06.03.2018
德國西南地區聯賽 第 25 週
SV Elversberg - TSV Schott Mainz
Waldstadion an der Kaiserlinde
賽果：4:2 (1:1)
入場人數： 673（5 名作客球迷）
更多相片

等左八個月，我終於返黎 Kaiserlinde 啦。今場波係第 25 週既補賽，早兩星期因為大雪所以要延期，延期即係變成週中比賽。雖然（好似）話冬天已經完結，春天已經黎緊，日頭既你氣溫回升到最少有七度，同上星期對比既 -10 真係暖返好多，但係太陽一落山就得返兩三度，即係仍然要受盡冬天既折磨去睇呢場波。

平日既夜晚我地都係安安樂樂係屋企煮下飯仔睇下電視，今日要繁忙時間五點左右出門口，渣一個鐘車返到去 Elversberg，搵個靚位泊低架車就去會下班朋友。 朋友們立即問我地關於 Augsburg 既野，問下我地背包既下落之類。我等左八個月先返到黎，佢地都等左差唔多四個月先有得再係主場睇波！今場係歇冬後第一場主場波，剛過去既星期五原先都係主場對 Steinbach，但同樣因為天氣問題而要延期。

其他人係屋企睇緊歐聯既時候，我地就係度睇地區聯賽～ 我地知道呢場波唔會多人得去邊。一來天氣凍，二來對手只係榜尾既 Schott Mainz。 Schott Mainz 既 Schott 係德國一間光學玻璃製造商，佢地既股份持有人就係 Carl Zeiss （有戴開眼鏡既一定聽過呢個名），即係話呢隊波係一隊公司附屬隊。不過佢地唔係公司既主要投資項目，所以佢地長期都只在低組別打滾。 球迷？ 有五個在場～

TSV Schott Mainz 亦都係全個西南地區聯賽唯一一隊有幸能夠同中國夢之 U20 隊較量既球隊！ 今季 Schott Mainz 一直都比人睇死做升降機，諗住實唔夠夢之隊鬥，點知負負碌碌咁贏左 3:0 傷害左全國 13 億人口既小心靈！一定係收買左球證先可以贏到波囉！

原本大家諗住會派青年軍出戰，但領隊派出平時一隊用開既 11 人，睇黎係想借呢場波練下兵。開波後第一個攻擊 SVE 就由 Koffi 破網開齋，然後一路都控制住場上既節奏。不過係 Schott Mainz 既一次反擊之下就比佢地追和 1:1。 我地都知  SVE 後防廢，無諗過下半場開波無耐竟然可以比對方反超前囉。 心諗 唔係連對榜尾都輸波下話！

好在，最後 SVE 連入三球幫球隊搶返三分返黎，等我地無白白地係到捱凍睇佢地踢波！ 呢場波得 六百幾人入場，好耐無試過得咁少人入場，但係大家都好開心咁既天氣都仲有幾百人，佢地講返幾年前既 top game 可能都係得一百人左右入場，呢啲真係唔算係啲咩！

呢場波大家都無咩點唱歌，個個係度 enjoy the moment 同大家係度傾計講笑，特別係拎最近既新聞黎娛樂下。 例如 新聞話有人要提出將國歌入面既歌詞由 “Vaterland” (Father country) 改成 “Heimatland” (Home country)，以示平等喎（調查最後得 5％ 支持，即係好多人覺得多舊魚），大家講起呢單新聞後就將啲打氣歌入面提到 “jungs” (boys) 或任何男性相關字眼全部改為 Menschen （people），唔岩音唔岩位都照唱。 聽落好無聊，但係現場真係好好笑 😀 仲有球迷好中意叫既 「反對所有球場禁制令」 叫成「反對所有柴油禁制令」 😀 好耐無試過睇睇下波笑得咁開心！

完場後，大家當然等埋啲球員過黎拍下手先離場啦。 自從今季新領隊上任後，隊波有大大少少既改變，其中一樣就係完場後佢地會係場中間圍圈，可能簡單檢討下今場波，然後先會走過黎看台多謝球迷。 今晚無啦啦有條友係度抱怨 做乜而家成日都要我地等佢地圍圈架，然後就有人提議 不如我地都圍圈，等佢地過黎時要等返我地囉。哈哈，只可以話男人既思想真心極之幼稚！！！！！！ 我淨係想快啲走人咋，咁凍仲企係度等黎等去鬥氣為乜？？？

終於，十點左右等到球場既大燈都熄埋，我地可以起程返屋企。 下場波係一場長途作客波，希望佢地個球場已經融哂雪唔會延期！！