28.04.2018
比利時歐霸席位附加賽 第六週
KAS Eupen - Sporting Lokeren
Kehrwegstadion
賽果： 0:2 (0:2)
入場人數： 1865 （約 80 名作客球迷）
更多相片

係科隆睇完 Fortuna Köln 對 Hansa Rostock 後，我地就出發去比利時睇今日第二場波。由科隆到 Eupen 只需要一個鐘車程，好幸運地無遇上塞車。

Eupen 係比利時既德語區，所以呢個城市入面既路牌餐牌之類都仲係用德國標示。到達後仲有兩個鐘先開波，咁我地就係市中心泊低架車再去行下。 去到比利時就當然要食佢地發名既薯條啦！ 係比利時有好多小檔專賣炸物，我地行左一陣就搵到一間入去買野食。

正如剛剛所講，餐牌都係德文，諗住用德文點餐無難度啦，點知餐廳入面既阿叔偏偏就係唔識講德文 （又或者可能佢唔想同我地講德文）。法文我就唔識啦，但同行既莎蘭人細個讀書時要讀年法讀七年 （好似我地要讀英文咁），但佢地竟然都仲係一句法文都唔識講…… 最後想 order Frikadelle 變左半隻雞，我份薯條要茄汁佢又比左 Mayonnaise 我，好在我都岩食。食完薯條，班男人仲未夠飽，係咁嘈住話要去食甜品。黎到比利時，除左薯條，就係窩夫！！！佢地一人叫左一份，我就無咩胃口所以食一啖就夠。

食飽後，我地就渣車上山去球場。事前我地搵左球場外一個可以免費泊車既地方，但原來比賽日會變成 VIP 專用，好在後面有條小路比我地搵到位泊車。 落車後，行大約五分鐘就到達球場門口，途經一座超靚既大屋，原來係比利時既 德語社群協會 (Parliament of the German-speaking Community)。路上仲見到好多警察，起碼十部警車，加一架水炮車同一架載住四隻馬既車。

我地先係門口直接買飛，張飛既背景係 emoji… 好潮但我唔識欣賞！入場後就要經過看台底行去最近作客看台既區域搵位坐。 呢個球場話靚又唔係靚，話醜又唔係醜，四個看台都唔同樣，主看台啲位連埋 VIP 包廂係靚啲既，兩邊龍門後既看台一高一低，作客看台就幾乎全企位，而主場球迷既打氣看台就係幾乎全座位，只係最前有幾行企位，容納人數八千人左右。而我地係主看台對面，呢個看台好似求奇起出黎咁。 歐洲最後開始回暖，啲花草樹木慢慢開花，所以全歐洲周圍都係花粉。看台上既座位全部都積左一層黃色既粉末…

同上年睇標準列治一樣，呢樣都係季後既附加賽去定出歐霸既席位。呢兩隊波我都唔識，只係因為見到佢近科隆可以去睇下。 早幾日問過識比利時波既朋友，佢話呢場波唔會有咩特別，唔洗諗住有氣氛。 佢講得岩，主場球場有一堆人企係看台前，掛起 Zebras Euepn 既大橫額，但佢地全場無咩點唱過歌。作客球迷心情就好似好靚咁，間唔中都有唱下歌打下氣。

比賽既差素… 仲差過我地岩岩睇果場德丙。主隊既球員全部都逐個逐個咁犯錯，作為一個只係黎食花生既觀眾我地覺得好好笑，但如果我係佢地既球迷真係會激死。客隊 Lokeren 暫時係小組賽首名，佢地把握 Eupen 球隊既犯錯，係上半場輕鬆射入兩球領先。 下半場，客隊踢得越黎越差，兩邊既後防廢鬥廢，但廢得黎佢地又好進取，即使下半場再無入球，但比賽節奏夠快所以一啲都唔悶。

完場後，主場球迷走得好快，作客球迷就同自己既球員慶祝全取三分繼續企穩榜首。不過佢地要成功爭取歐霸席位條路一啲都唔易呢。如果佢地踢多四場仲都係榜首，就要同另一組既冠軍踢多個回合，贏左再要同唔知聯賽第四定第五踢最後一輪（好似係）。