06.05.2018 法國甲組聯賽 第 36 週 FC Metz - Angers SCO Stade Saint-Symphorien 賽果：1:2 (1:0) 入場人數：13,295 （ 25 名作客球迷） 更多相片
每次我地搵有咩波好睇，首先一定由附近城市開始睇，一段時間後，附近既大城市都已經去過哂。黎到季尾，原本都係諗住睇埋幾場地區聯賽就算，但睇完上場比利時季後賽之後，發現我仲差一個球場就去過 100 個球場打卡！
係歐洲好興一個 app 叫做 Groundhopper，顧名思義就係 Groundhoppers 專用既打卡 app。呢幾年，來自丹麥既 developers 已經將個 app 改良左好多。以德國為例，佢既 database 原先去係去到第 5 級聯賽，但而家更低級既球場都有，仲可以自己新增球場。比較知名既聯賽都有提供 live check-in 功能，一去到球場，打開個 app 佢就會有個 box 彈出黎問你係咪睇緊呢場波，事後會自動 update 賽果等資料。同埋呢個 app 係用黎同其他 Groundhopper 相認既好工具，因為佢會話你知仲有咩人係呢場波 check-in 左～
不過我無將所有比賽都走去打卡，例如香港波我都係每個球場 check-in 一次就算，如果我每場波都走去 check-in 都話，係個 app 入面我會變哂每隊波既 number 1 fan ._. 仲有幾場超低組別既聯賽賽事我都無入到，不過無論點都好，係個 app 入面我就係爭一個球場就有 100！ 我又唔想睇場莎蘭聯賽黎做我第 100 個球場，所以我地突登搵場波黎做我第 100 個球場…. 就係咁，就搵左 Metz。
我淨係睇過兩場法甲，兩場都係渣兩個鐘車去 Nancy。但原來 Metz 離 Elversberg 只需一個鐘車程！加上球隊今季成績極差，淨返三場排第尾，今場波一定要贏波搶分先可以繼續護級。為左吸引球迷入場，佢地將所有門票減價減到龍門後 10€，其餘位置包括 VIP 都只係 15€！ 之前見過有人去睇 Metz 要比 45€，所以我地從來無諗過去睇。15€ 既 VIP 飛當然一早比人搶哂啦，上網睇到佢地仲有好多飛淨，但如果網上買就只有 print-at-home 門票，所以我地選擇去球場門口買。
星期日約埋朋友一齊由 Elversberg 出發，經過 Saarlouis 穿過兩國既邊境後，再穿過十幾廿條村仔就到達 Metz。法國既高速公路全部都收費，我地行遠少少行村路既油錢都平過公路費！！！ 事前我地搵左個可以泊車既地方，1€ 可以泊四個鐘，但 GPS 帶我地行錯路搵極都搵唔到個停車場，搵路中途見到路中心有條泊車街，諗住泊低睇下泊街幾錢。點知…. 咦，係喎，法國講法文架喎。咪錶上面既字完全唔識睇，學左七年法文既莎蘭人話淨係知 Dimanche 係星期日。 亂咁按下啲制就彈左個收費表出黎 20min = 2€, 1h = 10€ 之類，總之最高就係 30€，即係日泊係 30€？？？
正當我地十分迷惘時，前面有架車泊低左，車主走過黎同我地講 “today for free”，然後篤住隻字話 for free for free，咁我地就好開心咁講 Merci，然後就行返架車度拎野走人。 點知我地見到剛剛架車既車牌係德國車牌，但佢同我地講英文！！！ 為左安全起見，我都係影低左張相問我屋企人係咪真係星期日唔洗錢… 好在真係假日免費泊車。
比賽五點鐘先開波，我地到 Metz 時只係兩點鐘，諗住係市中心行下睇下名勝。雖然星期日所以舖頭都無開門，但法國果然係法國，啲建築設計真係有自己既味道。 呢個城市係世界大戰其間完全無受到破壞，所有建築物都好完整！市中心有個超大既教堂，雖然我唔信教但每次見到教堂都一定要入去睇～～
到埗後，其實我地好肚餓，想極速搵野食。呢個地區比較出名既野食叫 Flammkuchen，類似pizza 咁。一開始見到有間 cafe 有 Flammkuchen，8€ 左右，我地諗住睇多幾間先，但其他餐廳全部都由 15€ 起跳 ._. 不過我地已經行得太遠，搵唔返第一間 cafe… 唯有肚住個肚繼續搵。見到有間漢堡小店，乜都唔理就入左去叫野食，最後每人只需要 6€。 下次搵日平日先再黎過 Metz 行街，係露天餐廳好好咁享受下法式風情美食～
食飽就慢慢向球場方向出發。Metz 位於 Mosel 河邊，呢條河會連接到德國既 Trier，去到盡頭就係 Koblenz，即係我可以經呢條河遊水遊返屋企 😛 而球場就係條河中間既某一個島仔。 係市中心搵到條河之後，搵岩方向沿住條河就可以搵到球場。
去到球場第一時間就緊係去買飛啦，售票處門口有塊牌列哂波飛價錢，VIP, Lounge, Cat 1, Cat 2 15€，其如就 10€，同我地上網睇既一樣。 行到去櫃枱前同個伯伯講我地想要三張北看台 Block G 門票 （我地係車上面練定呢句法文），點知佢好慢既英文同我地講 “We… have… two…… price… ten euro.. and (問佢同事 15€ 點講，不過我估到佢想講乜就話） fifteen!” 佢就笑住話 “yes, fifteen.” 我地就話要三張 15€, Block G. 佢話得返 Block H 得唔得，我地話無問題。收錢時佢又要問同事 45€ 點講，之後好開心咁同我地講 Thank you~~~ 我地就好開心咁 show 法文: Merci beaucoup~~~
