12.08.2017 英國冠軍聯賽 第二週 Millwall FC - Bolton Wanderers The Den 賽果： 1:1 (0:0) 入場人數： 12,238 (約 1200 名作客球迷) 賽事相簿
暑假返香港前突然決定去倫敦一趟，原本見到利物浦會作客屈福特，但佢地只向會員賣飛，所以我地完全無機會可以買到飛；我地去係倫敦果幾日當中都有唔少波可以去睇，得米禾爾係最有氣氛同最有機會買到飛。
上次倫敦發生恐怖時，有位米禾爾既球迷對住襲擊者大叫「Fuck you, I’m Millwall」撻朵「嚇退」敵人，令到米禾爾一時之間成為大家既話題。對德國人或者好多其實中意睇戲既球迷，一定有睇過 Green Street Hooligans 同 The Football Factory 呢啲講足球流氓既戲，當中總有米禾爾份。當我地同朋友講我地週末去睇米禾爾，佢地都話「正喎！！！！」 （我…. 幾乎完全唔睇戲既，所以我唔知果幾套戲講乜）但現實上，米禾爾比人既流氓印象令到佢地成為英國最不受歡迎既其中一隊波，所以佢地係 70 年代開始就唱「No one likes us, we don’t care」。有人就叫我地去 The Den 睇波要小心啲，話米禾爾既球迷都幾激進。係咩？咁我就要去見識下啦！
星期六我地一早就出左倫敦市中心搵個地方食個 Full Breakfast，食飽去 Hyde Park 散步，然後就出發去 米禾爾主場 The Den。呢個球場係幾個站既中間，落車行去球場要大約 20-25 分鐘，最後加加埋埋要差唔多成個鐘先去到球場門口。後來爸媽見到我地啲相講返先知原來佢地當年曾住係附近，仲話「呢區好 up dup 架喎！」
無錯，呢區真係幾 up dup 下，同德國 NRW 啲工業城市一樣咁醜！但係呢啲先有足球既味道。由車站行左大約十分鐘左右，終於開始見到球迷聚腳地同埋好多人一齊向球場方向行，好快就見到火車橋！聽講係戲入面其中經典既一幕就係米禾爾球迷唱住歌經過火車橋下去球場，我地未出發時 P 已經話一定要去條橋影相…. 係橋底就已經望到 The Den。
我對上一次去英國已經係起碼兩年前既事，應該係特登飛去利物浦睇謝拉特隊對加力查隊。過去係英國睇波都係睇遊客球隊，去到後期只有機會睇利物浦，對場內氣氛已經就快無希望。今次係 P 第一次睇英國波，我就第一次係倫敦睇波，仲要睇真 working class 既 Millwall，可以感受下較正宗既英式足球同氣氛，所以我都當自己第一次睇英國波咁睇！
我地去到球場先買飛，諗住買 Dockers Stand 上層近 Family Area 諗住會平和啲，睇波同球迷都清楚啲。售票處外超多人排隊，隊尾有條友鬧交，警察一到條友無啦啦除衫唱歌，哈哈！！！排到我地時我地想買果區已經賣哂就叫佢求奇比兩個位我地，最後每張飛 29£。 入場後，兩個就好似大鄉里咁周圍影下相，對德國人黎講，最不可思議既就係英國球場禁止球迷拎住啤酒入座，每個入口都有個「No Alcohol Beyond This Point」既大牌，最可惡係佢仲要寫明只限足球球賽！
因為排隊買飛排耐左，埋到位已經得返十分鐘左右就開波。我地個位比人坐左，佢地之後發現坐錯行，但佢地原先個位都比人坐左（下一行），佢就篤一篤條友話佢知佢坐錯位，點知條友望住佢地笑住咁用純正英國口音講「Fuck Off!」，呢個情況即刻令我諗起之前係北京叫坐左我個位條友走開，但佢同我講「這裡是先來先得兒的」，文明球迷～～～～～ 後來佢地只係坐過兩個位，讓返我地個位出黎就算。
