12.06.2021 德國西南地區聯賽 第 42 週 FC Bayern Alzenau - SV Elversberg Sportzentrum am Prischoß 賽果： 0:3 (0:2) 入場人數： 150 （約 15 名作客球迷） 更多相片
完全無諗過今季竟然可以正正式式咁入球場睇返場聯賽！ 黎到今季最後一週，我地終於入到場睇波。雖然唔係主場，但作客球場離我地只有 30 分鐘車程，可以話係另類主場。
自年頭起，德國政府開始分階段接種疫苗，去到六月頭已經開放比所以人登記排隊。 武肺疫情由十二月左右開始狂爆，爆到四月尾終於開始緩和，去到五月終於叫做正常返。黎到六月頭，商店同餐廳終於可以有限度開放。巴伐利亞州仲容許 250 人入場睇波！
其實係有個巴伐利亞地區聯賽，不過 Alzenau 話佢地近 Hessen 多啲，所以入左 Hessen 既足協踢西南地區聯賽唔踢巴伐利亞地區。 當我地知道可以入場睇波時，即刻寫 email 去 Alzenau 問可唔可以留波飛，第二日佢地好快覆左話留左兩張， send 張過數證明比佢之後，比賽日去門口拎飛就ok. 我地成功左之後就即刻係個谷度 share 比其他人知，想入場睇波就快啲 send email 去留飛。
原本佢地話要有 negative test result 先可以入場。 德國居民可以去藥房免費做快速測試，每星期最多兩次，每次檢測結果既有效時間係 24 小時。 我地就諗住比賽日可以一早去藥房，negative 既話就可以去睇波，然後就去餐廳（！）食飯，食完飯又可以去酒吧飲返幾杯。 去到比賽日一星期前，德國疫情越黎越好，球隊話唔洗有negative reult 先入得場，不過我地之後既行程都係要帶張檢測結果，所以都無咩所謂。
黎到比賽日，我地一早去買餸，去藥房比人吉鼻，去郵局寄野，打一個鐘機，然後就出發去鄰州。 係球場停車場外已經見到有幾架熟悉既車牌。 去到球場門口講低自己叫咩名，佢就比飛你入場再登記。 我地買飛時無講到係作客球迷，驚佢唔比買，所以只由佢㨂位被分到去西北看台。
入到場除左見到塊草地好開心之外，仲見到小食亭如常運作！ 有腸仲有啤酒賣，完全無諗過竟然可以係球場入面飲酒食野。 看台上面佢地放左幾張摺凳同長板凳，我地跟住波飛上寫既號碼去我地既長板凳上，背住太陽開心地等開波。成個德國今日得兩場正式賽事，一場係呢場，另一場係西瓜隊 Schweinfurt。 今場波有 150 人入場，有超過 70 個花生友 check-in… 大家都你我望我眼咁估下對方係邊度黎。
西南地區今季有 22 隊波，整季有 42 場波，踢極都踢唔完咁。 SVE 今季同每年一樣，踢得好好，但又有幾場發夢成分，去到中段覺得隊波勁廢好似升班無望咁。人地 FSV Frankfurt, Steinbach 果啲踢少幾場又拋離幾分咁，點知踢下踢下原來佢地失哂分，我地又升返上第二，同一名既 SC Freiburg II 爭升班。 去到尾三果場 Freiburg 失分，大家就開始計數… 因為尾二果場就係 SVE 對 Freiburg. 如果我地贏埋最後果兩場既話， 冠軍同丙組之位就係屬於我地！
但世事又點會如我地意呢… 上場我地先入波，後來都係頂唔住輸左。 又一隊波係我地個球隊確認升班。 去到最後呢場只係無咩意義既比賽。 不過有另一樣野我地可以爭取下，就係 SVE 係全德國今季入得最多波既球隊。 去到開賽前，SVE 射入左 95 球隊。 我地話要大數已確定降班既 Alzenau 黎破百個入球。
我地係上半場好輕鬆咁射入兩球波，睇個勢我地真係有機會可以下半場入多三球。 半場休息時我地成功同朋友會合，成功鼠入左去龍門後面既作客區，望住 SVE 向我地呢邊攻。 下半場佢地無再咁肉緊，只求唔失波唔輸波就得。 點解？ 因為 Offenbach 尋日贏左波，開賽前排第二。 我地要贏波先可以以一分之差過返佢地。 又點解爭第二咁重要？ 因為有報導傳聞話 Freiburg 可能會放棄升班資格喎。。。我自己又唔覺得佢地會，因為上場贏左之後佢地好開心咁慶祝，無理由一場歡喜一場空卦？
我地隊中有個莎蘭本土球員 Lukas Kohler 宣布下會離開球隊，雖然佢唔係自家青訓，但佢都係自己人。由 2014 年踢到而家 34 歲。唔知佢地因為簽左其他球隊定係諗住退休呢？ 我地最後請 Alzenau 食三隻蛋，以三分完結今季既賽事。
完場後，我地就去法蘭克福食拉麵。好開心終於可以入餐廳，可以八掛下隔離枱講乜～ 食食下飯見到歐洲盃既比數，見到艾歷神既新聞，心情即刻一跌。 當時未知佢情況如何，但我自己都經歷既同樣事件，最後好好彩佢同我一樣醒得返！醫生都應該唔會比佢繼續做職業球員，不過今年大家都學識既一樣野就係身體健康先最重要。
希望今日呢場波會係今年既 first of many. 千奇唔好有第三波，唔好再比假希望我！！！