15.02.2020
德國足球丙組聯賽 第 24 週
Eintracht Braunschweig - 1.FC Kaiserslautern
Stadion an der Hamburger Strasse
賽果：2:0 (2:0)
入場人數：17,842 （約 1500 名作客球迷）
門票： 31€（座位）
更多相片

趁有火車優惠我地除左訂左上個月去 Düsseldorf 之外，仲買左車飛北上去睇丙組賽事。

我地從來未睇過 Braunschweig，因為法蘭克福以北既地方都已經算係偏遠，以前好少話可以一日來回。但而家搭高鐵既話唔洗三個鐘就可以到達 （之後先發現原來再多一個鐘就去到柏林）。

星期六一早我地早過平時返工既時間出門口，去到法蘭克福南上車。架車由法蘭克福機場出發，總站係柏林，我地上車時成架火車都已經差唔多滿座！好好彩搵到兩個位坐，望住個太遠向北出發！

兩個半鐘後我地就到達 Braunschweig，車長讀出黎緊會係呢個車站出發既火車，包括柏林，Dresden, Magdeburg… 全部都係我地想去既地方 🙂 諗諗下呢度都算係一個福地，附近有好多波睇！ 當日我地係呢個城市仲見到幾班唔同既球迷，包括準備出發或者岩岩睇完波返黎既， Magdeburg, HSV, Hannover, etc…

賽前我地有兩個幾中可以係市中心行下，同其他普通德國城市一樣，無話特別期待啲乜，都係去舊城睇下舊建築，行下市集等等，然後就搭電車去球場，車程大約 20 分鐘。

電車站就係球場正門，落車唔洗 200 米就係其中一個入口。入場後我地要繞大半個圈先去到我地既看台。買左咖喱腸配薯條，加杯啤酒，食飽就入去坐。 我地買左第三行，諗住可以睇球迷睇得清楚啲。 點知一大個太陽由南看台上高射落黎，想影靚相都有啲難度。 咁我地見上面仲有太把吉位就走左上去避太陽同影相，但越近開波就越黎越多人，攝下攝下就連位都無埋，最後都係要走返落去第三行。

聽講 BTSV 有好多季票持有者，睇黎都係真既，因為由上面走返落黎，個個都係似都識哂身邊既人咁。仲有成場波佢地全部既反應都好激烈，間唔中仲會跟埋球迷組織一齊打氣！

開波前大約 20 分鐘，見到南看台班球迷拎住一塊藍黃格仔布蓋住自己。一開始覺得好興奮，諗住佢地準備左啲野黎表演，同時又好奇怪洗唔洗開波前廿分鐘就已經準備？？ 跟住就見到佢地拎住一碌超長既棍向上舉，似係想搞佢地頭頂既閉路電視。佢地可能係想玩野抗議球會監控佢地，最後就當然乜都無啦，五分鐘後佢地就拎返塊布落黎….

啲主場球迷勁興奮咁唱會歌，唱到開波就跟住拍手，氣氛出乎意料地好！場上面同樣好睇，今年睇左幾場悶波，終於可以睇落有組織又用腦既比賽。 主隊今季都仲有機會爭升班，所以佢地絕對唔會比隨時唔小心降班既 FCK 輸蝕。

成場波 FCK 有好多控球權，但唔知點解就係送唔到個波入禁區，然後又比主隊好輕鬆波入左兩球波。首名入球既係曾為 SVE 效力既球員，上個月先轉會黎 BSTV 咁快就為球隊射入第一球！！

FCK 帶左近千五名球迷入場，上半場佢地都仲氣勢如虹，失左兩球之後，佢地係下半場開波時展開一塊舊橫額話佢地係打不死既，希望球隊可以反轉局面。 領先兩球既 BSTV 都唔洗再急，放慢哂手腳，但 FCK 都係攻唔入。

BSTV 係 1967 年曾經稱霸德甲，呢一年係球隊史上最光輝既一年。每次主場比賽去到第 67 分鐘，班球迷都會拎條頸巾出黎為 1967 年唱歌唱足兩分鐘！

下半場好平靜咁完場，班作客球迷其實都係 80 分鐘左右就放棄無再打氣。都明佢地點解咁嬲既，班球員好似唔想出力追波咁。 完場後，班球員去到作客球迷，一睇就知班球迷係咁鬧佢地，企左唔夠半分鐘啲球員就轉身走人。

而主場球員就由北看台開始繞場一週，同看台前既球迷逐一擊掌。當時我都企左係第一行諗住影多幾張相，即刻讓返個位比黎比人。等到佢地去南看台我地就離場搭電車返市中心。

買啲野食就去火車站等車返法蘭克福，好難得今日一切順利，完全無 delay! 下星期西南地區聯賽終於重新開波，我地將會碰上討人厭既前領隊….