25.02.2018
德國西南地區聯賽 第 26 週
TSG Hoffenheim II - SV Elversberg
Dietmar-Hopp-Stadion
賽果： 1:1 (0:1)
入場人數： 210
更多相片

今個星期既天氣報告話會有冷鋒由俄羅斯過黎，週末開始一連幾日跌至最低 -10 度 （南部近山會去到 -20!!）。由東部過吹黎德國既風又寒又乾，藍天白雲睇落好靚好舒服呀，但最難頂就係風。 咁凍去睇波真係玩命，但係大家個個好興奮咁。 一黎大家訂造左既新衫到貨，二黎賀芬咸同 SVE 既死敵上年結左盟，所以一個二個都好緊張驚有人會黎搞事。

同日朝早有德國冰球奧運隊歷史性打入決賽爭金牌，佢地對上一次贏奬牌已經係 42 年前既事。呢場波朝早五點開波，好多人約埋一齊朝早睇完冰球直落去睇足球，德國隊去到完場前一分鐘領先 3：2，點知臨尾比俄羅斯追和，進入加時突然死亡… 再比俄羅斯射入。最後奬牌榜輸埋比挪威只得第二！

賀芬咸二隊（即係 U21）既主場係賀芬咸既舊主場，佢地既一隊已經搬左去隔離鎮既 Sinsheim。由 Elversberg 坐巴士到 Hoffenheim 大約要兩個鐘車程。 今次架巴士泊係山腳要我地自己行上去球場。係作客區後面有差唔多成十架警車睇住我地，心諗 呢場咁既廢波都要出動咁多警察，估唔到佢地咁睇好我地。

其實去睇二隊既比賽真係好無癮，一來個場一定唔會係靚場，二來唔會有人入場睇。呢場波計埋我地大約 60 個作客球迷先得果 200 人！

SVE 既仇家 FC Homburg 上年降左班，原本佢地今日都有比賽，不過因為球場草地結左冰所以比賽取消左。即係話佢地班友唔洗睇波，有機會會走到去 Hoffenheim 會下佢地班朋友。 我地入場後唔見有啲咩人係主看台上。 接近開波時留意到有班友係咁望住我地，原來係賀芬咸既活躍份子，成場波佢地好安靜咁係度睇波，有時我地有人想撩交嗌佢地都無反應。

開波後大家唱左幾首歌，然後就係咁嗌凍。雖然個身係暖，但手腳完全冰冷，仲有寒風不段由球場側邊既空隙吹入黎…. 好在 SVE 上半場靠角球射入一球，等我地有得暴走下慶祝等啲血運行一下！ 球證一吹完上半場大家就即刻跑落去排隊買野食同曬太陽。 拿，雖然我地好憎賀芬咸，但佢地賣既豬扒包好好食呀！！！！！ 配埋超多汁既洋蔥，5€ 係有啲貴，但間唔中有得食下香腸或者 Frikadelle 以外既野都好。 食飽後就買多杯熱紅酒暖胃。

下半場開波，賀咸芬開始主動搶波，比多左好多壓力 SVE。兩邊都無咩機會埋門，但係係中場 SVE 明顯唔夠賀芬咸爭。 去到完場前幾分鐘仲比主隊追和埋。 唔知係咪大家已經凍到呆左，已經無咩點比反應。唔明點解防守可以咁差，前面入埋都唔會夠後面失！

完場後，大家等埋啲球員過黎叫佢地繼續加油，然後就收拾細軟行返落山，由警車護送我地上高速公路返返莎蘭。