02.08.2017 德國西南地區聯賽 第三週 SV Elversberg - 1.FC Saarbrücken Waldstadion an der Kaiserlinde 賽果： 0:0 (0:0) 入場人數：7.819 (約 4.000 名作客球迷) 更多照片
星期六開季後，時隔三日 Elversberg 要再返到主場提出迎戰 FC Saarbrücken；呢場波原本係第三週先踢，但因為該週末 Saarbrücken 要出戰足總盃對德乙既柏林聯，所以賽會就將原定第三週既賽事改期提早舉行。
去到 Elversberg 我地到 Fan shop 買定星期一作客 Mannheim 既車飛（係囉，我又話唔再跟佢地作客既，又唔知點解無啦啦又走左去買飛），休息一陣就出發去球場。路上好多著住藍黑色衫既 Saarbrücken 球迷，亦都有唔少著白衫既 Elversberg 球迷向住球場方向走。當時球場外既酒吧外面已經有好多球迷拎住杯啤酒趁賽前吹下水。兩隊波一直都無咩恩怨，FCS 既球迷其實都唔係好 show SVE，覺得佢地呢啲鄉下波唔需要理會，再加上球迷組織好多人都認識，上星期 FCS 開 party 都有叫埋我地一齊去玩！
早幾個星期我地咁岩睇到十幾年前 Saarbrücken 踢乙組既片段，條片入面見到看台上掛有一大塊寫住「SV 07 Elversberg – Linden Family」既橫額。當年 Elversberg 仲係無人理既蚊形球隊時，好多人都係走去支持莎蘭州內最強既球隊，而呢隊就係 Saarbrücken。
球場入面起碼有一半係 FCS 球迷，就連 C1 看台都分左一忽出黎比作客球迷，佢地仲要係同主場球迷用同一個入口，著住藍黑衫係看台走黎走去。今場波可能係佢地有最多球迷入場睇波既一場；事關佢地自己既主場 Ludwigspark 而家進行緊重建工程，被迫租用 Völklingen 球場，好多球迷都唔願意去唔屬於自己既球場睇波。加上佢地既死敵 Homburg 同 Trier 都降左班，雖然仲有 Waldhof Mannheim 可以比佢地鬧下，但都要距離差唔多兩個鐘既車程呀！去 Elversberg 睇波仲近過去而家所謂既主場睇波，又起碼叫做可以比自己人賺下錢！
入場後我無去到球迷組織果度，反而係看台最後果度搵左個靚位想自己一個靜靜咁睇波。對面既作客看台，A2 看台同半個主看台都係藍黑色，佢地靠住人多勢眾成功將球場反客為主，球員進場前佢地一開始 Schalalala 就已經蓋過喇叭播緊既歌！不過呢個聲勢維持左五分鐘左右就完，到開波時就得返大約一百人左右唱歌，同幾年前既佢地真係相差好遠！主場球迷係上半場既氣氛只係麻麻地，要到作客球迷咁岩無唱歌我先聽到佢地既打氣聲。
下半場買完野食後無左個靚位，唯有走去同班友一齊企，平時我企係中間一齊打氣，但而家因為無咩心機打氣所以就企係佢地側邊，點知隔離有幾個女仔，差啲就想中佢地兩鎚！！唔明點解可以吱吱喳喳咁講唔停口！！！！好在佢地都會一齊唱下歌，所以我叫班友瘋狂唱歌等果幾個女仔無機會傾計，可能因為咁樣下半場既氣氛好左好多 😛
Elversberg 有幾位重心球員都過左檔去 Saarbrücken，所以好多球迷都以噓聲回報離隊既球員。雖然場波比上場刺激，但問題一樣：十一條友都無咩默契，中場做到少少野之後送到個波去前面永遠無人接應。最嬲就係兩個前鋒都好似唔願去衝咁，例如人地個龍有波在腳，佢地兩條友就勁悠閒咁等個龍大腳踢走個波，迫都唔迫下，想點？好多時間比你dum 呀而家？踢成咁真係完全比唔到可以爭升班既感覺。最後再一次悶和，兩戰兩分。
比較令人驚喜既係入場人數，今場波有七千八百幾人入場，比上季比多左一百人，上場波仲要係星期六踢，唔係週中！真係唔知多左作客球迷成主場球迷… 下場作客 Mannheim 又係另一場硬仗，唔輸波都偷笑>_>