20.11.2021
德國西南地區聯賽 第 19 週
FC Homburg - SV Elversberg
Waldstadion Homburg
賽果： 2:1 (1:1)
入場人數：2276 （約 400 名作客球迷）
門票： 9€
更多相片  

好似差唔多兩年無去過 Homburg 作客，近兩年都因為時間唔岩同埋武肺所以都無去過。 莎蘭其實都有唔少球隊，但我地最憎既就係 FCH. 唔知點解佢地啲球迷特別無腦，佢地近年竟然同賀芬咸既球迷組織結盟，簡直係球迷界同莎蘭之恥。

而我地亦都機緣巧合下同賀芬咸既死敵辛特侯遜做左朋友，雖然無話正式公開結盟，但大家都間唔中去幫手助下陣。 佢地一大班人約好左比賽當日會去 Homburg 市中心一齊行去球場。 我地就由法蘭克福出發直到球場，係球場附近見到一大班黑衣人，本來以為係自己友，點知原來係對方連同賀芬咸一行大約 50 人行緊去球場。 我地既人當時已經一早到左球場所以無事發生。

入場前要出示 3G 證明。 雖然武肺呢排係德國狂爆，但都無阻大家聚埋一齊去睇波。 其實我都唔知點解會完全唔驚，平時返工我都唔係好想坐太近任何人，搭車返工又會驚旁邊既人有毒。 但去到球場就會即刻忘記危險，同大家有咁近企咁近！

主場球迷開波前大約十五分鐘開始準備啲打氣物資，係看台前面掛起左一幅大橫額。 球員入場時佢地打開寫住 Karlsberg Stadt。 Karlsberg 係來自 Homburg 既啤酒廠，成個莎蘭都飲 Karlsberg 而討厭來自鄰州既 Bitburger。 不過 Karlsberg 近年越做越霉，Elversberg 同 Saarbrücken 既主場都轉左搵 Bitburger 做啤酒贊助。 我地係已經近兩年無係主場飲過啤酒！ 唔知對面係咪因為咁而要整個 Karlsberg Stadt ._. 真心唔知用意為何？ 想我地羡慕你有得係球場飲 Karlsberg?

雙方球迷成場波互相對罵對唱，我地鬧佢地係莎蘭之恥鬧佢地係豬，佢地就叫我地仆街仔，好有火藥味。 對方先入左個越位波，然後我地係半場前追和。 我地上幾場踢得唔錯… 唔洗講都知黎到呢啲重要比賽時就會失盡。 比波唔到位，身位又輸蝕比人撞一撞就彈開左，所有野都力不從心咁。

下半場開波時作客球迷既氣勢如虹，對面就再次拉開條 Karlsberg Stadt 橫額同一塊藍色大旗係旗下變裝，即係佢地準備放煙花。呢個時候我地有個單刀機會但被對方龍門鏟到飛起，直紅離場。 花左幾分鐘療同換人對面班豬球迷都仲未變完裝。到我地準備可以開自由球時佢地終於搞掂放綠白煙同日光日白放煙花。 球證吹雞要所有球員離場。 再過多兩三分鐘終於可以開罰球，失左機會但我地歌照唱。 十分鐘後對方有個角球機會，個波飛左去龍門後面。 球證突然直指十二碼再拎張紅牌出黎…. 作客看台上無人知咩事。 後來先知係手球… 唉。 咁就送左三分比人。

去到呢球十二碼之前班球員其實踢得好左， 去到最尾果二十分鐘就越踢越差，唔洗波都要偷笑。 雖然好唔憤氣，但班球迷既表現真係好正。 好耐無試過咁投氣去為球隊打氣～～～ （唔知我地會唔會變 corona hotspot 呢？）

離場時有防暴警察前後包圍「保護」 我地離場，班主場球迷離遠係咁係度挑釁我地。 行到去作客停車場時，我地班人成功突圍脫離班警察成功走左入住宅街道。 同時班主場球迷向我地既球迷巴士 dum 左幾舊煙…. 搭球迷巴士既通常都係啲（醉酒）死忠阿叔…… 班友激嬲左我地啲阿叔， 比其中一個阿叔一野兜頭打左佢一拳打到佢仆左落地爆埋鼻 😀

我地後生仔就係住宅區玩捉迷藏，去到某條街同對方球迷相遇短戰左一輪… 後來都係比警察捕到，最後大班人被夾住去停車場夾到返去 Elversberg… 我地就好在係警察黎之前甩左身可以早啲返去食飯。。。

下星期輪到我地去幫辛特侯遜助陣，同埋另外有兩場波，好耐無試過一口氣連睇三場波。 黎緊唔知會唔會又唔比入場睇波，所以有得睇就一定要去睇!!