08.08.2021 德國足總盃 第一圈 SV Elversberg - 1. FSV Mainz 05 Waldstadion Kaiserlinde 賽果： 2:2 (7:8) 入場人數：2480 （約 250 名作客球迷） 門票： 13€ （企位） 更多相片
突然又黎到新一季既足總盃首圈，我地好似無咩抽籤運，次次都只係抽到啲麻麻地既球隊。你知我地中意睇球迷多啲，緬恩斯可以算係莎蘭既鄰居，好似可以成日見咁無咩驚喜。 不過起碼對對緬恩斯既感覺係有機會偷到雞再爆冷殺入第二輪！
上年首圈輕易贏左聖保利，當時只可以係球場外爬牆睇。 今日我地終於可以入場啦！！！ 對上一次入球場係 2020 年二月尾，歇冬之後踢左幾場就進入左漫長既 lockdown。 時隔 18 個月，我地終於可以常常正正咁買飛入場睇波。 只可惜因為武肺所以對入場人數仍然有限制，最多 3000 人入場。 大會公布左賣飛時間之後，第二日 fan shop 就大排長龍一個下午就賣清光。
等左好耐終於等到星期日，大家早幾個鐘已經係球場對出既酒吧聚集。 人無變、廢話無變，一年後大家既笑點仲係一樣，講黎講去都係咁多年都仲講緊既話題。 今日仲有來自其他球隊既朋友一齊黎幫手打氣助陣，看台上既陣容睇落好多人咁。
入場時仍然要過安檢，唔似得上星期去科隆咁直接入場，每個州份都有唔同政策。搜身時要背住工作人員比佢搜減少面對面接觸。 然後就要出示所謂既 3G 證明：打左針、24 小時內既武肺陰性檢測證明、或者曾經確診證明，出示完就要用電話打卡或者填表入場。
人場後就即刻係心入面大叫：我返黎啦！！ 望住對面既紅色既作客看台，可惜佢地既球迷組織因為抗議 3G 政策所以唔隨隊。 其實我都好討厭 3G 同要打卡政策，點解我去到邊都要被紀錄低？不過我悶左咁耐，我願意犧牲一下換返啲娛樂比自己…
係看台上面佢地噴左好多腳板係地上，用黎劃位等啲人記得保持距離。 如果唔保持距離就要戴口罩。 但其實劃得勁廢，如果真係跟啲腳板企既話，每人相隔 1 米都無… 我地最後都無保持過距離，啲工作人員周圍叫人企開啲，但黎到我地呢度就扮睇唔到直行走左，哈哈。
賽前天氣預報係話四點鐘會有一舊大黑雲飛過，會落雨落足一個鐘。 我地做好哂準備，連縮骨遮都帶埋。果然好準時係雙方球員進場後，舊雲先係球場後面飛過，再係我地頭頂黎個狂風暴雨，擔遮其實都無用。 場雨淋唔熄大家要支持球隊晉級既果團火！ 場雨最後落左大約五分鐘，左邊既天空開始慢慢變藍，太陽仲走埋出黎… at the end of a storm，我地深信會有 golden sky….
我地對住既係德甲球隊，雖然唔係話頂級球隊，但人地隊中有唔少國腳級既球員，係進攻既流暢度真係差幾皮。 大部份時間我地都可以話係捱打，顧得後場又顧唔掂前場，要好專心咁搵對方失手果下突擊先有機會做下攻擊。 一甩波對方就好似帶到個波去我地禁區前起腳。 如果今場唔係我地個龍門 Frank Lehmann 上哂身，應該上半場就輸左幾球。 好唔容易捱到上半場完場， 感覺似上年對聖保利果場波咁，只係角色調返轉。
下半場 SVE 向我地方向攻，但球證一吹雞個波就已經飛左去對面，我地就差啲失波又死唔去，心諗唔通大難不死必有後福？ 我想講我心跳由一開波已經踢得勁快勁緊張，要靠打氣勁舒發情緒。 去到 73 分鐘，望住對面後防甩左波，我地既24 號前鋒 Schnellbacher 真係反應好 schnell 咁搶波向龍門出發，單刀扭過埋龍門射入一比零！！
係啦，我地捱多十五分鐘就可以收佢地皮啦！！！！望住個鐘去到 89 分鐘，心諗好快就可以安安樂樂飲返啖汽水。 點知….. 點知對方係最後一刻追和。 呢一刻個看台靜到淨係聽到雀仔係度叫。 ok…. 你知我地年半無入過場，所以想我地係球場留耐啲姐。。。 ？？
加時上半場繼續捱打，去到加時下半場球隊再次向住我地攻過黎。開波五分鐘，又係 Schnellbacher 帶住個波突破左後防，去到龍門面前竟然勁輕鬆了高個波笠死龍！！！！！ 成班人衝落去欄杆前面慶祝，我淨係識得企係度高呼。 呢條友應該下年會比人簽去踢丙組… 兩個入球都表現左佢 finishing 既實力。。 後來睇返先知原來助攻既就係 Lehmann. 今場真心要有兩個 MVP.
領先一球先最危險，最尾果十分鐘我地要係咁啪救心。 可惜都係守唔住，再次比對面既 Burkardt 追和。 ok… 射十二碼囉。。。 仲好，拿拿聲搞掂你！
射十二碼向住我地呢邊看台，睇住佢地一個一個咁射入，我都唔知射左幾多輪。 對面個龍 (勁似卡利奧斯） 成功捉到兩次路仲拍到個波，好彩都仲入到網。 Lehmann 就捉唔到路。 捉唔到路都無咩問題既，人地可能射失架嘛。 去到某一個點我個心真係好似就黎爆炸咁，開始有種唔理邊個都好，快啲射失完場啦… 可惜去到最後一輪，我地個 5 號射中楣彈出….. 原來已經射左八輪。
佢即刻踎低抱頭，我地都啞左。 其他球員即刻跑過去安慰佢，我地回過神之後都即刻拍手鼓勵佢，一齊大叫佢個名。 我好憎呢四隻字但今場波真係雖敗猶榮，成隊波 120 分鐘出盡哂力踢上踢落，唔夠班就唯有出多幾分力。有睇呢場波既人都一定會鄧我地唔抵！！！所以我地輸左都無覺得嬲… 淨係想球員知道我地無怪佢～～～ 要怪都唔會淨係怪佢一個囉，可以怪埋點解我地個龍捉路咁廢波皮都無掂過囉～～
Anyway，柏林之路既夢咁就完左。 完場後我感覺好似自己有份落場踢咁勁勁勁攰，三個鐘無飲無食過野，返到去個心情都仲係勁激動乜都食唔落去。 過多半個鐘開車返法蘭克福路上先識得肚餓要食返個包。 而家我地要向丙組之夢進發，希望班球員可以 keep 住好似今場咁搏殺，唔好輸埋啲無謂波，等我地輕輕鬆鬆提早升上丙組ok??