27.06.2020 捷克乙組聯賽 第 27 週 FK Baník Sokolov - FK Varnsdorf Stadion FK Baník Sokolov 賽果： 1:0 (1:0) 入場人數： 490 門票：60czk （約 €2，無劃位） 更多相片
呵呵，今個星期有幾個好消息～ 最開心當然係利物浦終於贏冠軍！！由出世到而家就黎三字頭，終於見證到愛隊成為全國第一。雖然我已經好耐無睇過直播，但黎到呢刻咁多年既生日願望終於達成，同埋諗下咁多年同朋友一齊走過既日子，睇返舊相諗下啲當年既少女心事，忍唔住喊左出黎。
呢個週末本來就會出發去愛莎尼亞避開歐國盃去睇聯賽，但因為武肺所以未能成事。六月頭多個國家開始開放邊境，同時慢慢比群眾聚集。鄰國捷克就係第一個比球迷再次入場睇波既歐盟國家，消息一出，一堆德國 groundhoppers 立即飛去睇波啦！
我地一路都心大心細，去唔去好呢？問題係佢地容許一千人入場，我地又唔想去啲閒閒地都有幾千人入場既球隊，因為咁樣就感受唔到真實氣氛。有啲捷克球隊搞左搞武肺盃 (Coronacup)，但又唔想揸 n 個鐘車即日來回睇啲超低組別聯賽。最後我地㨂定左最近德國邊境既 Sokolov，睇乙組比賽。
德國既 groundhopper 圈子係過去幾個週末都去哂捷克，係 instagram 碌黎碌去都淨係見到捷克啲球場。有啲球隊仲話每場只限 50 名德國人入場 😀 好在我不是德國人，唔洗驚比人踢出場～～
Sokolov 離法蘭克福大約 350 公里，離德國邊境大約 40 公里，揸車既話四個鐘內就可到達。離 Sokolov 不遠有個好出名既溫泉小鎮 Karlovy Vary。KV 既德文名係 Karlsbad，當地差唔多個個都識講德文，溝通完全無難道～捷克既高速公路係收費既，我地唔想因為最後果 20km 就要比十幾歐去買幾日既通行證，所以㨂左行山路。雖然路途崎嶇，但住係法蘭克福平地一年多後，好開心可以揸下山路，仲有幾個 hairpin 彎！！！
去到 KV 市外有個大型（勁吉）既爛地停車場，3.5€ 就可以泊足一日。一到步立即搵間餐廳食野！！！！ PIVO! GULASCH! DAM SI SVICKOVU! 每次去到捷克既第一餐都一定係食同一樣野。gulas 係類似炆牛肉咁，來自匈牙利，但係捷克同樣係國菜～Svickova 都係炆牛肉，但醬汁唔同，最特別既係配紅莓醬！係捷克多幾日既話都係食 gulas。或者會諗下食佢地既炸芝士～
食飽後就慢慢行去市中心，一街都係德國人，完全可以想像到正常既旅遊高峰期一定超多人超迫！呢個地方除左受德國人歡迎之外，仲好受俄羅斯人同中國人歡迎。每幾間舖都係專做中國旅客生意既，但大部份都無開門或已收皮。
係市中心小小走馬看花咁沿住條河仔行左個圈就返去拎車，出發去 Sokolov。半個鐘後到達球場門口，好好彩仲有車位～ 旁邊有好多德國車牌～～～落車唔夠一百米就已經係球場門口。買波飛後排隊入場，佢地要為所以人量體溫，低過 37.5 度先可以入場。
早排有個德國人被量出 37.6 度被拒入場，佢就走去超市買左罐啤酒放係額頭再返去球場排隊，成功入場～一入到去，望到塊草地，望到看台上啲人，再深呼吸一下球場草地既氣味…. 差唔多四個月啦！！！！我部相機對上一張相係 3 月 8 號影架，今日係 6 月 27 日。
今場波兩隊波都無咩球迷，係得市內既阿叔會入場睇下波咁。買左杯啤酒後就走左去看台最頂睇開波。 本來幾個月無睇波啲皮膚無哂色好想曬下，但天氣預告過未來一兩個鐘會落大驟雨，所以寧願搵個地方可以安樂睇波～
比賽再無進場儀式，班球員各自各入場埋位就算。 看台上既球迷都要保持距離，大家要隔一兩個位先可以坐，仲有每兩行都有膠帶欄左唔可以坐。 開波無耐主隊就先射入一球靚波，以為有好多入球睇，點知呢球就係全場唯一一球。 30 分鐘後真係開始落雨，勁大粒雨點打落看台既鐵皮上蓋勁嘈，仲閃左幾下電。 原本坐係露天看台既人全部衝哂入黎，完全無人再理要保持距離！！
身邊啲德國人話如果腰斬就好笑。心諗真係腰斬既話我斬左你把烏鴉口先。佢地又話咩係德國淨係有天氣預報話會有暴雨都會延期囉。大佬，呢度係捷克囉好無，你估個個都好似德國人咁咁矜貴咩～ 後來個天開始閃電我都有啲驚驚地，好在已經半場，可以去買條場食休息下。
下半場開波無耐又開始落雨，大雨到差啲連個波都見唔到！落左十分鐘終於落哂，太陽都慢慢出黎。有個阿叔好落力帶打氣，「我叫 Banik，你叫 Sokolov!!!!」勁多中氣十足既阿叔跟住一齊叫，多得佢地，隊波成功搶到呢三分，暫時以一分之差逃離降班區。
完場後，我地去附近 Tesco 買手信。買左 KV 著名烈酒 Becherovka 。當年我捧左三枝返香港，比我嫲嫲試飲仲比佢鬧我學人買埋啲咁濃既酒，佢仲話「你小朋友唔飲得呀，嫲嫲先飲得」，就係咁比佢沒收左。仲有 KV 著名威化餅，買左一箱啤酒，tesco 薯片，想買埋香腸用黎 bbq 但唔記得帶急凍袋唯有下次再買。就係咁，夜晚十一點半返到屋企，沖個鐘勁開心咁去訓覺。
足球呀足球，你幾時先可以回復正常呀？