09.02.2019 德國丙組聯賽 第 23 週 FC Carl Zeiss Jena - Karlsruher SC Ernst-Abbe-Sportfeld 賽果：1:1 (1:1) 入場人數：5337 人 （約 600 名作客球迷） 門票： €16 (€13) 更多相片
就如上場波講過，一月尾北上，二月頭南下，今次係向東走～ 亦都咁岩係：北上去睇德甲；南下去睇德乙；今次？就係去睇德丙… 真係順住咁落！呢個星期原本諗住去柏林，但想睇果場波唔知咩事要延期。然後諗住去 Freiburg 但又買唔切波飛，咁就㨂左呢場波睇。 來自東德既大球隊其實全部都好吸引，不過佢地話遠唔遠話近唔近，所以好多時都數到最後先會㨂佢地黎睇。
由法蘭克福出發要大約 3 個鐘車程，呢場波兩點開波，我地大約 1 點到達，未入市內就見到一大堆好似香港公屋咁既大廈… 好有共產味。原先上網搵定既停車場已經滿左，跟住其他車去後街搵車位，好順利泊好車之後行大約十分鐘就到球場。今次我地即場買飛，買左 Block K 即係主看台既對面既座位區。揸左三個鐘車，入場後第一時間當然要食野！佢地有好基本既烤腸同漢堡扒 （Boulette），仲有小食亭專賣熱狗或者漢堡包。我地一人買左舊 Boulette，塊扒大過個包成倍，只係 3€，仲要超好食！！！！舊肉勁鬆軟，除左唔夠熱之外（冬天，啲野食兩秒就凍左），真係可以話係我食過最好食既漢堡扒！
Jena 既球迷看台位於南看台… 既左邊，而作客看台亦都係南看台既另一邊，即係兩班球迷都係同一邊唱歌。原先我地好擔心會好似去睇 Sandhausen 兩班球迷一齊出聲時會好亂，被耳朵轟炸乜都聽唔到，好意外地係呢個球場完全無呢個問題。今次兩班球迷都算氣勢唔錯，可以好清晰咁聽到佢地既拍子！
離遠望到球場看台時，有一總似曾相識既感覺。入場後望向主看台，感覺就好似望住一個香港既運動場咁，只係呢度個看台高啲大啲。如果兩邊龍門後唔係有看台既話，香港味道會更加重！場中仲間唔中傳來跑道果陣膠味。Jena 既主色係藍黃白，佢地既主看台座位都係只主色黎裝色，好似將軍澳運動場咁！
我地企係主看台對面，視線唔可以話差，但佢地每幾米就有一碌棍掛住喇叭企係度，影響我地望主客看台。所以我地就一路向住南看台行呀行，搵到看台頂有個位完全無遮擋就決定成場波企係度算！
每次睇東德球隊都好期待聽佢地獨特既打氣歌，佢地通常都想自己與別不同，所以總會有幾首歌係獨一無二既。再加上唔知點解東德人特別熱血… 主隊既看台唔算大，看台內企滿人但應該都係同作客球迷差唔多數量，但佢地全個區內都要一齊舉手打氣。 每首歌都唱足幾分鐘，仲要一直都好大聲。客隊我地睇過好多次，所以無咩野好講…
FC Carl Zeiss Jena，就算你未聽過 Jena 呢個名，都應該聽過 Zeiss 蔡司鏡片。 呢隊波係德國其中一隊「工廠隊」，由當年光學鏡片工場既員工。德國技術就係品質保證，係香港你去配眼鏡時都會被店員問有無興趣加多近千蚊配副蔡司鏡… 不過間公司唔係由 Carl Zeiss 自己一手一腳創立既。呢個球場既名 Ernst Abbe 亦都係當年既創辦人之一，負責用腦睇住盤生意，第三個創辦人就係 Otto Schott，負責研究玻璃，所以德國有間大公司叫Schott，唔洗講你都知佢地專門生產啲咩…睇球隊名、球場名、或者市內既建築物同街名，你可以估到乜野係呢個城市最重要既遺產… 雖然蔡司總部唔再座落係 Jena、Schott 亦都搬到去 Mainz，無佢地呢三條友既話，呢個城市就唔會有任何威水史！
係市內你見到好似以呢三個友命名既野… 仲會見到每碌燈柱或者垃圾桶之類既野都會有張寫住「Südkurve bleibt」（保留南看台），球隊一直都想將球迷看台搬去另一個區，因為主客看台實在相隔太近，好容易發生衝突。而 Jena 既球迷組織亦都超級活躍係政治界，好中意發表佢地既左派言論，仲有係演講台上面數呢樣數果樣，當某個目的達成之後又會搵第二樣野黎搞。 呢隊波就好似另一隊聖保利咁，你一係覺得佢好正，一係就會好憎佢。
出發前我見今日會陽光普照（勁耐無見過太陽），仲有成 10 度！即刻著薄少少驚睇波比太陽時會熱死。但…. 其實而家都仲係冬天囉。 10 度但仲係凍，再加上唔知做乜超級大風 >_> 我地企左球場食左兩個鐘凍風 （後來病左…. 只可以用呢個借口黎解釋點解呢篇文出得咁慢）好在，兩班球迷再加上場波都好好睇。
排榜尾降班區既 Jena 先打開紀錄，去到上半場最後一秒比排第二既 KSC 搶到角球，球迷係咁叫球證吹半場雞既時候，客隊角球開出，禁區中有人跳高接應頂入，乾淨利落～ KSC 今場其實要襯榜首既 Osnabrück 輸波去搶分拉近距離，所以下半場佢地係咁搶住黎攻，但 Jena 除左頂得住之外都仲有唔錯既攻勢，仲成功擋住 KSC 既十二碼！！正當我地好專心睇波既時候，班球迷又黎現野吸睛～～ 主隊球迷好出名有野無野都放煙霧，有一張好出名既彩虹煙霧相就係佢地早兩季放出黎！！啲煙霧唔夠一分鐘就比風吹散哂，好在我反應快影到幾張靚相～
完場後，除左南看台球迷之外，其他看台都有球迷留低，仲走到看台底。等到球員到南看台，聽球迷組織向佢地講一堆鼓勵既說話之後，佢地就會繞場一週同球迷握手擊掌～ 呢啲就係小球隊先有既親切感。睇夠之後我地就去開車到市中心行街，同埋特登行到去當地既著名景點「Jenaer Paradies」耶拿天堂～ 德國統一前，東德政府好中意宣傳耶拿天堂係東德其中一個最靚既地方，其實咪就係河邊一個公園… 可能夏天會靚啲卦，但求奇 up 一個德國既公園都已經靚過佢….
最後係市內食埋飯先返法蘭克福～ 之前成日話我地唔去睇原先計劃去睇果場波既時候，果陣波就會開大。呢日我地話柏林場波取消左所以唔計；回程時睇德甲比賽見到弗賴堡和禾夫斯堡三比三…. 只可以話認命._.