03.02.2018 德國西南地區聯賽 第 22 週 1.FC Saarbrücken - SV Elversberg Hermann-Neuberger-Stadion 賽果：2:2 (0:1) 入場人數： 4,689 （約 300 名作客球迷） 更多相片
Regionalliga Südwest! 我對上一場既西南地區聯賽已經要數返去八月，即係已經半年前啦… 其實西南地區聯賽再多一個星期先會開始，今場波係因為十二月頭場大雪而被迫延期，最後㨂左二月頭做補賽。
我八月返香港前睇左三場聯賽，呢三場入面 Elversberg 只得兩分，之後既賽事都無話表現得特別好；上季既聯賽冠軍，今季暫時只排第五。而今日既對手 FC Saarbrücken 今季暫時只係輸左一場波，係積分榜榜首遙遙領先，證明佢地季前花一大筆錢簽入球員增強自己既實力既決定係無錢既。
之前都有講過 FCS 因為要重建球場所以暫時要租用人地既球場去比賽：Hermann-Neuberger-Stadion 係 SV Röchling Völklingen 既主場（今季同樣踢西南地區聯賽） ；位於離 Saarbrücken 市約 13 公里既 Völklingen 市。 FCS 自己既主場 Ludwigsparktion 又舊又醜，看台上生哂雜草，有部份看台既結構亦都已經唔適合開放。佢地既重建計劃要關閉整個球場（有啲球隊會選擇繼續係球場進行比賽，逐個看台重建），除左主看台外，其餘三邊看台都會一次過拆哂然後再開始工程。
由於呢個球場係由 Saarbrücken 市政府擁有，所以工程資金由市政府負責。政府比錢仲好啦，球會既負擔無咁大。最慘係市政府無錢呢！重建工程開始左一年左右多啲，三個看台已經拆哂， Ludwigspark 而家只係一個地盤；市政府一句話：「工程超資嚴重，我地無錢啦所以要暫時擱置重建。」市政府無錢姐，贊助商有嘛。不過因為係市政府既工程項目，如果比贊助商投資既話牽涉到官商利益問題，所以贊助商唔可以幫手科水。
呢個問題由上季講到而家，但上季 Saarbrücken 無機會升班，所以講講下就無左件事咁。今季佢地企係榜首擺住副 我要升班 既姿勢；大家又再開始傾若果佢地真係成功升班，咁佢地既球場問題可以點解決？繼續用 Hermann-Neuberger-Stadion？唔得，因為呢個球場唔符合德丙既要求。 係莎蘭州 (Saarland) 入面可以拎黎踢丙組就得返 FC Homburg 同 Elversberg。 FCS 同 Homburg 係死敵，就算 Homburg 肯，警察同市政府都唔會比。即係得返同 FCS 無咩恩怨既 Elversberg。先唔講 Elversberg，係莎蘭附近其實都有幾個球場，但全部都起碼半個鐘至一個鐘車程，有邊個會去？
Elversberg 既球場幾年前都唔符合德丙球場要求，但第一次升班既球隊會有三年既時間去達到要求，呢個豁免權只係第一次升班既球隊先有！Elversberg 而家降左班，如果下季成功升班又無達要求既球場的話就會失去升班資格；所以即使 Elversberg 現時只係踢緊地區聯賽，佢地一直都進行緊大大小小既升級工程；例如將球場既容納人數擴建至 8000 人；新建更多停車車位，就連市政府都配合球隊既工程係球場附近加建紅綠燈方便係比賽日做車流管制。呢兩年既工程因為 Elversberg 未能升班所以慢左落黎，例如計劃中既 C1 看台係有上蓋，但球會講到明要升到班先會繼續工程，所以而家除左主看台之外，其他看台都係露天。呢啲大家都明，反正都係踢緊地區聯賽，而且 Kaiserlinde 現時已經符合德丙既最低要求，總之唔係必要既錢就唔好亂咁花！
不過 Saarbrücken 市政府好似唔係好識睇遠景，拆完個球場先黎話無錢。FCS 同 Elversberg 最近開會討論下 FCS 租用 Kaiserlinde 踢丙組既可行性。其實有錢就實有計傾既，點知 Saarbrücken 市政府就話：「如果你係莎蘭內搵到球場去踢丙組既話，咁我仲洗乜洗十幾億去幫你重建球場？」 換句話說，如果 FCS 成功升班又租用 Kaiserlinde 的話，佢地既 Ludwigsparkstadion 就會宣告死亡，因為市政府會立即停止重建工程。 係莎蘭州政府眼中，足球可帶來既收入對佢地黎講完全無吸引力，因為 dum 左呢舊錢去重建球場都唔知幾時會回到本。到現時為止都仲未有一個結論可以去點解決呢個問題，我地只好放長雙眼去睇。Elversberg 既球迷其實都唔係好想借個球場比 FCS 踢，個球場係我既，你有問題做咩要我幫你解決先？
