19.01.2019 德國足球甲組聯賽 第 18 週 漢諾威 對 雲達不萊梅 Niedersachsenstadion 賽果： 0:1 (0:1) 入場人數： 44,300 （ 8000 名作客球迷） 更多相片
歇冬後既第一場德甲波好似已經成為我地每年必備既節目咁！月頭德國火車公司 DB 同 Ferrero 合作推出火車優惠卷，多款 Kinder 產品都包含 10€ 優惠卷，上年我地都借呢個優惠買到平車飛去 Augsburg，今次就用黎北上去 Hannover！
未搬屋之前想去德國北部一日遊係基本無可能，但而家由法蘭克福有數唔完既高鐵去全國同歐洲各地，去 Hannover 既淨車程講緊只係 2 個鐘左右既事！仲有去科隆只需一個鐘，仲要平過我地之前買既全國地區火車日票…. 今次用左 4 張優惠卷，即係平左 40€，最後兩個人來回總共只需 50€，仲要係搭 IC/ICE 高速火車！
星期六大約九點鐘出門口，搬左屋之後好似只係得兩三日見過藍天，但星期五開始一連幾日既天氣都會超好！！！出門時 -5 度，但因為有太陽曬住所以完全唔覺得凍。火車準時 10 點 20 分出發，車長唔知點解好似心情超好咁開咪做廣播，講下車程同埋話比我地知車廂號碼掉亂哂，由車頭開始數 10-9-8-6-4-5-3 仲有「兩架車廂唔知去左邊」。去到第一個站時，佢話架車有少少問題要停一陣檢查，花左十五分鐘後發現最尾果卡有個碌崩左，所以果一卡會好震，叫坐係果卡既乘客好好享受「免費腳底按摩」。
呢程車由法蘭克福到漢諾威中間有四個站，過左第一個站後就已經遲左 15 分鐘，車長話啲接駁火車全部都唔肯等佢，即係要轉車既人係天寒地凍之下可能要等成個鐘先會等到下一班車….. 好在我地係直通車唔洗轉車追車。 最後我地大約 1 點到達漢諾威，一落車就見到一堆堆既警察分布係唔同角落。 事關不萊梅既球迷一早宣布左話會搭火車去漢諾威，呢場波算係小打比所以啲警察要睇實啲人唔比佢地搞事。
我地到站後就即刻去食晏，食飽就慢慢行路去球場。 漢諾威既球場算係位於市中心，由中央車站可以搭地鐵搭三個站到 Waterloo 站，再行大約 10 分鐘。 呢三個站既路程就好似由太子行去油麻地咁近，有時間既話穿過市中心睇下風景行去球場仲好！條路好易行，一出車站一路直去，經過隧道見到 Waterloo 站，站外有間酒店，再沿住條路就會到球場，一定唔會盪失路！ 我地見有少少時間就係市中心參觀下先～ 有幾條街有好多德國舊式建築 Fachwerkhaus，好靚！！！ 然後經過 Niedersachsen 既州議會大樓就「會合」返其他行緊去球場既球迷。
行去到 Waterloo 站就已經慢慢隱約見到球場頂，球場外有條街以曾效力漢諾威既門將安基命名去紀念佢。經過保安檢查時，佢話平時唔比帶充電線入場，叫我下次唔好帶。（我今次係帶左連插頭既相機充電座，係過份左啲，但朝早先發現唔記得充電，只好帶上火車充電….） 多謝果位姐姐好好人咁放過我～ 入場後就先去自己果區 W18 山頂搵自己個位，睇下景觀如何。雖然可以清楚望哂兩邊球迷，但我地都係走左去球場正中間搵位坐！
我地㨂呢場波去睇，除左因為佢地北部小打比之外，仲有兩邊既球迷係十二月尾發生左啲事，令我地好想去八卦下今場波會唔會有啲咩事發生～ 首先你要知道既係，兩隊波從來都唔係朋友，雖然唔係大家最大既敵人，但一直都睇對方唔順眼。 漢諾威既主要球迷組織既政治立場係偏左既，上個月突然傳出佢地其中一個球迷組織同佢地有政治分歧，仲好似同不萊梅既某個球迷組織開始 friend friend 地，所以漢諾威既球迷組織發聲明話要踢佢地走，唔比佢地再入北看台。而不萊梅既某個組織唔知做乜自己對號入座走出黎話 呢件事同我地無關架唔好亂咁講！就係因為呢件事，我地諗住雙方會寫大字報係看台隔空互鬧之類。
