始，作客看台既打氣聲就完全無斷過。 唔夠十分鐘後… 又有人大叫 Aspach 2:0!!!! 我地又係度慶祝入波…. 然後一齊唱關於升班既歌！ 又一個十分鐘…. 3:0!!!! 完全唔敢相信我地真係要準備升班…. 但今場波又未完場始終唔可以慶祝住～ it ain’t over till it’s over 嘛…. 細細個已經聽過啦。 我地知人地隊波踢成點，場上啲球員未必知架嘛。 我地拎住大聲公向場內球員宣布人地落後緊三粒。。。
岩岩咪話對方只需要和波有一分就可以九成九護到級既… 而一分對我地黎講唔係唔好，但贏波個感覺會安全啲。 但去到而家場波得返10 分鐘既時候，我地既主要對手落後緊三球，如果佢地真係反勝到我地會服既。 FSV 同 SVE 球員好似突然有個默契咁….
最後十分鐘變成搓波練習！ 個波一直係 SVE 球員既腳下， 係後場由左閘傳波比兩個中堅然後傳比右閘，然後傳返轉頭 … 而 FSV 球員就係個波去到兩隻閘腳下先會衝前「嘗試」搶下波咁.. 搓足十分鐘。 主隊球迷都拍哂手咁好感激 SVE 唔趕盡殺絕。 去到最後球證都唔打算補時，一路望住球場大鐘跟我地倒數，90分鐘準時吹雞完場！！！賽後有人話呢十分鐘係 1982 世界盃 Gijon 2.0 喎，不過就連其他球迷都話佢地無野搵野黎講..
完場後，好多人走到落看台底，唔知點樣就推開左道閘衝哂落草地…. 我就做清醒果個留返係看台望實啲野先， 點知對面會唔會有人混水摸魚入黎搶野架… 好在班友好快都醒覺佢地 dum 低哂 d 野好 on9，就拿拿聲執返啲旗拎上車先，然後再返入球場慶祝。 主隊亦都好好咁唔單只無趕走走左落草皮既球迷，仲恭喜我地已經叉左半隻腳上德丙，最後係球場播出 SVE 既會歌，等球迷同球員可以一齊慶祝。 最後係球場玩左大半個鐘先慢慢離場。
我地一齊行去巴士之後就行去市中心食飯，離 FSV 球場唔遠就有韓式炸雞食！！！ 企左三個幾鐘終於可以坐低… 一口氣隊左一大杯啤酒之後先慢慢回味頭先發生過咩事。 我地下季唔再限制係西南地區… 我地將會要穿梭全德國去唔同既球場作客。。。
搭巴士返左去 Elversberg 既當晚已經通宵慶祝， 但我地而家更期待既係，下場煞科戰返到屋企係死敵眼前瘋狂慶祝～～～～ 希望到時球隊會提供免費啤酒同野食ok?? 如果唔係我地會好似史浩克啲球迷咁剷草皮同拆龍門慶祝架！！！！(btw 同一日兩隊愛隊一齊升班。。。。行緊咩運？？）