19.07.2017 歐聯外圍賽 第二圈 F91 Dudelange - APOEL Nikosia Stade Jos Nosbaum 賽果： 0:1 (0:1) 入場人數： 1,458 (80 名作客球迷)
朋友係香港開開心心咁係香港大球場聚舊，我就嬲爆爆咁去睇歐聯外圍賽…..
盧森堡既球隊一直都比人當係魚腩部隊，我地都無諗過四隊入面竟然有三隊可以係歐聯歐霸晉身次圈。另外兩隊踢歐霸既我地都睇過，所以今個星期就㨂左去睇 Dudelange，加上佢地對手係來自塞浦路斯既 APOEL Nikosia，上季史浩克係分組賽對過佢地，見過佢地啲球迷都幾有氣勢，好想去見識下。
賽會將場波由星期二八點開波改左去星期三六點，搞到我地要好趕咁出發去球場。去到球場又搵唔到位泊車，兜左好多個圈先係住宅區度搵到唔知洗唔洗比錢既車位（唔識睇法文呀！），早一日明明得 20 度，今次無啦啦有成 30 度，行到去球場已經一身汗，仲要排隊買飛。
波飛分兩種：有頂同無頂，分別係 25€ 同 20€。 平時有無頂對我地黎講都無咩所謂，咁我地就比 20€ 入場。影左幾張相，經過小食亭就搵個位坐低。當時個太陽係正面曬過黎，歐洲夏天係夜晚十點先天黑，下午五六點係最熱既時間！想加多 5€ 換去有蓋看台坐已經太遲，因為已經賣哂。
坐左陣我地頂唔順，諗住去小食亭果度無太陽曬到既地方企下。點知有保安走過黎話呢度唔企得架，我地咪買杯汽水抖涼企一陣咪返去囉。買完拎住杯野飲佢都係過黎趕我地走，死死地氣搵個氣坐低。又係啲 UEFA 規例指定場內唔可以有企位，保安收到命令就出盡力咁趕人走。果陣我曬到心情勁差又有啲頭暈，完全專心唔到睇波。後來越黎越多人走去小食亭避太陽，保安見趕佢地唔走都無辦法。
上半場 APOEL 入左一球，總比數二比零，即係 Dudelange 要入夠三球先可以出線。球證吹雞中場休息，當啲開始有返啲雲擋下太陽，我地就搵返個靚啲既位坐，最後係正作客區隔離坐低左。個看台有幾米高，但只得五行座位，我坐低左之後對腳係唔掂地 -_- 係球場入面見到好多 Groundhoppers，有幾個連續三次去盧森堡睇波都見到佢地，正常係唔會留意佢地，但佢地著埋啲勁搶眼既足球潮牌係度走黎走去，忍唔住要望下同討論下佢地。唔明點解啲人咁中意著潮牌比人知自己係 Groundhoppers/與別不同既球迷，我去睇波唔會想比人知我係 Groundhoppers 囉！最好當我係一個唔識足球既遊客就最好，咁就一定最安全，唔洗比人評頭論足。
不過當日我著左件好耐之前係利物浦買既 T-shirt，件衫上面寫住 Liverpool – Live it – Love it，其實只係講緊個城市，唔係講緊隊波，但我當波衫黎著下暗暗地支持下自己隊波難得到香港作客！下半場開波，啲作客球迷唱下啲自己語言既歌，好多我地都係第一次聽。週中有八十個作客球迷走到黎盧森堡都算係咁！
APOEL 領先後場波變得超悶，後來 Dudelange 換人時換入左岩岩由 Elversberg 轉會過去既 Niko Dobros，我地先有返心機留意下佢踢成點。我地前面既球迷突然係咁向後望，我地望下佢望乜先知原來有人係球場外爬牆伸左個頭入黎唔知想做乜，啲保安即刻爬上去睇下出面發生咩事。後來又有警察係出面爬入黎睇下咩情況，唔知點解咁緊張呢！佢地講法文我地完全偷聽唔到佢地傾計 😀 可能有人想係出面偷運 pyro 入場比班作客球迷完場後放煙花慶祝。
由於當日比太陽曬到心情極差，到 85 分鐘我地就向球場門口出發，等球證一吹雞就衝出去離開呢個鬼地方！補時三分鐘後終於完場，我地就行返架車度開大冷氣抖涼啦！
呢三隊盧森堡球隊最後得返一隊成功晉身歐霸第三圈，我地超開心因為第三圈有超多好出名有氣氛既球隊！！！！！有 Belgrad Red Star 、Austria Wien 或者仲有機會對我西甲留意開既畢爾包呀！點知最後佢地竟然係對瑞典球隊…. 果度波 2015 年先升班上甲組，上季贏左個唔知咩盃先獲得歐洲賽資格…… -_-