同漢諾威球迷有關既事件應該唔少人聽過 Kind muss weg 呢個 campaign，就係佢地同球會主席 Martin Kind 鬧不和。最主要原因就係Kind 想將球會據為己有，並公開反對 50+1。 班球迷近幾季一直都有搞唔同抗議活動，上季幾乎整季都靜企用沉默去杯葛 Kind，直到 DFB 拒絕 Kind 既申請，球迷們先鬆一口氣開始肯開聲打氣。 雖然 Kind 未能成功「收購」球隊，但球迷已經對佢恨之入骨，唔少屬於球迷組織既人話有佢無我，一日佢係主席，一日佢地都唔會入場。
漢諾威球迷組織既聚腳地位於北看台上層，下層都有一個組織但無需理會。 我地入場時已經見到唔少人企係上層最前排，但以德甲球隊既規模黎講真係唔算多。 上季其實已經有計劃去呢度睇場波，但一直擔心球會唔入場，今場其實都驚驚地，好在見到佢地掛哂大橫額同大旗先鬆一口氣。開波前大約十分鐘佢地已經開始唱歌造下勢，聽落聲勢唔錯，球隊原本播緊歌都特登較返細聲啲。
但係…. 當班作客球迷出聲之後，主場聲勢即刻被比下去。不萊梅今場波帶左最少六千名作客球迷到場，呢六千名係球隊官賣數字，仲未計混雜係主場區既作客球迷。今次係我第二次睇不萊梅作客，上次係佢地 六年前作客法蘭克福，但我一直都對佢地無咩印象。寫呢篇野時睇返時舊相先發現原來佢地當年同球會有爭執所以全場靜企唔出聲，唔怪之得好似睇完等如無睇咁。唔講你未必知，不萊梅係全國各地都有唔少球迷，佢地既作客人數雖然唔係德甲最多，但通常都僅少於傳統大球隊之後。 作客區全滿唔洗講，雖佢地召集球隊一齊企起身時，係主場區有好多人都和應一齊打下氣，某啲時間真係完完全全反客為主！
球場上既表現就…. 好多時候我都分左心，但我可以理解漢諾威點解會排榜尾。 佢地既球員永遠唔會跑多幾步去追波或者爭波，成日眼白白睇住對方拎左個波之後就收慢腳步。我地後面有個球迷鬧左成個下半場叫所有球員食屎._. 不過客隊都唔好得去邊，上半場入左一球之後都無咩驚喜。 當佢地入波時，我地眼前好似有超過三分一既球迷都彈起身慶祝，真心會以為佢地先係主場。
今場波雖然只得一個入球，但場波都算幾好睇，起碼時間過得好快，大約 70 分鐘開始手腳開始越黎越冰冷。下半場雙方球迷互罵左幾分鐘後，一直都只係氣氛一般。成場波只係開波前有塊大字報，其餘時間都係各自各打氣。呢樣係有啲失望既…. 完場後客隊走到球迷前多謝佢地到場支持，而主隊既球員繞場一週去到北看台，連禁區邊都未入到，勁 hea 咁拍幾下手就走返入更衣室。 真心想知佢地係咪不嬲都係咁？？？ 睇落好似同球迷既關係只係麻麻??
完場後我地搭地鐵返到火車站，買炒面做晚餐～ 企係堆警察旁邊食花生。見到好多疑似球迷組織既人走黎走去，後面有好多警察即刻跟住佢地，直到我地架火車到站時都無咩特別事發生。 而我地架火車… 雖然準時到站，但開車到一半車長話因為工程要兜路，要遲 40 分鐘先會到法蘭克福… 我地算好彩仲返到屋企，有啲人因為呢班車遲到而 miss 左尾班車，-5 度真係唔知可以去邊！！
就係咁，星期六好充實咁完左。 我地已經即刻開始計劃下下一次既旅程，心入面已經有幾個心水，例如弗賴堡係我地好想今季可以去到既球場，因為佢地好快就會搬去新球場，但佢地個球場成日爆滿好難買飛。黎緊幾個星期未必會去睇德甲，但會繼續慢慢發掘德國北部既球場～～