18.01.2020 德國足球甲組聯賽 第 18 週 杜塞爾多夫 對 雲達不萊梅 Düsseldorf Arena 賽果： 0：1 （0：0） 入場人數： 46,000 （約 6000 名作客球迷） 門票： 28€（坐位） 更多相片
黎到新一年既第一場波，同過去兩年一樣都係去睇德甲開齋～ 今場既作客球隊同上年一樣係雲達不萊梅。上年去睇漢諾威，今年係杜塞爾多夫。 上季漢諾威最後降班，今季我諗杜塞爾多夫都應該係同一命運。。。
仲有一樣同上年一樣既係，今次我地都係搭高鐵去睇波。原因係又有買朱古力送十歐火車卷～ 加上我地之前買火車飛儲落啲分可以換到一張車飛，好順理成章㨂左搭火車去睇波，仲要搭德國最快既軌道。 由法蘭克福去科隆一個鐘都唔洗！ （不過我地唔係搭直通車，所以車程長少少）
朝早先搭 s-bahn 出發去法蘭克福火車站，然後去麥當勞買早餐～麥記早餐對我黎講通常都係特別日子先有得食，所以超期待～～（不過德國無薯餅同熱香餅）然後就等上車。 好好彩搵到位坐仲準時出發。
到達第一個站之前，車長話我地班車準時之類，點次停左唔夠半分鐘，車入面突然顯示 +30 分鐘。心諗做乜事？？？？ 跟住車長就話因為前面有架車壞左，我地要係度等一陣…. 好在最後等左十分鐘就可以繼續出發。架車開到 300km／h 追返啲時間返黎，最後我地只係比原定時間遲左五分鐘到 Düsseldorf 。
呢個城市由今日起有船展，所以周圍都超繁忙。我地今次除左睇波之外，仲要探朋友，同埋的佢地同我地一齊去睇波～係佢地屋企食完飯我地就搭車去球場。
我地四條友係地鐵站夾硬迫左上車。 Düsseldorf 既開門機關係機械式既（法蘭克福係感應式），門口有個紅色區域，如果有人踩住果個區域度門就唔會開／關。 我地迫上車後都搞左好耐先避開到啲機械等佢可以關門。 一關門我地就即刻踩上去等之後到站都唔會開門唔洗比其他人迫入黎。
迫左十分鐘左右終於到達總站。總站係會展／球場站。 個球場係係會展旁邊，應該話係會展既一部份…. 落車後要兜大圈先入到場，入場後再要兜大圈先去到自己果區。上到看台望到塊草皮同啲球迷即刻覺得好興奮。 我果兩個朋友一個未睇過波，另一個就未入過呢個球場睇波，佢地見到雙方球迷場前就已經唱緊歌都覺得好震撼。
作客球迷既看台上掛住慶祝組織 20 週年紀念，唔知佢地會做啲咩黎慶祝呢，唔通有野好睇？？ 而主隊球迷就係看台前掛大字報叫球隊繼續戰鬥… 而雖然佢地係主場，但氣勢被作客球迷蓋過哂。由開波前，班作客球迷已經超大聲咁係度唱歌。 我地身邊都有唔少綠衣人。
坐我地後面有幾個超激動主隊球迷，仲有兩個作客球迷。成場波主隊球迷瘋狂鬧隊波廢，又話業餘都不如之類。 而作客球迷一樣係度鬧自己隊波廢，仲好感恩對方（主隊）同樣咁廢。聽住佢地各自鬧，作為花生友我完全理解佢地心情。因為隊波真係兩隊鬧廢。獨食，唔識走位，亂交波，要幾垃圾有幾垃圾！！！
下半場開波前我地留意到不萊梅球迷玩變裝，好期待佢地會放煙。果然真係開波後就放左幾枝紅煙！！！兩位朋友問我係咪好正常，我話佢地好彩先見到～～哈哈，最後佢地話雖然無咩入球，但起碼有煙花睇。
最後連個入波我地都唔知係點入既，明明望住個波入網，但我又明明睇住個波個方向係唔應該入網，我地係咁拗係咪烏龍球。朋大係咁形容佢睇到啲乜，我話我睇到一頭霧水。最後真係個龍門錯手改變方向搞到入波….
去到完場前主隊最後一個攻擊入左禁區，同對方龍門炒埋一舊，有幾條友訓低左。我地以為龍門被踢受重傷啦，點知最後出動救傷隊抬左個黑衫既球員出場。重新開波後，不萊梅得返九條友，我地八對眼都唔見有紅牌，又唔明點解有紅牌又無十二碼。又係後來先知張紅牌係吹停左先比既….
好多問號咁就完左場。 係場內留多大約 15 分鐘先慢慢離場。去到場外，要跟住佢啲人潮管制指示行。有個指示話去市中心要去一號月台，咁我地咪搵一號月台囉。佢係站前有四個號碼，1234，前面有人控制 stop / go 咁。我地去到去個 1 字前面排隊。排到最後先知原來1234 都係去一號月台既，但 1 條隊係最慢，因為比 234 條隊塞死哂。
過左個 1 字以為可以落月台搭車，月台係就係可以落，但望到成個月台都係滿既，即刻爆哂粗。咁我地以為自己好聰明咁行前啲，但唔知點解條隊行既方向有啲奇怪，唔係向住路軌方向移動，而係一路向行。 我硬係覺得唔對路，明明知道路軌就係前面，但點解每次有車黎我地前面啲人都唔會郁？？
後來我話都係再行前啲，行到前面先發現原來仲有另一個 stop/go 牌，即係果度先係入口！！！我地係咁攝，終於再過一關，入到去最後一條真係可以排隊上車既隊！就係咁樣搞左一個鐘先上到車…… 上車後經過兩個會展站，啲人勁嬲咁望住架滿哂既車 （仲有人成按住度門唔比佢開門，廢事阻時間）。
完場後一個鐘我地終於出返市中心可以去食飯…. 然後就再去朋友屋企 hea 陣就搭車返法蘭克福。 去到法蘭克福機場站，諗住仲有一個站就返到去，好感激火車準時既時候….. 突然有三個警察上車搵人。到底點解無一次搭高鐵係可以安安樂樂咁準時到達終點！！！！！好在最後我地無 miss 返屋企果班車…
想話，今個比賽週係得我地呢場波得一個入球。我地係咪真係咁無入球緣？？