Anyway，今日我地去到 Völklingen 睇呢場所謂既打比戰。FCS 係莎蘭州內有最大 fanbase 既球隊，佢地既球迷組織既份量係德國黎講都唔少，可惜佢地多年來都只係踢地區聯賽，已經少左好多球迷會長期入場支持，不過咁，即使佢地而家只係租用 Völklingen 既球場，佢地平均入場人數都有三至四千都算唔錯！
Elversberg 既球迷係過去兩季都因為實力增強又有份爭升班而比左自己好大壓力，場場波都要計住自己要贏幾多分，人地要失幾多分，球隊先可以保住升班附加賽資格。呢種壓力令到有部份球迷開始覺得睇波失去左樂趣，以前入場睇波係同班朋友開開心心唱下歌睇下波，輸波鬧兩句轉頭又無事；而上兩季一輸波就會由完場討論到下場波。今季一開季就輸左幾場波，升班附加賽雖然唔係遙不可及，但係大家反而睇化左，覺得輕鬆左，終於可以好好享受每場波同朋友一齊過既時間。
呢場波都無話特別期待啲乜，最重要就係唔好輸得太難睇。呢個球場可以話只有單面看台，總之個結構奇差。開波前我去到作客區既最遠處想影下主場球迷，但完全睇唔到正面。靠相機先睇到佢地賽前舉起左一塊寫住 Sportgericht abschaffen （廢除體育法庭）既黑白橫額，仲有另一塊我影唔到既橫額寫「Dem guten Beispiel folgen Verbandsstrafen ablehnen – Solidarität mit Babelsberg 03」
呢條張橫額係想向東北地區聯賽球隊 Babelsberg 表示支持，呢支來自 Potsdam 既球隊一直都有鮮明既左翼政治立場，上季佢地係主場迎來右翼既 Energie Cottbus。 比賽期間好多作客球迷向 Babelsberg 球迷做出納粹手勢，亦都不時叫出同納粹有關既口號同字眼，更加走落球場想衝向主場球迷區搞事；而主場球迷後來就高呼「Nazi raus」 （Nazi out） 回應。 事後足總既體育法庭罰 Babelsberg 一大筆罰款，話佢地既球迷係賽事中放 pyro 同埋叫 Nazi raus。 （係德國做納粹手勢或者宣傳納粹係犯法，但叫納粹死開係絕對唔犯法）而 Cottbus 就完全未有被罰。 Babelsberg 除左上訴之外，亦都同足總講佢地唔會交罰款。因為呢件事，好多其他球隊既球迷都公開表示支持 Babelsberg 既做法同埋支持佢地既球迷。
好啦，講返場波。 當我係角落頭影完主場區既相後，都未企定 Elversberg 就已經入左波！！！！兩分鐘就作客領先當然係好事～～～～ 返到埋位發現佢地個場多左塊比分板同埋電子鐘！！！ 好先進呀！！！ 主隊完全唔驚一早落後，佢地慢慢同你差波，完全控制哂成場波既節奏。 呢場波唔係 Elversberg 個龍門 Lehmann 上左身既話，一早已經倒輸左幾球！
下半場 FCS 繼續禁住黎攻，攻到 60 分鐘客隊食左張紅牌，捱多十分鐘終於頂唔住，被倒戈既 Kehl-Gomez 射入追和。 呢條友上季未完季就已經同 FCS 簽左約今季過檔，所以 Elversberg 既球迷都有啲嬲佢，因為當時 Elversberg 明明仲有機會爭升班！ 去到 84 分鐘，比今日既壽星射入反超前。 望過去主場區見到啤酒滿天飛。 我地呢面當然十分安靜啦，心諗 捱到去差唔多完場都唔話得。 大佬，你睇下 Elversberg 踢得幾差先啦！ 上下半場既射門一隻手數得哂囉。
補時四分鐘，我地都疊埋心情等完場，但去到最後變左 Elversberg 狂攻。補時已經補左三分鐘，個波去到龍門口變波子機，有罰球連龍門都走埋上去，都係射唔入。 最後個波又返到自己半場，龍門斬上前，個波落左去今季新加盟前鋒 Koffi 腳下。呢一刻我仲係度諗，呢條友成場拎到波都係背住龍門又轉唔到身，今次又有咩作為呢？ 點知佢拎左個波，一轉身就已經對住個龍，好淡定咁送左個波入網！！！！！！！！！！！！！！！！
呢一刻真係完全唔敢相信我地竟然追和！！！！！好多人衝哂落欄杆想同球員一齊慶祝，因為 Koffi 向住我地大字型咁走過黎。 全部人都嘩嘩聲咁問發生緊咩事。 Elversberg 真心完全唔值得執到呢一分，但一分已袋，理得你～～～～完場後，球員走過黎同球迷致謝，個個都大讚龍門話佢今場救左好多球靚波，佢都好開心咁多謝大家～
然後大家就開開心心咁執野離場～ 返到屋企我地都仲係覺得呢一分好不可思議！