11.05.2019
德國西南地區聯賽 第 33 週
SV Elversberg - TSG Balingen
Waldstadion an der Kaiserlinde
賽果： 3:1 (1:1)
入場人數： 821 (約 20 名作客球迷)
更多相片

今場係聯賽最後一場主場，對手係無咩特別既 Balingen…. 如果唔係應承左去食生日飯既話，我地未必會去睇呢場波。因為我地唔記得左兩星期後仲有莎蘭盃決賽先係真最後主場賽事。

Anyway… 我地係屋企 hea 到最後一刻先出門口，二個鐘車程內只見到黑雲同大雨。到左 Elversberg 後又 hea 到最後一刻先入球場，入場後球員岩岩好行出球場。球隊宣佈季尾會離隊既球員，當中包括來自阿根廷既隊長 Leandro Grech，今個暑假佢會離開德國返鄉下，可能會繼續踢波，又可能正式掛靴。 佢係 Elversberg 踢左四年話長唔長話短唔短，但已經深受球迷愛戴。上兩星期有訪問提及到佢今個暑假既離開，佢自己講到眼濕濕。

企係 Block C1 既我地就一齊叫 Leandro 既名，佢亦都聽到然後鼓掌回應。呢個時候個天越黎越黑，雨越落越大，有啲人頂唔順企左十分鐘就走左。 啲雨打落塊面度痛架，我著住著 uniqlo 既 blocktech 雨褸雖然入面無濕，但件褸外面都濕到變左色。咁既天氣下竟然都有過八百人入場真係算難得。

最後 3：1 完場絕對係可以接受既賽果，主場七場連勝～ 係我地隊波身上真係完全睇到領隊既重要性，同一班球員竟然可以踢到脫胎換骨咁，由上半季狂失分到而家連贏n 場咁。 仲有我地既前鋒 Koffi 上半季明明廢到爆，個個都想佢走，而家佢幾乎場場都有波入！

完場後大家走得好快，我地都要趕住去食生日飯。 兩星期後仲有今季最後一場主場，莎蘭盃決賽對 FC Saarbrücken。 希望今季可以再次捧盃！！