18.02.2018
盧森堡甲組聯賽 第 11 週
Jeunesse Esch - CS Fola Esch
Stade de la Frontière 
賽果: 3:3 (1:0) 
入場人數： 1.503 (約 300 名作客球迷)
更多相片

尋日朝早無啦啦開始落雪，搞到 Kaiserlinde 因積雪過多而未能如期進行比賽，搞到我地只可屈係屋企睇電視（由一點睇德乙到三點半德甲再睇埋六點半場波）。好在我地一早 plan 左星期日去盧森堡睇呢場 Esch 打比。 場波原先係十一月進行，但因為積雪問題改期至十二月，然後再因同樣問題改至今日上演。

我地一直都好擔心場波又會因為星期六既大雪又要再改期而令到我地成個週末都無波睇。好在星期日朝早，盧森堡賽會宣布比賽會如期開波～～ 係 Elversberg 留到兩點左右我地就出發啦！今日太陽高掛，但即使有太陽，氣溫都只係得 4 度左右，好多地方都仲有積雪 （Kaiserlinde 仍然係白色）。

開車一個鐘左右我地就去到盧森堡南部近法國既邊境一個名為 Esch-sur-Alzette 既工業城市。 國家末發達前，大部份受歡迎既球隊都係來自呢個地區，工業城市同足球就係有千絲萬柳既關係！季初 Fola Esch 踢歐霸外圍賽時我地都有黎過呢個城市，但 Fola 係有錢球隊，能夠真正代表 Esch 既工人就只有 Jeunesse Esch。

Jeunesse 既主場叫 Stade de la Frontière，由法文翻譯做中文就係 邊境球場，因為球場同法國既邊境只有大約五分鐘既路程！球場座落於社區內，由球場望出去有好多唔同顏色既屋仔做背景，有啲英國既感覺！ 近法國即代表球場入面會有真法包食！！！！ 比左十歐入場後，我地即刻搵小食亭買燒香腸配脆卜卜既法包，德國包同法包真係完全無得比！

草地上有職員推住架車走到龍門口前面倒左一大堆沙落地，完全唔知做乜。 我地㨂左企係有蓋主看台前面場邊，到開波時我地終於知道做乜要倒沙。 原來近作客區既小禁區上有積雪仲未融哂，雪融到一半就即係冰…. 我地點發現？ 就係見到啲球員跑到去龍門前就會失平衝要跣住咁飛走… 上半場可憐既 Fola Esch 守門員係咁 pk…. 後來佢地既球隊職員拎左另一對鞋比佢換就好似無咁跣。

上半場無話邊隊有明顯既優勢，不過 Jeunesse 係一次混亂之中就射左個波入網。 Fola 既龍門因為場地問題完全救唔到 （今次真係可以懶地硬），無人知到底點解個波可以咁樣碌入網！ 呢個波仲有一樣野好騷擾我就係啲鴿。

係香港啲人成日都驚啲雀有病，作為一個香港人唔多唔少我都有啲驚。不過係歐洲就真係唔會驚呢啲野，我住鄉下見雀仲多過見人。 係球場，我地頭頂有好多雀飛黎飛去，好正常呀。 而我地頭頂既上蓋都有用網封左啲橫樑，等啲雀唔可以飛上去企然後周圍柯屎。 好正常呀。 但聰明既雀搵到一個破洞，成功飛到入網，仲係暗角位築巢，都無咩野…. 問題在…… 亦都有好多鴿飛左入去飛唔返出黎….. 個網上面有好多死雀！！！！！超嘔心…… 後來我間唔中都忍唔住望下啲雀，集中唔到！！！

作客球迷有大約三百人入場，佢地近年成績唔錯。季初既歐霸外圍賽仲踢到去第三圈，即係已經賺左差唔成千萬… 班球迷係場內掛起左兩塊大旗。 全場除左入波時有歡呼聲，其餘時間都係安安靜靜咁睇波。

下半場，我地換左地方搵個位坐，終於可以好好咁睇波。又好好彩下半場 場波刺激左好多！ 52 分鐘 Fola 追和，睇得出 Jeunesse 既龍門同樣因為結冰問題而未能發揮，然後就有連續三個入球。首先係 Jeunesse 立刻射成 2：1 再度領先，不過 Ryan Klapp 為 Fola 再射入兩球成功戴帽為球隊反超前。今場波既打比味係呢一刻就開始黎，場上面越黎越多推撞，球證又唔係下下都吹，有幾次都爭啲就打交。 完場前幾分鐘主隊靠傳中射入，球員跑向球迷開心慶祝，不過客隊強烈抗議，係咁追住主隊球員黎鬧，又搵球證理論。 球證同旁證傾左好耐，最後都係判入球成立。 （後來睇返佢地係嘈手球）

最後三比三完場，天開始黑又越黎越凍，我地想快啲走，不過硬係覺得其中一方既球迷會放煙花！果然，多年打比戰都主場輸波既 Jeunesse 為左慶祝搶得一分，完場後放黑煙紅火！！盧森堡既頂級聯賽比我地既感覺就好似德國既超低組別聯賽，樣樣都求求奇奇咁…

食完花生，我地就向停車場奔跑，開暖氣取暖，返德國前係邊境入埋平價油，買埋平價咖啡就回家了。好似話下個週末會 -10 度，希望唔會凍死。