到班球員開始入場時班球迷開始出聲，我地先知賴野….. 我地一心以為果班會唱歌既忠實球迷同其他球隊一樣會坐龍門後面，點知原來佢地同我地坐同一區，係正我地隔離，我地即刻執野走去比較無人既一個區。今次入場我只係想坐係度睇波，做左兩日遊客行左超多路，同埋比 29£ 唔坐低睇波真係對唔住自己個銀包囉！！！！到底點解佢地會坐主看台對面？我地估….. 係因為佢地想坐近作客區。
班主場球迷係咁發出 “Miiiiiiiiiiiiiii” 既聲，形成 「Wall of Noise」 轟炸大家既耳朵，再加上超近球場上蓋，回音超強。呢班球迷，除左小朋友之外，無一個人著波衫，無一個人著同球會相關既衣物，全部都係著名牌 @@ 係德國都無見到咁多人著 Stone Island…. 有幾個矮過我既細路衫同褲都係 Stone Island；其他人就個個著到勁四正咁完全睇唔到佢地有幾 Working Class! 呢班球迷將 Casuals 文化原汁原味咁表現出黎！！！後來我同朋友講呢件事，佢話「咪好似香港 d MK 成儲爛儲錢買個假 LV show off 咁囉」，哈哈哈，但唔同既人米禾爾啲人真心唔 MK，普通人更可能會以為佢地係 Upper class！係德國啲人著名牌去睇波，無論係唔係 Ultras 都好，你一睇就睇得出佢地係球迷，就連係條街上面都可以一睇就有一陣球迷味；但英國呢班真係有好多著到身光頸靚咁真係唔會睇得出… 果然係 casuals 始祖！
成場波佢地唱既歌，超過一半都係 jer 住保頓球迷唱，最基本既就係人地係度 Come On Bolton，佢地就開始 Fuck off Bolton。保頓既五號 Mark Beevers 每次掂波都比主場球迷噓到爆，賽後睇返發現 Beevers 曾經效力過米禾爾五年，上季離隊加盟保頓。球員轉會係閒事，但我地真係唔知呢位球員到底做錯啲咩搞到班球迷憎左佢啦（可能離隊前後講過隊波既壞話？）
不過過左二十分鐘，雙方球迷都開始靜落黎，要到場上有啲攻擊先有人唱兩句咁。場上面客隊大部份時間都被禁住黎攻，米禾爾既組織做得唔錯，有幾下都做到上去，但又係硬係差最尾果兩腳囉。半場一完，球場變空，個個即刻走返入去買啤酒飲。我地就繼續坐係自己個位度等再開波。下半場多左人黎我地果區睇波，啲人見到我地坐係度睇竟然無話我地，反而企過少少等佢地唔會阻住我地視線 ＠＠ 唔係話班友好中意鬧人架咩？？
下半場開波幾分鐘就終於比主隊破網開齋！！！大家慶祝得超開心同終於有返啲氣氛！作客球迷全部坐低哂無咩意欲再打氣咁。但去到六十幾分鐘客隊追和後，佢地全部即刻企返哂起身繼續打氣！ 場波都開始變得緊張，緊張到我地要企起身睇！去到最後十分鐘左右，保頓球迷都 miiii 足 10 分鐘（未必係 mi, 但唔知佢地 up 乜，總之一個長音叫左超耐），同時兩面球迷就對罵到完場。
好好彩，直到我地離開球場都無人走埋黎對我地講任何說話。不過我地都係建議想去睇米禾爾既人出發前睇下有無啲 important notice 睇下啲球迷會坐邊／做啲咩，最緊要可以安安全全平平安安咁睇波～
英國既足球文化的確係同歐洲大陸唔同，有時唔係下下都要有 Ultras 先可以有氣氛既。有機會我地都想再睇多啲英國波，不過啲波飛真係好貴……