18.10.2019
保加利亞甲組聯賽 第 13 週
FK Vitosha Bistritsa - PFC Cherno More Varna
Stadion Bistritsa
賽果： 0:2 (0:0)
入場人數： 290 (約 35 名作客球迷)
門票： 3€
更多相片

為左要清假，十月請左幾日假可以去第二度睇波。睇機票睇左一段時間，最後決定去保加利亞既首都 Sofia 五日四夜，可以一口氣睇三場波！第一場黎到山上面睇一場無乜球迷既比賽。

Sofia 四面環山，幾乎去都邊度都會見到有座山係背景。 市中心有一條大街叫做 Vitosha Boulevard，Vitosha 就係其中一座山既名。而我地第一場係保加利亞睇既比賽就係要上呢座山。

由市中心出發要先搭大約 20 分鐘地鐵，去到總站 Business Park，然後再轉巴士。 搭地鐵通常都無咩問題，因為站站停同埋有哂英文。巴士就真係好驚會 miss 左。 再加上佢地無售票機，要直接同巴士司機買飛，好在用兩隻手指就可以買到。

保加利亞係一個發展中國家，佢地係 2007 年先正式成為歐盟成員，但佢地唔屬於根申公約，即係出入境要過海關，不過就好似英國咁，歐盟成員國既公民只需用身份證，唔洗用護照都入到境。由德國飛去保加利亞只需兩個半鐘，天氣超級乾燥（東邊有海，但我地係內陸），明明周圍都見到有樹但唔知點解成個環境都係啡色既。

搭巴士上山時感覺好似由中環搭車上山頂咁，沿路望住遠遠既 Sofia，路邊有唔少豪宅同興建中既新樓，大約 15 分鐘就到站。 由於無諗過一切咁順利，最後仲有成差唔多兩個鐘先開波，咁我地就係山上面行一陣先。 點知山上條村 Bistritsa 乜都無，得啲勁 up dup 既超市仔，咁就只好行山….. 諗住搵個可以搭到 Sofia 既地方影返幾張相。

沿路經過好多豪宅地盤，間間屋都好靚，但唔知點解佢地完全唔諗住整埋門口條路。 就算已經有人住緊既豪宅既門口都係爛地一片完全唔係比人行。行左半個鐘終於見到一個可以行去山邊既地方影幾張相，然後就同啲泥頭車一齊行返返去大路再行去球場。

呢場波我地當係鄉下波咁睇，唔預會有咩特別。門口買飛後就可以入場，盛惠三歐～（當地貨幣係 Lewa, 1 歐 ＝ 2 Lewa ）場入面無小食亭，我地行到去另一個閘口見到有個賣花生既攤位，買左包花生就入返球場坐低等開波。啲位超級污糟，好在早一晚係餐廳拎左包濕紙巾可以大派用場。

突然之間，有大約 35 個人入左作客區，仲開始叫口號同唱歌。 呢個係成場波唯一驚喜！ 客隊 Varna 位於東邊既海邊離 Sofia 大約 5 個鐘車程，估唔到咁都有咁多人跟球隊黎打氣。係球場由天光坐到天黑，最後係下半場有兩個入球。 班作客球迷可以開開心心咁返屋企。

而我地就搭巴士落山然後去食飯。 保加利亞好平，銀碼同歐元一樣即係平一半。巴爾幹雖然食乜？緊係食肉啦！！場波真係無咩特別，只係叫做係保加利亞睇左第一場波。我地計劃最尾果場先係戲肉。第二日我地去睇一場多啲人會入場既比賽～ 應該無呢場咁平淡。