29.02.2020
德國西南地區聯賽 第 22 週
Bahlinger SC - SV Elversberg
Kaiserstuhlstadion
賽果：0:0 
入場人數： 986 （約 60 名作客球迷）
更多相片

呢場係我地下半季可以跟大家坐巴士去作客既唯一一次機會，咁岩三月前仲有假淨，就係星期五請半日假早一日去莎蘭過夜～

星期六朝早食完早餐就去球場停車場同其他球迷會合等巴士到，今次既路線會經法國東北部經 Strasbourg 再到 Freiburg 以北既 Bahlingen 小鎮。同熟悉西南地區賽程既人講起 Bahlingen，佢地都會問係有 h 定無 h。 因為同一個聯賽入面有另一隊波叫 Balingen ，位於斯圖加特附近。 所以呢隊波既正名應該要叫有 h 既 Bahlingen，Bahlingen mit H.

搭左三個鐘車，一到小鎮外就有警察帶路。去到球場外既小路，小到連巴士都入唔到～最後要係外街落車再行去球場。 呢個球場雖然細，但都有個分隔左出黎既作客區，但呢個區域就得幾級樓梯，一個小食亭同一個流動廁所。

保安好好人咁黎話可以開閘比女人去主場區果面用正常既廁所～所以我就借尿遁去對面影幾張相同睇下主場有咩特別野食。 主場區特別野食就無啦，但竟然可以成枝紅／白酒咁買，連香檳都有。果然係來自黑森林地區既球隊，無紅白酒不歡。

返到去作客區我都即刻買返杯白酒溝橙汁黎飲～～（呢邊無得就咁白酒咁買），anyway 都算係一個經驗。 場波有啲似上星期咁，攻極都好似唔係好入肉咁。有幾次都差咁啲運，仲有超大風，有幾次我硬定個波明明要入網架啦，但有一陣大風吹走左個波！！！！ 最後和波都唔算唔合理，都應該係要可以贏到三分囉。

下半場尾段開始落大雨，完場後即刻奔返上車。經法國返去時又狂風暴風，好驚架巴士會被吹落山。最後返到德國時竟然見到藍天…. 希望下場可以好運啲睇到啲入球….