29.06.2017
歐霸外圍賽第一圈 首回合
CS Fola Esch - FC Milsami Orhei
Stade Émile Mayrisch
賽果: 2:1 (1:0)
入場人數: 989 (無作客球迷)
更多相片

抖暑話咁快就過左一個月，歐州賽事既外圍賽係六月尾抽籤後，我地最期待知道四枝盧森堡球隊既隊手，最後除左會有格拉斯哥流浪會訪盧之後，老實講，其他都無咩興趣。但始終餓波餓左成個月，有波睇無理由唔睇，最後㨂左去呢場 Fola Esch 對來自遠東歐既 Milsami Orhei。

㨂呢場去睇既最大原因其實只係因為想去隔壁市買飛 Niederkorn 對 Rangers。Fola 上季季尾我地已經睇過，無咩特別，但今場波對手唔算強應該都有機會可以贏波。星期四我地四點左右出發，先去盧森堡邊境入油（過條界就平超多，盧森堡既燃油稅比德國低），入完油就去 Niederkorn。話說 Niederkorn 既售票處只係開到六點，五點半既時候我地仲係公路上塞緊車，最後五點五十八分先到 Niederkorn 球場外！飛奔到入售票處後見到個姐姐已經係度數緊錢，好彩佢肯做埋我地生意先收工。

買完飛就出發去 Esch，同上次一樣要上山搵位泊車，時間尚早所以離球場不遠就有位。係門口買左兩張學生飛 （各5€），唔洗搜身就入得場。入場諗住即刻買野薯條食啦，點知佢地無薯條！無薯條都算啦，仲要完全無熱食！！！！！ 我地估係因為歐洲足協有啲唔比用明火既安全條例，所以 Esch 只能賣預先包裝好既食物。最後好唔開心咁買左個美心質素既芝腿包 （如果係好似德國面包店果啲勁大份厚三文治我都無咁嬲）

呢場波主要分兩大區，一個係有蓋座位區，另一個係新翻新既露天座位區（上次去既時候仲未安裝好座位）。平時聯賽係全場無劃分，中意坐邊都得，我地入場時無留意手上張飛求奇搵個位就坐低左。後來見到有人望住手上張飛對號入座，我地先醒起歐洲足協啲規例一定要全劃位，拎返張飛出黎望下我地坐邊：Block E，咦，我地係 Block E 喎，唔洗走咁遠； 688 、689 號 （點解咁都中呢個不祥號碼），咁岩我地亂坐既兩個位，正正就係我地張飛劃左既位！！！！！！果刻個心真係離左一離，750 個位入面都可以坐中兩個位。（第二日我地即刻去買六合彩，可惜唔中～）

當我地沉醉係以為自己行大運既時候，班球員就開始出黎。呢場波賽前已經知道唔會有作客球迷到場，所以 Fola 先可以係自己主場出戰 （根據足協規定，球場必須要有獨立入口及區域比作客球迷）。氣氛黎講就知係無乜，好在有班 Fola 青年軍入場用雞仔聲打下氣，間唔中仲唱下歌。

無球迷打氣既情況下，我地就以為可以專心睇波，但係場內有超多 Groundhoppers 係度行黎行去分我地心～ 好多 Groundhoppers 都好中意著 Casuals 等人知佢地唔係「普通既球迷」。我地入場睇波唔會想比人知我地係 Groundhoppers… 因為就係知道會比人望同講。我地每次見到啲 groundhopper 都會忍唔住討論下佢地邊度黎，同笑下佢地既一舉一動咁。

Milsami Orhei 係上季國內聯賽既第三名，而 Fola 同樣亦係聯賽第三名，實力黎講兩隊波都應該唔會相差太遠～ 最後係場上 Fola 踢得比較順暢啲，上半場仲先入波領先一球。同上場一樣， vip 區入面既西裝友反而係慶祝得最開心既一班人！半場休息時 P 去影相同買薯片（包裝果啲，唔係薯條！），佢返黎時拎住條腸返黎好開心話佢地有熱食呀！ 但其實佢行開時，我附近有班德國仔又係好開心咁買左條腸返黎，咬左一啖後大聲話「仆街！凍既！」，我就知果條唔係新鮮烤腸…. P 比條腸我時我話：凍架喎…… 佢話，唔係呀，我買完即刻返黎架。我無聲出，好唔開心望住條腸完全放唔落口。（德國超市可以買到凍腸，亦都有人會就咁食，但唔係係球場囉） 嗚，唔係肚餓我真係唔會食！！！ 即刻憎左呢個球場，以後就算聯賽有薯條都唔會想再黎～

下半場要去到最後十分鐘先開始刺激返啲， Fola 射入第二球後即刻比客隊追返一粒，最後 Fola 係主場以 2：1 勝出，下星期四作客次回合。