最近歐洲回春，陽光普照，是日 27 度，我地賽前一個鐘到球場已經唔想再行， Block H 係球場上層，位置好靚，仲要唔洗比太陽曬！ 影左幾張相就搵位坐低，真心唔知法國人個個都真係咁高大定乜，我坐低左之後雙腳係掂唔到地 -_- 我要踩住前面個位我先可以坐得舒服，但開波前有一家人坐左係我前面，即係我一定只可以坐半個位等雙腳可以掂地，一定要雙腳唔掂地，但大髀同背脊要用力先坐得舒服 （但好快會攰）。 而且座位同座位之間係完全無空間…. 要痴住旁邊唔識既人既手臂睇波 🙁
以我地所知，主隊 FC Metz 有兩大球迷組織 Horda Frenetik 同埋 Ultras Metz，一個同德國球隊 Kaiserslautern 結盟；而另一個組織就同 Eintracht Trier 結盟。即係話呢兩個組織各自為政，唔會岩牙啦。 賽前大約十分鐘，見到我地左邊既東看台上層開始有球迷組織出現既人， 佢地係 Horda 組織橫額上面再掛起左一塊白底銀邊黑字既大字報，「On fait comme vous? On descend?」 對法文完全零知識既我地事後用 google translate 翻譯過，大約係 “Do we love you? Are we going down?」 但一來兩句好似無咩關係，同埋譯完都係唔知講緊乜。可能要睇返賽前既新聞先可以知道呢塊大字報既背景。
係搵呢一句野既意思既同時發現，原來 Horda 既區域原本係下層看台，但因為早前佢地早兩季對里昂時，向球場射煙花射中左一名球員，最後被球會罰佢地要搬上上層看台遠離草地。 我地估大字報後面果句係想諷刺隊波既處境同組織被罰去上層，問隊波係咪 “going down”；組織係咪都可以 “go down” 去返下層看台。
我地既右邊西看台龍門後下層都有一小個企位區，開波後佢地都慢吞吞咁入場。左邊看台上層既 Horda 好落力咁打氣，人唔算多但都有大約一百人一齊企係度拍手同唱歌。而左邊龍門後既組織就細聲好多，越睇就越覺得唔對路。 呢個小企位區分左兩部份人，一堆比較小人既企係左邊，另一堆明顯多人啲就係右邊。左邊班人係 Generation Grenat 跟鼓聲拍緊手既時候，右邊班人 Ultras Metz 就係度跳。原來，佢地呢個小看台上面又分左兩組人係度打氣。即係全場總共有三班人唱緊唔同既歌，跟緊唔同既節拍打氣！Ultras Metz 既氣勢亦都明顯比 Grenat 勁好多，佢地仲成功叫埋旁邊原先坐係度睇波既人一齊企起身唱歌。
球場上既 Metz 好落力咁搶分，看台上好多人一家大細黎睇波，啲小朋友係咁係度 Allez Allez 叫 Metz 加油。而 Metz 成功係上半場 20 分鐘就開齋，睇落完全唔似係排榜尾既球隊。而客隊 Angers 就好輕鬆咁應戰，降班又唔輪到佢，歐洲賽亦都無佢份。主隊入波後就開始無咁進取，只係係 Angers 交失波時先做個突擊。
上半場一完，我地就衝去買野飲解暑，想順便去個廁所，但呢半個上層看台只有一個廁所！！！！男女廁共用，尿兜有十幾廿個，但廁格就得一格，仲要成地都係污水…. 最後諗住忍到返德國。 然後我地走左去看台無人坐既最後一行，等大家唔洗痴住手臂黎坐，我又可以坐得舒服啲。
下半場開波後，兩邊既球迷組織都唔見哂影，無人打氣。客隊既球迷就趁呢個時候用盡自己把聲黎叫下，佢地得五個人係看台前搖旗吶喊，成功叫到成個球場都聽到佢地把聲！ Angers 位於法國西部，離 Metz 有成 600 公里，相隔咁遠都有廿幾個球迷黎到支持自己球隊！！
正當我地以為 Metz 成功可以泊大巴守住三分到完場，球證表示補時五分鐘。所有球迷即刻狂鬧球證，有乜理由五分鐘？？ 就係呢五分鐘，抹殺左 Metz 護級既希望。93 分鐘，客隊黎個攻勢，門前混亂追和。 成個球場靜哂，然後好多人即刻起身離場。 94 分鐘，Angers 再攻多一次，2：1。 右邊龍門後既球迷即刻拉開一塊大字報： L2, We are back. 客隊既呢兩腳波將 Metz 踢落乙組。
完場後，Angers 既球員當然即刻去搵自己既球迷慶祝處波。而 Metz 既球迷亦都走哂去西看台前，但佢地係想鬧爆啲球員，仲有人掉野落球場。 Metz 球員一完場就走哂入更衣室，只有兩位球員向住球迷行去。有一班球迷跳左落球場，一大班保安即刻衝去看台前想擋住啲球迷，保安們亦都勸班球員唔好走咁近。無奈之下，果兩位球員都係要走返入更衣室。
我地係看台想繼續食花生時，已經有保安走過黎叫我地走。完場後都唔知夠唔夠五分鐘就已經比人趕走！！！！ 我見到廁所無人，諗住頂硬上去埋個廁所，去完廁所，見到有個保安企係門口，完全係一副阻住佢收工既姿勢。當時看台入面既通道已經無哂人，有另一位職員已經落緊閘，叫我地行第二條路….. 完全唔知法國人做野可以咁有效率！！！！！！
離場後就向自己架車既方向行，大約十分鐘就起程返德國。今次可以話係第一次親眼睇住一隊波降班。