04.05.2019
德國西南地區聯賽 第 32 週
SV Waldhof Mannheim - SV Elversberg
Carl-Benz-Stadion
賽果：1:0 (0:0)
入場人數：4623 人 （約 120 名作客球迷）
門票： 10€
更多相片

黎到今季倒數第二場作客波黎到今季冠軍同來季德丙升班馬既主場。 對手連續三年升班失敗，今年因為賽規改變令到冠軍終於可以直接升班唔洗再踢附加賽，所以佢地今季出盡奶力幾乎贏盡每一場波，係榜首遙遙領先，正式脫進地區聯賽。

自從新領隊上任後成績越黎越好，好多球迷都對球隊有返信心，雖然我地隊波今季聯賽已經無野好爭，竟然有近一百人報名搭巴士一齊去作客。而我地就直接由法蘭克福出發，開車大約一個鐘左右就到達球場後面既公園。

今日唔知做乜氣溫大跌，竟然得返 6 度！！！真心好驚係球場會頂唔順，係雨中經過公園行到球場既作客區。係門外遇到其他同樣自己揸車去球迷，佢地話其中一架球迷巴士爆呔，係法蘭克福對出停左係公路上面，而另一架球迷巴士就係公路等埋另一架。

我地好準時咁入到去作客區，區內得大約 15 人。面對住空空如也既東看台，唔係因為佢地無人入場，而係上季升班附加賽球迷組織搞到場波被腰斬後，球隊同足總罰佢地唔可以進入自己既「地盤」，所以佢地走左黎最近作客區既區域，欄前掛上 Otto-Siffling-Tribune，代表只有東看台先係屬於佢地既地方，而有佢地既地方就係東看台。

等到開波先有巴士重新出發既消息，地圖話要近一個鐘先可以到球場，即係近百人會 miss 左上半場。 電台直播係度笑客隊得 17 人企係作客區…. 開波前我地買左豬扒包，但對比起上星期果塊又厚又多汁既地道莎蘭燒豬扒真係完全無得比。呢度既豬扒乾到我唔想再食。食完之後再去買杯野飲，排隊時我地係度講豬扒難食，然後話最好食既應該算係賀芬咸二隊。 排隔離隊既主場球迷無啦啦搭訕話：下？ Elversberg 既先最好食喎。 我地話：講緊莎蘭以外呀。

原本我以為球隊今季成績咁好，一定好多人入場。但睇黎好多人都見上左岸就廢事花錢花時間入場睇場咁既波。東看台幾乎係吉既，兩邊看台都唔係話多人。最後佢話有四千人真心唔知佢點樣數出黎囉。

開波前，我地既隊長向對方球場送一個藍色既蛋糕，恭喜對方升班。前季我地贏冠軍時佢地都有送上祝福，算係禮尚往來！上半場雙方都踢得一般，SVE 對住聯賽冠軍都好似仲係爭咁啲咁。攻勢全部都唔入肉，入到禁區又起唔到腳。半場我地去門口等兩架巴士。德國既低組別聯賽都係半場後就可以免費入場，所以門口賣飛果條友執哂啲野走人。 但我想話….. 今場波個個一早買定波飛連巴士飛…. 平時都唔會套票咁賣，今次咁樣一齊賣就睇唔到半場波。

等到大家過哂安檢入哂場後，我地一齊唱住歌好有氣勢咁踏入球場。得返 45 分鐘，個個都好出力咁為球隊打氣。而主場球迷都突然落力左。 時間過得好快，係完場前幾分鐘主隊黎個絕殺收我地皮。 延續我地從來未係呢個球場贏過波既紀錄～

完場後，大家一路笑住話好在仲有半場，一路執野。一陣風咁完左，又要搭兩個鐘車返去。 我地就返法蘭克福先買餸再返屋企～ 第二日北上睇德甲！！